ଆଦାନୀଙ୍କ ପାଇଁ ଅଟକିଲା ନନ୍ଦିଘୋଷ: ରାହୁଲ

ଭୁବନେଶ୍ୱର, ୧୧/୦୭: ଓଡ଼ିଶା ଗସ୍ତରେ ଆସି କଂଗ୍ରେସ ନେତା ରାହୁଲ ଗାନ୍ଧୀ ବିଜେପି ସରକାର ଉପରେ ପ୍ରବଳ ବର୍ଷିଛନ୍ତି। ଭୁବନେଶ୍ୱରର ବରମୁଣ୍ଡା ପଡିଆରେ ‘ଭାରତର ସମ୍ବିଧାନ ବଞ୍ଚାଅ’ ବିଷୟବସ୍ତୁ ଉପରେ ଏକ ବିଶାଳ ଜନସମାବେଶକୁ ସମ୍ବୋଧିତ କରି ରାହୁଲ କହିଛନ୍ତି, ସମ୍ବିଧାନ ଗରିବ, ଦଳିତ, ଚାଷୀ ଏବଂ ପଛୁଆ ସମ୍ପ୍ରଦାୟକୁ ସୁରକ୍ଷା ଦିଏ। ଏହା କୌଣସି ସ୍ଥାନରେ ଲେଖାଯାଇ ନାହିଁ ଯେ ଏହା ଅମ୍ବାନୀ, ଆଦାନୀ କିମ୍ବା କୌଣସି କୋଟିପତିଙ୍କର। ତଥାପି, ଆପଣ ଓଡ଼ିଶାରେ ଯେଉଁଠି ଦେଖୁଛନ୍ତି, ସେଠାରେ କେବଳ ଆଦାନୀଙ୍କ ପୋଷ୍ଟର ଲାଗିଛି। ତେଣୁ ଏଥିରୁ ଜଣାପଡ଼ୁଛି ଯେ ଆଦାନୀ ଏଠାରେ ସରକାର ଚଳାଉଛନ୍ତି। ଓଡ଼ିଶାକୁ ପରିଚାଳିତ କରୁଛନ୍ତି ଶିଳ୍ପପତି ଗୌତମ ଆଦାନୀ। ପୁରୀରେ ପ୍ରଭୁ ଜଗନ୍ନାଥଙ୍କ ରଥଯାତ୍ରା ସମ୍ପର୍କରେ କହିଥିଲେ, ଆଦାନୀଙ୍କ ଯୋଗୁଁ ରଥ ଅଟକିଯିବା ଘଟଣା ପରେ ଏଠାରେ ଆଦାନୀଙ୍କ ପ୍ରଭାବ କେତେ ତାହା ସ୍ପଷ୍ଟ ହୋଇଥିଲା।

ରାଜ୍ୟ ସରକାର ଓଡ଼ିଶାର ଯୁବକମାନଙ୍କ ପାଇଁ କେତେ ନିଯୁକ୍ତି ସୃଷ୍ଟି କରିଛନ୍ତି‌ ବୋଲି ରାହୁଲ ପ୍ରଶ୍ନ ଉଠାଇଛନ୍ତି। ସେ କହିଛନ୍ତି, ୪୦ ହଜାରରୁ ଅଧିକ ମହିଳା ନିଖୋଜ ହୋଇଛନ୍ତି। କିନ୍ତୁ ସେମାନେ କେଉଁଠି ଅଛନ୍ତି କେହି ଜାଣି ନାହାଁନ୍ତି। ପ୍ରତି ଘଣ୍ଟାରେ ମହିଳାମାନଙ୍କୁ ବଳାତ୍କାର କରାଯାଉଛି, ତଥାପି ସରକାର ନୀରବ ରହିଛନ୍ତି।”

ସେ ବର୍ତ୍ତମାନର ବିଜେପି ସରକାର ଏବଂ ପୂର୍ବ ବିଜେଡି ସରକାରକୁ ଟାର୍ଗେଟ କରି କହିଛନ୍ତି, “ଏହି ସରକାରଙ୍କ ଏକମାତ୍ର ଉଦ୍ଦେଶ୍ୟ ହେଉଛି ଓଡ଼ିଶାର ପ୍ରାକୃତିକ ସମ୍ପଦ ଲୁଟ କରିବା। ପୂର୍ବ ଶାସନ ପରି, ଏହି ବିଜେପି ସରକାର ୫-୬ ଟି କମ୍ପାନୀକୁ ସବୁକିଛି ଶୋଷଣ କରିବାକୁ ଦେଉଛି – ଜମି, ଜଳ ଏବଂ ଜଙ୍ଗଲ। ଏହି ସମ୍ପଦ ଆଦିବାସୀମାନଙ୍କର ଏବଂ କାହାରି ସେସବୁକୁ ଛଡ଼ାଇ ନେବାର ଅଧିକାର ନାହିଁ।

ସେ ଆହୁରି ମଧ୍ୟ କହିଛନ୍ତି ଯେ ବିଜେପି ସାରା ଦେଶରେ ସମ୍ବିଧାନକୁ ଦୁର୍ବଳ କରୁଛି। ବିହାରରେ ସେମାନେ ଏହାକୁ ହେରଫେର କରିବାକୁ ଚେଷ୍ଟା କରିଥିଲେ, ଏବଂ ଏବେ ଓଡ଼ିଶାରେ, ସେମାନେ ଏହାକୁ ସମ୍ବିଧାନକୁ ବିପଦରେ ପକାଇଛନ୍ତି।

“ଆମେ ତେଲେଙ୍ଗାନାରେ ଏକ ଜାତିଭିତ୍ତିକ ଜନଗଣନା ସଫଳତାର ସହ କରିଥିଲୁ। ଆମେ ଏଠାରେ ଓଡ଼ିଶାରେ ସମାନତା ଆଣିବାକୁ ଚାହୁଁଛୁ। ଲୋକମାନେ ଏହି ପଦକ୍ଷେପକୁ ସମର୍ଥନ କରିବା ଉଚିତ। ଯେତେବେଳେ ସାଧାରଣ ଲୋକମାନେ ସେମାନଙ୍କର ଅଧିକାର ଅନୁଭବ କରିବେ, ସେମାନେ ବିଜେପିକୁ କ୍ଷମତାରୁ ହଟାଇ ଦେବେ।

ଡ୍ରାଇଭର ସଂଘର ଧର୍ମଘଟ ସମ୍ପର୍କରେ ରାହୁଲ କହିଛନ୍ତି ଯେ, ଏହା କଂଗ୍ରେସର କାର୍ଯ୍ୟକ୍ରମକୁ ପଥଭ୍ରଷ୍ଟ କରିବା ପାଇଁ ବିଜେପି ଷଡ଼ଯନ୍ତ୍ରର ଏକ ଅଂଶ। ଆମ କାର୍ଯ୍ୟକ୍ରମକୁ ବାଧା ଦେବା ପାଇଁ ବିଜେପି ଡ୍ରାଇଭର ସଂଘ ଉପରେ ଚାପ ପକାଇଥିଲା। କିନ୍ତୁ ଆମେ ଜିତିଗଲୁ, କାରଣ ସଂଘ ଗୋଟିଏ ଦିନ ପାଇଁ ସେମାନଙ୍କର ଧର୍ମଘଟକୁ ସ୍ଥଗିତ ରଖିବାକୁ ରାଜି ହୋଇଥିଲା। ରାଜ୍ୟ ସରକାରଙ୍କୁ ଦାୟିତ୍ୱର ସହ ଆନ୍ଦୋଳନକାରୀଙ୍କ ଦାବିକୁ ଧ୍ୟାନ ଦେବାକୁ ପଡିବ ବୋଲି ରାହୁଲ କହିଛନ୍ତି।

ସୂଚନାଯୋଗ୍ୟ, ଆଜି ଦିନ ୧୧ଟା୩୦ରେ ଭୁବନେଶ୍ୱର ବିମାନବନ୍ଦରରେ ଆସି ପହଞ୍ଚିଥିଲେ କଂଗ୍ରେସ ନେତା ରାହୁଲ ଗାନ୍ଧୀ। ତାଙ୍କ ସହ କଂଗ୍ରେସ ସଭାପତି ମଲ୍ଲିକାର୍ଜୁନ ଖଡଗେ ଏବଂ ସାଧାରଣ ସମ୍ପାଦକ କେ.ସି. ଭେନୁଗୋପାଳ ମଧ୍ୟ ଥିଲେ। କଂଗ୍ରେସର ଏହି ଶୀର୍ଷ ନେତୃତ୍ୱମାନଙ୍କୁ ରାଜ୍ୟ କଂଗ୍ରେସ ନେତୃତ୍ୱ ଭବ୍ୟ ସ୍ୱାଗତ କରିଥିଲେ। ଭୁବନେଶ୍ୱର ବିମାନବନ୍ଦରରେ ପହଞ୍ଚିବା ପରେ କଂଗ୍ରେସ ନେତାମାନେ ସିଧା ବରମୁଣ୍ଡା ପଡ଼ିଆରେ ସମ୍ବିଧାନ ବଞ୍ଚାଅ ସମାବେଶରେ ଯୋଗ ଦେବାକୁ ଯାଇଥିଲେ।