ଲକଡାଉନ ଖବର ଗୁଜବ: କେନ୍ଦ୍ର ମନ୍ତ୍ରୀ ହରଦୀପ ସିଂହ

ନୂଆଦିଲ୍ଲୀ, ୨୭/୦୩: ଇରାନ ଯୁଦ୍ଧ ଯୋଗୁଁ ଲକଡାଉନ ହେବାର ଗୁଜବ ଉପରେ କେନ୍ଦ୍ର ସରକାର ପ୍ରତିକ୍ରିୟା ଦେଇଛନ୍ତି। କେନ୍ଦ୍ର ପେଟ୍ରୋଲିୟମ ମନ୍ତ୍ରୀ ହରଦୀପ ସିଂହ ପୁରୀ କହିଛନ୍ତି ଯେ ଲକଡାଉନ ହେବାର ଖବର ସମ୍ପୂର୍ଣ୍ଣ ମିଥ୍ୟା ଓ ଗୁଜବ। ସେ କହିଛନ୍ତି, “ମୁଁ ସ୍ପଷ୍ଟ କରିବାକୁ ଚାହୁଁଛି ଯେ ଭାରତ ସରକାରଙ୍କ ପାଖରେ ଏପରି କୌଣସି ପ୍ରସ୍ତାବ ବିଚାରାଧୀନ ନାହିଁ।”

ସେ କହିଛନ୍ତି ଯେ ଏପରି ପରିସ୍ଥିତିରେ, ଆମ ପାଇଁ ଶାନ୍ତ, ଦାୟିତ୍ୱବାନ ଏବଂ ଏକତା ରହିବା ଅତ୍ୟନ୍ତ ଜରୁରୀ। ଗୁଜବ ପ୍ରଚାର କରିବା ଏବଂ ଆତଙ୍କ ସୃଷ୍ଟି କରିବା ଠିକ୍ ନୁହେଁ। ବିଶ୍ୱ ପରିସ୍ଥିତି ବର୍ତ୍ତମାନ ଉତ୍ତେଜନାପୂର୍ଣ୍ଣ ରହିଛି। ଆମେ ସମସ୍ତ ଘଟଣା ଉପରେ କଡ଼ା ନଜର ରଖୁଛୁ। ଆମେ ପ୍ରତିଦିନ ଶକ୍ତି, ଯୋଗାଣ ଶୃଙ୍ଖଳା ଏବଂ ଅତ୍ୟାବଶ୍ୟକୀୟ ସାମଗ୍ରୀ ଉପରେ ନଜର ରଖୁଛୁ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱରେ, ଇନ୍ଧନ ଏବଂ ଅନ୍ୟାନ୍ୟ ଅତ୍ୟାବଶ୍ୟକ ସାମଗ୍ରୀର ଯୋଗାଣ ସୁନିଶ୍ଚିତ କରିବା ପାଇଁ ସମସ୍ତ ପ୍ରକାରର ପ୍ରୟାସ କରାଯାଉଛି। ଆମେ ଏହି ଚ୍ୟାଲେଞ୍ଜିଂ ପରିସ୍ଥିତିକୁ ମୁକାବିଲା କରିବା ପାଇଁ ସମ୍ପୂର୍ଣ୍ଣ ପ୍ରସ୍ତୁତ।

ସୂଚନାଯୋଗ୍ୟ, ଭାରତରେ କୌଣସି ଲକଡାଉନ ହେବାର ଘୋଷଣା ହୋଇନାହିଁ। ସରକାର ପକ୍ଷରୁ କୌଣସି ଅଫିସିଆଲ୍ ଘୋଷଣା ନାହିଁ ଯେ ଲକଡାଉନ ଲାଗୁ ହେବ। ଏହା ଏକ ଗୁଜବ ମାତ୍ର।

ନିକଟରେ ସଂସଦରେ ପଶ୍ଚିମ ଏସିଆ ଉତ୍ତେଜନା ଉପରେ ଅଭିଭାଷଣ ରଖୁଥିବା ବେଳେ କୋଭିଡ୍ ସମୟର ପ୍ରସ୍ତୁତି ଏବଂ ଏକତାର ଉଦାହରଣ ଦେଇଥିଲେ। ମଧ୍ୟପ୍ରାଚ୍ୟରେ ଇରାନ୍-ଇସ୍ରାଏଲ ଯୁଦ୍ଧ ଏବଂ ହର୍ମୁଜ୍ ପ୍ରଣାଳୀରେ ସଙ୍କଟ ପାଇଁ ସତର୍କତାମୂଳକ ବାର୍ତ୍ତା ସ୍ୱରୂପ ଏହାର‌ ଉଦାହରଣ ଦେଇଥିଲେ। କିନ୍ତୁ ଲୋକେ ଏହାକୁ ଭୁଲ୍ ଭାବରେ ଲକଡାଉନ ଘୋଷଣା ଭାବି ସୋସିଆଲ୍ ମିଡିଆରେ ଭାଇରାଲ୍ କରୁଛନ୍ତି। ଇନ୍ଧନ, ଏଲ୍‌ପିଜି ଏବଂ ଅର୍ଥନୈତିକ ପ୍ରଭାବ ନେଇ ଆଶଙ୍କା ମଧ୍ୟ ଏହି ଗୁଜବକୁ ବଢ଼ାଇଛି। ସରକାର ସ୍ପଷ୍ଟ କରିଛନ୍ତି ଯେ କୌଣସି ଲକଡାଉନ ପ୍ରସ୍ତାବ ନାହିଁ ଏବଂ ଲୋକେ ସ୍ୱାଭାବିକ କାର୍ଯ୍ୟକଳାପ ଜାରି ରଖନ୍ତୁ। ଯଦି କୌଣସି ନିଷ୍ପତ୍ତି ହୁଏ, ତାହା ଅଫିସିଆଲ୍ ଭାବରେ ଘୋଷଣା ହେବ।