ବରଗଡ଼, ୦୫/୦୪: ବରଗଡ଼ ସହରର ଏକ ଘରୋଇ ହୋଟେଲରେ ଇଣ୍ଡିଆନ୍ ମେଡିକାଲ ଆସୋସିଏସନ (IMA), ବରଗଡ଼ ଶାଖାର ୫୦ତମ ବାର୍ଷିକ ଉତ୍ସବ ବା ସ୍ୱର୍ଣ୍ଣ ଜୟନ୍ତୀ ସମାରୋହ ଅତ୍ୟନ୍ତ ଆଡମ୍ବର ସହକାରେ ପାଳିତ ହୋଇଯାଇଛି। ଏନଡିସି (NDC) ଏବଂ ଜୋଶୀ ଇମେଜିଙ୍ଗ ସେଣ୍ଟର ସହଯୋଗରେ ଆୟୋଜିତ ଏହି କାର୍ଯ୍ୟକ୍ରମରେ ଜିଲ୍ଲାର ସ୍ୱାସ୍ଥ୍ୟ ସେବା କ୍ଷେତ୍ରରେ କାର୍ଯ୍ୟରତ ଶତାଧିକ ଡାକ୍ତର ଓ ଚିକିତ୍ସା ବିଶେଷଜ୍ଞ ଏକତ୍ରିତ ହୋଇଥିଲେ।
ଏହି ସମାରୋହରେ ମୁଖ୍ୟ ଅତିଥି ଭାବେ ଯୋଗଦେଇ ବରଗଡ଼ ବିଧାୟକ ଶ୍ରୀଯୁକ୍ତ ଅଶ୍ୱିନୀ କୁମାର ଷଡ଼ଙ୍ଗୀ ଡାକ୍ତରମାନଙ୍କ ସେବା ମନୋଭାବକୁ ଉଚ୍ଚ ପ୍ରଶଂସା କରିଥିଲେ। ସେ ନିଜ ଅଭିଭାଷଣରେ ଏକ “ସୁସ୍ଥ ବରଗଡ଼” ଗଠନ ଉପରେ ଗୁରୁତ୍ୱାରୋପ କରିଥିଲେ। ବିଧାୟକ ଶ୍ରୀ ଷଡ଼ଙ୍ଗୀ ଉପସ୍ଥିତ ସମସ୍ତ ଚିକିତ୍ସକଙ୍କୁ ନିବେଦନ କରି କହିଥିଲେ ଯେ, “ଡାକ୍ତରମାନେ ସମାଜର ଦ୍ୱିତୀୟ ଭଗବାନ। ବରଗଡ଼ର ସାଧାରଣ ଲୋକଙ୍କ ପାଖରେ ଯେପରି ସୁଲଭ ଏବଂ ଉନ୍ନତମାନର ଚିକିତ୍ସା ସୁବିଧା ପହଞ୍ଚିପାରିବ, ସେଥିପାଇଁ ସମସ୍ତେ ମିଳିମିଶି ସଂକଳ୍ପବଦ୍ଧ ହେବା ଆବଶ୍ୟକ। ଆଗାମୀ ଦିନରେ ବରଗଡ଼କୁ ସ୍ୱାସ୍ଥ୍ୟ ସେବା କ୍ଷେତ୍ରରେ ଏକ ଆଦର୍ଶ ଜିଲ୍ଲା ଭାବେ ଗଢ଼ି ତୋଳିବାକୁ ସେ ଡାକ୍ତରମାନଙ୍କ ସହଯୋଗ କାମନା କରିଥିଲେ।”
ଏହି ଉତ୍ସବରେ କେବଳ ସେଲିବ୍ରେସନ୍ ନୁହେଁ, ବରଂ ଚିକିତ୍ସା ବିଜ୍ଞାନର ଅଗ୍ରଗତି ଉପରେ ମଧ୍ୟ ଆଲୋକପାତ କରାଯାଇଥିଲା। ସମ୍ମାନିତ ଅତିଥି ଭାବେ IMA ଓଡ଼ିଶା ଶାଖାର ସଭାପତି ଡାକ୍ତର ହରେକୃଷ୍ଣ ନାୟକ ଯୋଗଦେଇ ସଂଗଠନର ଆଭିମୁଖ୍ୟ ସମ୍ପର୍କରେ ସୂଚନା ଦେଇଥିଲେ।
ଡାକ୍ତର ସଂଗ୍ରାମ ବେହେରା (ହୃଦ୍ରୋଗ ବିଶେଷଜ୍ଞ – CTVS, ସମ୍ ହସ୍ପିଟାଲ) ହୃଦୟର ଜଟିଳ ଅସ୍ତ୍ରୋପଚାର ଓ ନୂତନ ଜ୍ଞାନକୌଶଳ ବିଷୟରେ ଆଲୋଚନା କରିଥିଲେ।
ଡାକ୍ତର ସୌରଭ ସୃଷ୍ଟି (ନେଫ୍ରୋଲୋଜିଷ୍ଟ, ବୁର୍ଲା) କିଡନୀ ରୋଗର ନିରାକରଣ ଓ ସଚେତନତା ଉପରେ ଗୁରୁତ୍ୱ ଦେଇଥିଲେ।
ଡାକ୍ତର ଅଭିଜିତ ଜୋଶୀ (ରେଡିଓଲୋଜିଷ୍ଟ, ବରଗଡ଼) ଆଧୁନିକ ଇମେଜିଙ୍ଗ ପଦ୍ଧତି କିଭଳି ରୋଗ ଚିହ୍ନଟ ପ୍ରକ୍ରିୟାକୁ ସହଜ କରିଛି, ସେ ସମ୍ବନ୍ଧରେ ନିଜର ମତାମତ ରଖିଥିଲେ।
IMA ବରଗଡ଼ ଶାଖାର ସଭାପତି ଡାକ୍ତର ରବିନାରାୟଣ ତ୍ରିପାଠୀଙ୍କ ପୌରୋହିତ୍ୟରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ସମ୍ପାଦକ ଡାକ୍ତର ସୁବଳ କିଶୋର କର ସମ୍ପାଦକୀୟ ବିବରଣୀ ପାଠ କରିଥିଲେ। ଉପ-ସଭାପତି ଡାକ୍ତର ଅର୍ଜୁନ ମେହେର ଧନ୍ୟବାଦ ଅର୍ପଣ କରିଥିଲେ। ୫୦ ବର୍ଷର ଏହି ଗୌରବମୟ ଯାତ୍ରାକୁ ମନେ ପକାଇ ଜିଲ୍ଲାର ବରିଷ୍ଠ ଡାକ୍ତରମାନଙ୍କୁ ସମ୍ବର୍ଦ୍ଧିତ କରାଯାଇଥିଲା।