ହଷ୍ଟେଲ ଭୁଶୁଡ଼ି ୬ ଛାତ୍ର ମୃତ, ୧୦ରୁ ଉର୍ଦ୍ଧ୍ବ ଉଦ୍ଧାର

ନୂଆଦିଲ୍ଲୀ, ୦୭/୦୯: ଦକ୍ଷିଣ-ପଶ୍ଚିମ ଦିଲ୍ଲୀର ସତ୍ୟ ନିକେତନ ଅଞ୍ଚଳରେ ଏକ ୫ ମହଲା ବିଶିଷ୍ଟ କୋଠା ଭୁଶୁଡ଼ି ପଡ଼ିବା ଫଳରେ ୬ ଜଣଙ୍କର ମୃତ୍ୟୁ ହୋଇଛି। ଏହି କୋଠାଟି ଏକ ପିଜି ହଷ୍ଟେଲ ଭାବରେ ବ୍ୟବହୃତ ହେଉଥିଲା, ଯେଉଁଥିରେ ବିଭିନ୍ନ କଲେଜର ଛାତ୍ରମାନେ ରହୁଥିଲେ।

ରବିବାର ଅପରାହ୍ନ ପ୍ରାୟ ୧:୩୦ ସମୟରେ ଏହି ଦୁର୍ଘଟଣା ଘଟିଥିଲା। ଘଟଣାସ୍ଥଳରେ ଏନଡିଆରଏଫ, ଦିଲ୍ଲୀ ଅଗ୍ନିଶମ ବାହିନୀ, ଏବଂ ଦିଲ୍ଲୀ ପୋଲିସ ଦ୍ୱାରା ବ୍ୟାପକ ଉଦ୍ଧାର କାର୍ଯ୍ୟ ଜାରି ରହିଛି। ଧ୍ୱଂସାବଶେଷ ମଧ୍ୟରୁ ୧୦ରୁ ଅଧିକ ଲୋକଙ୍କୁ ଉଦ୍ଧାର କରାଯାଇ ଏମ୍ସ ଟ୍ରମା ସେଣ୍ଟରରେ ଭର୍ତ୍ତି କରାଯାଇଛି। ଏବେ ବି ଭଗ୍ନାବଶେଷ ତଳେ କିଛି ଛାତ୍ର ଚାପି ହୋଇ ରହିଥିବା ଆଶଙ୍କା କରାଯାଉଛି।

ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ ପ୍ରାୟ ୪୦-୫୦ ବର୍ଷ ପୁରୁଣା ଏହି ବିଲ୍ଡିଂର ତଳ ମହଲାରେ ମରାମତି ଓ ଖୋଳାଖୋଳି କାମ ଚାଲିଥିଲା। ଏହି କାରଣରୁ ମୂଳ ପିଲର ଦୁର୍ବଳ ହୋଇଯିବାରୁ ସମ୍ପୂର୍ଣ୍ଣ କୋଠାଟି ଭୁଶୁଡ଼ି ପଡ଼ିଥିଲା।

ଦିଲ୍ଲୀ ପୋଲିସ ଦ୍ୱାରା ବିଲ୍ଡିଂ ମାଲିକ ହରିରାମ ବଂଶଲ ଓ ଅନ୍ୟମାନଙ୍କ ବିରୋଧରେ ବିଏନଏସ ଅଧୀନରେ ଏଫଆଇଆର ରୁଜୁ କରାଯାଇଛି।

ମ୍ୟୁନିସିପାଲ କୋର୍ପୋରେସନ୍ ଅଫ୍ ଦିଲ୍ଲୀ (MCD) ଏହି ଘଟଣା ପରେ ୪ ମହଲାରୁ ଅଧିକ ଥିବା ସମସ୍ତ ବେଆଇନ ନିର୍ମାଣକୁ ତୁରନ୍ତ ସିଲ୍ କରିବାକୁ ନିର୍ଦ୍ଦେଶ ଦେଇଛି। ଦିଲ୍ଲୀ ମୁଖ୍ୟମନ୍ତ୍ରୀ ରେଖା ଗୁପ୍ତା ଘଟଣାସ୍ଥଳ ଓ ଏମ୍ସ ଗସ୍ତ କରି ଏହି ଘଟଣାର ମାଜିଷ୍ଟ୍ରେଟ୍ ସ୍ତରୀୟ ତଦନ୍ତ ପାଇଁ ନିର୍ଦ୍ଦେଶ ଦେଇଛନ୍ତି।