ବରଗଡ଼, ୦୯/୦୯: ପଶ୍ଚିମ ଓଡ଼ିଶାର ପ୍ରାଣ ପ୍ରତିମା ଗଣପର୍ବ ‘ନୂଆଁଖାଇ’ର ଅସଲ ଆନନ୍ଦ ସମସ୍ତଙ୍କୁ ସାଙ୍ଗରେ ନେଇ ଖୁସି ବାଣ୍ଟିବାରେ ହିଁ ନିହିତ ଥାଏ। ଏହି ପବିତ୍ର ଅବସରରେ ବରଗଡ଼ର ‘ବଦାନ୍ୟ ବନ୍ଧୁ ସେବା ଟ୍ରଷ୍ଟ’ ଆସନ୍ତା ସେପ୍ଟେମ୍ବର ୧୯ ତାରିଖରେ ଏକ ହୃଦୟସ୍ପର୍ଶୀ ଏବଂ ବ୍ୟତିକ୍ରମଧର୍ମୀ ନୂଆଁଖାଇ ଭେଟଘାଟ୍ କାର୍ଯ୍ୟକ୍ରମର ଆୟୋଜନ କରିବାକୁ ଯାଉଛି। ସ୍ଥାନୀୟ ବିଜୁ ପଟ୍ଟନାୟକ ଟାଉନହଲଠାରେ ଅନୁଷ୍ଠିତ ହେବାକୁଥିବା ଏହି କାର୍ଯ୍ୟକ୍ରମର ମୁଖ୍ୟ ଆକର୍ଷଣ ହେଉଛନ୍ତି ବିଭିନ୍ନ ବୃଦ୍ଧାଶ୍ରମରୁ ଆସିଥିବା ଅନ୍ତେବାସୀ।
ଘର ପରିବାରଠାରୁ ଦୂରରେ ରହୁଥିବା ଏହି ବୟସ୍କ ମା’ବାପାମାନଙ୍କ ମୁହଁରେ ହସ ଫୁଟାଇବା ଏବଂ ସେମାନଙ୍କୁ ନୂଆଁଖାଇର ପରିବାରିକ ପରିବେଶ ଅନୁଭବ କରାଇବା ଏହି ଉତ୍ସବର ମୂଳ ଲକ୍ଷ୍ୟ ବୋଲି ଟ୍ରଷ୍ଟର ମୁଖ୍ୟ ସୁବ୍ରତ କୁମାର ବିର୍ତ୍ତିଆ ସୂଚନା ଦେଇଛନ୍ତି। ଟ୍ରଷ୍ଟ ପକ୍ଷରୁ ସେମାନଙ୍କ ସ୍ୱାଗତ ଏବଂ ମନୋରଞ୍ଜନ ପାଇଁ ବ୍ୟାପକ ପ୍ରସ୍ତୁତି କରାଯାଇଛି।
ପ୍ରତିଭା ସମ୍ମାନ ଏବଂ ସାଂସ୍କୃତିକ କାର୍ଯ୍ୟକ୍ରମର ମହକ
ଏହି ଭେଟଘାଟ୍ କାର୍ଯ୍ୟକ୍ରମକୁ ଅଧିକ ରଙ୍ଗଦାର ଓ ଆକର୍ଷଣୀୟ କରିବା ପାଇଁ ବିଭିନ୍ନ ଅନୁଷ୍ଠାନ ପକ୍ଷରୁ ରଙ୍ଗାବରଙ୍ଗୀ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯିବ। ଏଥିରେ ବିଶେଷ ଆକର୍ଷଣ ସାଜିବ ପଦ୍ମପୁରର ପ୍ରସିଦ୍ଧ ‘ଏକ ଟଙ୍କିଆ ସଂଗୀତ ବିଦ୍ୟାଳୟ’ର ପ୍ରତିଭାବାନ ଛାତ୍ରଛାତ୍ରୀମାନଙ୍କ ଦ୍ବାରା ପରିବେଷିତ ହେବାକୁ ଥିବା ମନୋଜ୍ଞ ନୃତ୍ୟାନୁଷ୍ଠାନ।
ଏହାସହିତ ସମାଜର ବିଭିନ୍ନ କ୍ଷେତ୍ରରେ ଉଲ୍ଲେଖନୀୟ ଅବଦାନ ରଖିଥିବା ପ୍ରତିଭାମାନଙ୍କୁ ଏହି ମଞ୍ଚରେ ସମ୍ମାନିତ କରାଯିବ, ଯାହାକି ଉତ୍ସବର ମହତ୍ତ୍ୱକୁ ଆହୁରି ବଢ଼ାଇଦେବ ବୋଲି ଶ୍ରୀ ବିର୍ତ୍ତିଆ ମତପ୍ରକାଶ କରିଛନ୍ତି। ଏହି ନିଆରା ପ୍ରୟାସ ବରଗଡ଼ ସହରରେ ଏକ ଭିନ୍ନ ବାତାବରଣ ସୃଷ୍ଟି କରିଥିବାବେଳେ ସମାଜର ପ୍ରତ୍ୟେକ ବର୍ଗର ଲୋକଙ୍କୁ ଏହି ଉତ୍ସବରେ ସାମିଲ ହେବାକୁ ଆୟୋଜକଙ୍କ ପକ୍ଷରୁ ଅନୁରୋଧ କରାଯାଇଛି।