ସାଙ୍ଗକୁ ଛୁରିରେ ଆକ୍ରମଣ କରି ଲହୁଲୁହାଣ କରି ପକାଇଲା ସାଙ୍ଗ। ଏଭଳି ଅଭାବନୀୟ ଘଟଣା ଘଟିଛି ମୋରଡ଼ା ଥାନା ଅଧୀନ ମୋରଡ଼ା ପଞ୍ଚାୟତ ସନ୍ୟାସୀ ଗ୍ରାମରେ। ଏହି ଗ୍ରାମର ଲୋଧା ସମ୍ପ୍ରଦାୟର ଯୁବକ କନ୍ଦା ବାସ୍କେ ଓ ତାଙ୍କ ସାଙ୍ଗ ସାଇବା କାଳନ୍ଦୀ ସ୍ଥାନୀୟ ଏକ ହାଣ୍ଡିଆ ଦୋକାନକୁ ଯାଇ ହାଣ୍ଡିଆ ପିଇଥିଲେ। ସେଠାରୁ ଫେରିବା ପରେ କୌଣସି କାରଣରୁ ଉଭୟଙ୍କ ମଧ୍ୟରେ ବଚସା ହୋଇଥିଲା। ଝଗଡ଼ା ଏତେ ଉଗ୍ର ରୂପ ନେଲା ଯେ, ସାଇବାଙ୍କୁ ଛୁରିରେ ଆକ୍ରମଣ କରିଥିଲେ କନ୍ଦା। ଛୁରି ମାଡ଼ରେ ସାଇବାଙ୍କ ଅନ୍ତବୁଜୁଳା ବାହାରି ଆସିଥିଲା।
ଏହି କାଣ୍ଡ ଘଟାଇ ସେଠାରୁ ଚମ୍ପଟ ମାରିଥିଲେ କନ୍ଦା। ସାଇବାଙ୍କୁ ତାଙ୍କ ପରିବାର ଲୋକେ ଗୁରୁତର ଅବସ୍ଥାରେ ଉଦ୍ଧାର କରି ବାରିପଦା ପିଆର୍ଏମ୍ ମେଡିକାଲ୍ରେ ଭର୍ତ୍ତି କରିଥିଲେ। ସାଇବାଙ୍କ ଅବସ୍ଥା ସଂକଟାପନ୍ନ ଥିବାରୁ ତାଙ୍କୁ ତୁରନ୍ତ ରକ୍ତର ଆବଶ୍ୟକ ଥିଲା। ଖବର ପାଇ ଯୁବ ସମାଜସେବୀ ଅମୀର ଖାନ ପହଞ୍ଚି ରକ୍ତଦାନ କରିଛନ୍ତି। ପୁଲିସ ୩୮୨/୨୨ରେ ଏକ ମାମଲା ରୁଜୁ କରି କନ୍ଦାଙ୍କୁ ଅଟକ ରଖି ପଚାରୁଚୁରା କରୁଛି। ଏଥିସହ ସାଇଣ୍ଟିଫିକ୍ ଟିମ୍ ପହଞ୍ଚି ପ୍ରମାଣ ଯୋଗାଡ଼ କରିଥିବା ସୂଚନା ଦେଇଛନ୍ତି ମୋରଡ଼ା ଥାନା ଅଧିକାରୀ ପଦ୍ମଲୋଚନ ପାଣିଗ୍ରାହୀ।