ବେଦାନ୍ତ ଆଲୁମିନିୟମ ମେଟାଲ ଲିମିଟେଡ ଝାରସୁଗୁଡ଼ାରେ ପଶୁ ସ୍ୱାସ୍ଥ୍ୟ ଶିବିର ଆୟୋଜନ କରି ୪୦୦ରୁ ଅଧିକ ଗୃହପାଳିତ ପଶୁଙ୍କୁ ଚିକିତ୍ସା ସେବା ଯୋଗାଇଛି

ଝାରସୁଗୁଡ଼ା, ୧୫/୧୧: ଭାରତର ସର୍ବବୃହତ୍ ଆଲୁମିନିୟମ ଉତ୍ପାଦକ ବେଦାନ୍ତ ଆଲୁମିନିୟମ ପକ୍ଷରୁ ଝାରସୁଗୁଡ଼ା ଜିଲ୍ଲାର ବେହେରାପାଲି, ପଣ୍ଡରିପଥର, କୁରେବଗା ଓ କଟିକେଲା ଗ୍ରାମରେ ପର୍ଯ୍ୟାୟକ୍ରମେ ପଶୁ ସ୍ୱାସ୍ଥ୍ୟ ଶିବିର ଆୟୋଜନ କରାଯାଇଛି। ଏହି ଶିବିର ମାଧ୍ୟମରେ ପ୍ରାୟ ୪୦୦ଟି ଗୃହପାଳିତ ପଶୁଙ୍କୁ ପ୍ରାଣୀ ଚିକିତ୍ସା ସେବା ଯୋଗାଇ ଦିଆଯାଇଥିବାବେଳେ ୫୦ରୁ ଅଧିକ ଚାଷୀ ଉପକୃତ ହୋଇଛନ୍ତି। ଗ୍ରାମାଞ୍ଚଳର ପରିବାରଗୁଡ଼ିକର ଜୀବିକାର ଏକ ପ୍ରମୁଖ ଆଧାର ହୋଇଥିବା ପଶୁସମ୍ପଦର ସୁରକ୍ଷା ଏବଂ ସମୟୋପଯୋଗୀ ଚିକିତ୍ସା ସେବା ଉପଲବ୍ଧ କରାଇବା ଏହି ପଦକ୍ଷେପର ମୁଖ୍ୟ ଉଦ୍ଦେଶ୍ୟ।

ପଶୁପାଳକମାନଙ୍କ ନିକଟରେ ଆବଶ୍ୟକ ପ୍ରାଣୀ ଚିକିତ୍ସା ସେବା ପହଞ୍ଚାଇବା ସହ ପଶୁମାନଙ୍କ ସ୍ୱାସ୍ଥ୍ୟ, ଉତ୍ପାଦନ କ୍ଷମତା ଓ ଗ୍ରାମୀଣ ଜୀବିକାର ଉନ୍ନତି ଉପରେ ଏହି ଶିବିରଗୁଡ଼ିକରେ ଗୁରୁତ୍ୱ ଦିଆଯାଇଥିଲା। ଏଥିରେ ସାଧାରଣ ଶ୍ୱାସଜନିତ ରୋଗ ସମେତ ବିଭିନ୍ନ ପଶୁ ସ୍ୱାସ୍ଥ୍ୟ ସମସ୍ୟାର ଚିକିତ୍ସା କରାଯିବା ସହ ଆବଶ୍ୟକ ଔଷଧ, ଇଞ୍ଜେକ୍ସନ, ଖଣିଜ ମିଶ୍ରଣ ଓ କୃମିନାଶକ ସେବା ଯୋଗାଇ ଦିଆଯାଇଥିଲା। ଏଥିସହ ପଶୁମାନଙ୍କୁ ସନ୍ତୁଳିତ ଖାଦ୍ୟ, ଖଣିଜ ପଦାର୍ଥର ଆବଶ୍ୟକତା ଏବଂ ରୋଗ ପ୍ରତିରୋଧକ ଯତ୍ନ ସମ୍ପର୍କରେ ଚାଷୀମାନଙ୍କୁ ବ୍ୟବହାରିକ ପରାମର୍ଶ ମଧ୍ୟ ପ୍ରଦାନ କରାଯାଇଥିଲା।

ଏହି ଶିବିରରେ ଝାରସୁଗୁଡ଼ାର ଉପନିର୍ଦ୍ଦେଶକ, ପ୍ରାଣୀ ଚିକିତ୍ସା ଓ ପଶୁପାଳନ ବିଭାଗ (ଡିଡିଭିଏଚ୍) ଡାକ୍ତର ସୁଧାଂଶୁ ଶେଖରଙ୍କ ସମେତ ସରକାରୀ ପଶୁଧନ ନିରୀକ୍ଷକ, କୃତ୍ରିମ ପ୍ରଜନନ ବୈଷୟିକ କର୍ମଚାରୀ ଏବଂ ଭାରତୀୟ କୃଷି ଶିଳ୍ପ ପ୍ରତିଷ୍ଠାନ (ବାଇଫ୍‌)ର ବିଶେଷଜ୍ଞମାନେ ଉପସ୍ଥିତ ଥିଲେ। ପ୍ରାଣୀ ଚିକିତ୍ସା ଦଳ ପଶୁମାନଙ୍କର ସ୍ୱାସ୍ଥ୍ୟ ପରୀକ୍ଷା କରିବା ସହ ଔଷଧ ପ୍ରଦାନ କରିଥିଲେ ଏବଂ ପଶୁମାନଙ୍କ ସୁସ୍ଥତା ଓ ଉତ୍ପାଦନ ବୃଦ୍ଧି ପାଇଁ ବୈଜ୍ଞାନିକ ପଦ୍ଧତିରେ ପଶୁପାଳନ ସମ୍ପର୍କରେ ଚାଷୀମାନଙ୍କୁ ପରାମର୍ଶ ଦେଇଥିଲେ।

ଏହି ପଦକ୍ଷେପ ସମ୍ପର୍କରେ ବେଦାନ୍ତ ଆଲୁମିନିୟମ, ଝାରସୁଗୁଡ଼ାର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ସି. ଚନ୍ଦ୍ରୁ କହିଛନ୍ତି, “ଗ୍ରାମାଞ୍ଚଳର ଅନେକ ପରିବାର ପାଇଁ ପଶୁସମ୍ପଦ ଆୟ ଓ ଆର୍ଥିକ ସୁରକ୍ଷାର ଏକ ଗୁରୁତ୍ୱପୂର୍ଣ୍ଣ ଉତ୍ସ। ପଶୁମାନଙ୍କର ସାମାନ୍ୟ ସ୍ୱାସ୍ଥ୍ୟ ସମସ୍ୟା ମଧ୍ୟ ସେମାନଙ୍କ ଉତ୍ପାଦନ କ୍ଷମତାକୁ ପ୍ରଭାବିତ କରିବା ସହ ପରିବାର ଉପରେ ଅତିରିକ୍ତ ଆର୍ଥିକ ବୋଝ ପକାଇଥାଏ। ତେଣୁ ପଶୁମାନଙ୍କ ସ୍ୱାସ୍ଥ୍ୟର ଯତ୍ନ ନେବା ଅର୍ଥ ଗ୍ରାମୀଣ ଜୀବିକା ଓ କୃଷକ ପରିବାରର ମଙ୍ଗଳକୁ ସୁଦୃଢ଼ କରିବା। ଏଭଳି ପଦକ୍ଷେପ ମାଧ୍ୟମରେ ଆମେ ଗ୍ରାମୀଣ ସମୁଦାୟର ସାମଗ୍ରିକ ବିକାଶକୁ ସହଯୋଗ କରିବା ସହ ଦୀର୍ଘମିଆଦୀ ଓ ସ୍ଥାୟୀ ପ୍ରଗତିର ସୁଯୋଗ ସୃଷ୍ଟି କରିବାକୁ ଲକ୍ଷ୍ୟ ରଖିଛୁ।”

କଟିକେଲା ଗ୍ରାମର ପଶୁପାଳକ ଦୀନମଣି ପ୍ରଧାନ ନିଜ ଅନୁଭୂତି ବାଣ୍ଟି କହିଛନ୍ତି, “ଆମ ପରିବାରର ଆୟର ଏକ ଗୁରୁତ୍ୱପୂର୍ଣ୍ଣ ଉତ୍ସ ହେଉଛି ଆମର ପାଳିତ ପଶୁ। ତେଣୁ ସେମାନଙ୍କୁ ସୁସ୍ଥ ରଖିବା ଆମ ପାଇଁ ବେଶ୍ ଗୁରୁତ୍ୱପୂର୍ଣ୍ଣ। ଏହି ଶିବିର ଯୋଗୁଁ ଘର ପାଖରେ ଆମକୁ ପ୍ରାଣୀ ଚିକିତ୍ସା ସେବା ମିଳିପାରିଲା। ଏଥିସହ ପଶୁମାନଙ୍କ ଖାଦ୍ୟ ଓ ରୋଗ ପ୍ରତିରୋଧକ ଯତ୍ନ ସମ୍ପର୍କରେ ମୂଲ୍ୟବାନ ପରାମର୍ଶ ମିଳିଛି, ଯାହା ବର୍ଷସାରା ଆମ ପଶୁମାନଙ୍କର ଉତ୍ତମ ଯତ୍ନ ନେବାରେ ସହାୟକ ହେବ।”

ଗ୍ରାମୀଣ ସମୁଦାୟରେ କୃଷି ଓ ଏହାର ସହଯୋଗୀ ଜୀବିକାକୁ ସୁଦୃଢ଼ କରିବା ପାଇଁ ବେଦାନ୍ତ ଆଲୁମିନିୟମର ନିରନ୍ତର ପ୍ରୟାସର ଏକ ଅଂଶ ହେଉଛି ଏହି କାର୍ଯ୍ୟକ୍ରମ। କମ୍ପାନୀର ‘ପ୍ରକଳ୍ପ ବେଦଗ୍ରାମ’ ଅଧୀନରେ କୃଷି ବିକାଶ ଓ ପଶୁପାଳନ ସମ୍ପର୍କିତ ବିଭିନ୍ନ ପଦକ୍ଷେପ ମାଧ୍ୟମରେ ୧,୦୦୦ରୁ ଅଧିକ ଚାଷୀ ଓ ଗ୍ରାମୀଣ ପରିବାର ଉପକୃତ ହୋଇଛନ୍ତି। ଏଥିରେ ସ୍ଥାୟୀ କୃଷି, ପଶୁସମ୍ପଦର ବିକାଶ, ଜଳ ସଂରକ୍ଷଣ ଏବଂ ଜୀବିକାର ବିବିଧୀକରଣ ଭଳି କାର୍ଯ୍ୟକ୍ରମ ସାମିଲ ରହିଛି।

ଏହା ସହିତ ଶିକ୍ଷା, ସ୍ୱାସ୍ଥ୍ୟସେବା, ସ୍ଥାୟୀ ଜୀବିକା, ମହିଳା ସଶକ୍ତୀକରଣ, ଦକ୍ଷତା ବିକାଶ ଓ ଗ୍ରାମୀଣ ଭିତ୍ତିଭୂମିର ଉନ୍ନତି ଭଳି ବିଭିନ୍ନ ସାମାଜିକ ବିକାଶ କାର୍ଯ୍ୟକ୍ରମ ମାଧ୍ୟମରେ ୨୦୨୫-୨୬ ଆର୍ଥିକ ବର୍ଷରେ କମ୍ପାନୀ ବାର୍ଷିକ ୧୦ ଲକ୍ଷରୁ ଅଧିକ ଲୋକଙ୍କ ଜୀବନକୁ ସକାରାତ୍ମକ ଭାବେ ପ୍ରଭାବିତ କରିଛି।