ଖଣି, ଶିଳ୍ପ ଓ ଭିତ୍ତିଭୂମି କ୍ଷେତ୍ରର ପଞ୍ଚମ ଅନ୍ତର୍ଜାତୀୟ ସମ୍ମିଳନୀ ଓ ପ୍ରଦର୍ଶନୀ-୨୦୨୭ ଆୟୋଜନ କରିବ ଓଡ଼ିଶା
ଉପମୁଖ୍ୟମନ୍ତ୍ରୀ ଶ୍ରୀ କେ.ଭି. ସିଂହଦେଓଙ୍କ ଦ୍ୱାରା ସମ୍ମିଳନୀ ବ୍ରୋସିଓର ଉନ୍ମୋଚିତ
ବିଶ୍ୱସ୍ତରୀୟ ଖଣି ସମ୍ମିଳନୀ ଓ ଶିଳ୍ପ ଆଲୋଚନାର ଏକ ପ୍ରମୁଖ କେନ୍ଦ୍ର ଭାବେ ଓଡ଼ିଶାକୁ ପ୍ରତିଷ୍ଠିତ କରିବା ଲକ୍ଷ୍ୟ
ଭୁବନେଶ୍ୱର, ୨୦/୧୧: ଭାରତର ଅନ୍ୟତମ ଖଣିଜ ସମ୍ପଦରେ ସମୃଦ୍ଧ ରାଜ୍ୟ ତଥା ଦେଶର ଖଣି ଓ ଧାତୁ ଶିଳ୍ପର ଏକ ପ୍ରମୁଖ କେନ୍ଦ୍ର ଭାବେ ପରିଚିତ ଓଡ଼ିଶା, ଦେଶର ରେୟାର ଆର୍ଥ କରିଡରର ଏକ ପ୍ରମୁଖ ଅଂଶୀଦାର ମଧ୍ୟ। ଏହି ପରିପ୍ରେକ୍ଷୀରେ ଓଡ଼ିଶା ୫ମ ଖଣି, ଶିଳ୍ପ ଓ ଭିତ୍ତିଭୂମି ଅନ୍ତର୍ଜାତୀୟ ସମ୍ମିଳନୀ ଓ ପ୍ରଦର୍ଶନୀ-୨୦୨୭ ଆୟୋଜନ ପାଇଁ ପ୍ରସ୍ତୁତ ହେଉଛି। ଏହି ସମ୍ମିଳନୀ ୨୦୨୭ ଜାନୁଆରୀ ୭ରୁ ୧୦ ତାରିଖ ପର୍ଯ୍ୟନ୍ତ ଭୁବନେଶ୍ୱରର ବରମୁଣ୍ଡା ପଡ଼ିଆରେ ଆୟୋଜିତ ହେବ।
ଏହି ଅନ୍ତର୍ଜାତୀୟ ପ୍ରଦର୍ଶନୀରେ ଭାରତ ଓ ବିଦେଶରୁ ପ୍ରାୟ ୩୦୦ଟି କମ୍ପାନୀ ଯୋଗଦେବାର ସମ୍ଭାବନା ରହିଛି। ଏଥିରେ ପ୍ରୋପେଲ୍, ସାନି, ଭଲଭୋ, ଟାଟା ହିଟାଚି, ବିଇଏମ୍ଏଲ୍, ଆଇଆରଇଏଲ୍, ସିଆଇଏଲ୍, ଏଚ୍ଏଏଲ୍, ଏମ୍ସିଏଲ୍, ଏନ୍ସିଏଲ୍, ଏଚ୍ପିସିଏଲ୍, ଡୋନାଲ୍ଡସନ୍ ଇଣ୍ଡିଆ, ହେଲଷ୍ଟୋନ୍ ଇନୋଭେସନ୍ ଓ କ୍ୟୁଗ୍ରୀନ୍ ଟେକ୍ନୋ ଭଳି ପ୍ରମୁଖ ଖଣି ଓ ଯନ୍ତ୍ରପାତି ନିର୍ମାତା କମ୍ପାନୀମାନେ ସାମିଲ ହେବେ।
୨୦ ନଭେମ୍ବର ୨୦୨୬ରେ ମାନ୍ୟବର ଉପମୁଖ୍ୟମନ୍ତ୍ରୀ ଶ୍ରୀ କେ.ଭି. ସିଂହଦେଓ ଏହି ସମ୍ମିଳନୀର ବ୍ରୋସିଓର ଉନ୍ମୋଚନ କରିଥିଲେ। ଏହି ଅବସରରେ ଶିଳ୍ପ ଜଗତର ବହୁ ବିଶିଷ୍ଟ ବ୍ୟକ୍ତି ଯଥା ଡଃ ତପନ ଚାନ୍ଦ, ପୂର୍ବତନ ସିଏମ୍ଡି, ନାଲକୋ; ଶ୍ରୀ ଗଜାନନ କାଲେ, ସିଇଓ, ଟିପିସିଓଡିଏଲ୍; ସ୍ୱାମୀ ପ୍ରେମ ଅନ୍ୱେଷୀ, ସିଇଓ, ଫ୍ୟୁଚରେକ୍ସ; ଶ୍ରୀ ମଳୟ ପାଢ଼ୀ, ଅଧ୍ୟକ୍ଷ, ନିଫ୍ଟ; ଶ୍ରୀମତୀ ଜୟଶ୍ରୀ ମହାନ୍ତି, ଏମ୍ଡି, ଲୁମିନସ୍ ଇନଫୋ ଏବଂ ଶ୍ରୀ ସୁଧାଂଶୁ ମହାନ୍ତି, ମୁଖ୍ୟ ମହାପ୍ରବନ୍ଧକ, ଓସଗାଲ୍ ଉପସ୍ଥିତ ଥିଲେ।
ଓଡ଼ିଶାକୁ ଖଣି ସମ୍ମିଳନୀର ଏକ ପ୍ରମୁଖ କେନ୍ଦ୍ର ଭାବେ ପ୍ରତିଷ୍ଠା କରିବା ଦିଗରେ ଶିଳ୍ପ ବିଶେଷଜ୍ଞମାନଙ୍କ ପ୍ରୟାସକୁ ମାନ୍ୟବର ଉପମୁଖ୍ୟମନ୍ତ୍ରୀ ଉଚ୍ଚ ପ୍ରଶଂସା କରିଥିଲେ।
ଓଡ଼ିଶା ସରକାରଙ୍କ ଶିଳ୍ପ ପ୍ରୋତ୍ସାହନ ଓ ପୁଞ୍ଜିନିବେଶ ନିଗମ (IPICOL)ର ସହଯୋଗରେ ଆୟୋଜିତ ଏହି ଚାରିଦିନିଆ ଅନ୍ତର୍ଜାତୀୟ ସମ୍ମିଳନୀ ଓ ପ୍ରଦର୍ଶନୀରେ ଭାରତ ତଥା ବିଦେଶର ପ୍ରମୁଖ ଖଣି କମ୍ପାନୀ, ଖଣିଜ ଉତ୍ପାଦକ, ଭାରୀ ଯନ୍ତ୍ରପାତି ନିର୍ମାତା, ଇଞ୍ଜିନିୟରିଂ କମ୍ପାନୀ, ପ୍ରଯୁକ୍ତିବିଦ୍ୟା ପ୍ରଦାନକାରୀ, ଭିତ୍ତିଭୂମି ବିକାଶକାରୀ, ସରକାରୀ ସଂସ୍ଥା, ନିବେଶକ, ବିଶ୍ୱବିଦ୍ୟାଳୟ ଓ ଶିଳ୍ପ ବିଶେଷଜ୍ଞମାନେ ଏକତ୍ରିତ ହେବେ।
ପୂର୍ବରୁ ଆୟୋଜିତ ଚାରୋଟି ସଂସ୍କରଣର ସଫଳତା ଆଧାରରେ ପଞ୍ଚମ ସଂସ୍କରଣ ଓଡ଼ିଶାକୁ ଖଣି ସମ୍ବନ୍ଧୀୟ ସମ୍ମିଳନୀ, ପୁଞ୍ଜିନିବେଶ, ଅତ୍ୟାଧୁନିକ ଯନ୍ତ୍ରପାତି ଉତ୍ପାଦନ, ଖଣିଜ ପ୍ରକ୍ରିୟାକରଣ ପ୍ରଯୁକ୍ତିବିଦ୍ୟା ଏବଂ ଅନ୍ତର୍ଜାତୀୟ ଶିଳ୍ପ ସହଯୋଗର ଏକ ପସନ୍ଦଯୋଗ୍ୟ ଗନ୍ତବ୍ୟସ୍ଥଳ ଭାବେ ଆହୁରି ସୁଦୃଢ଼ କରିବାକୁ ଲକ୍ଷ୍ୟ ରଖିଛି।
ଦେଶ ବିକଶିତ ଭାରତ-୨୦୪୭’ର ସ୍ୱପ୍ନ ସାକାର କରିବା ଦିଗରେ ଆଗେଇ ଚାଲିଥିବା ବେଳେ ଭିତ୍ତିଭୂମି ସମ୍ପ୍ରସାରଣ, ଉତ୍ପାଦନ ଶିଳ୍ପର ବିକାଶ, ଶକ୍ତି ସୁରକ୍ଷା, ରଣନୈତିକ ଖଣିଜ ସମ୍ପଦର ବିକାଶ ଏବଂ ଶିଳ୍ପ କ୍ଷେତ୍ରରେ ଆତ୍ମନିର୍ଭରଶୀଳତା ହାସଲ କରିବାରେ ଖଣି ଓ ଖଣିଜ କ୍ଷେତ୍ରର ଗୁରୁତ୍ୱପୂର୍ଣ୍ଣ ଭୂମିକା ରହିବ। ଏହି ପ୍ରଦର୍ଶନୀ ଜାତୀୟ ବିକାଶର ଏହି ଲକ୍ଷ୍ୟକୁ ସାକାର କରିବାରେ ସହାୟକ ହେଉଥିବା ଅତ୍ୟାଧୁନିକ ପ୍ରଯୁକ୍ତି ଓ ସମାଧାନଗୁଡ଼ିକର ପ୍ରଦର୍ଶନ ପାଇଁ ଏକ ଗୁରୁତ୍ୱପୂର୍ଣ୍ଣ ମଞ୍ଚ ହେବ।
ଏହି ସଂସ୍କରଣରେ ରେୟାର ଆର୍ଥ ଓ କ୍ରିଟିକାଲ୍ ମିନେରାଲ୍ସ, ଖଣି ଉତ୍ତୋଳନ, ପ୍ରକ୍ରିୟାକରଣ ଏବଂ ମୂଲ୍ୟବୃଦ୍ଧି ଉପରେ ସ୍ୱତନ୍ତ୍ର ଗୁରୁତ୍ୱ ଦିଆଯିବ। ଭାରତର ରେୟାର ଆର୍ଥ କରିଡରର ଏକ ପ୍ରମୁଖ ଅଂଶୀଦାର ଭାବେ ଓଡ଼ିଶାର ଗୁରୁତ୍ୱକୁ ଦୃଷ୍ଟିରେ ରଖି, ଇଣ୍ଡିଆନ୍ ରେୟାର ଆର୍ଥ ଲିମିଟେଡ୍ (ଆଇଆରଇଏଲ୍)ର ସହଯୋଗରେ ଆୟୋଜିତ ଏହି ସମ୍ମିଳନୀ ଦେଶରେ ରେୟାର ଆର୍ଥ ଓ କ୍ରିଟିକାଲ୍ ମିନେରାଲ୍ସ କ୍ଷେତ୍ରରେ ଆତ୍ମନିର୍ଭରଶୀଳତାକୁ ଏକ ନୂତନ ଦିଗ ଦେବ।
୨୦୨୭ ସଂସ୍କରଣରେ ଆଲୋଚନାର ପ୍ରମୁଖ ବିଷୟବସ୍ତୁ:
ଖଣି କାର୍ଯ୍ୟରେ ଯାନ୍ତ୍ରିକୀକରଣ ଓ ସ୍ୱୟଂଚାଳନ ବ୍ୟବସ୍ଥା।
ଡିଜିଟାଲ୍ ମାଇନିଂ, କୃତ୍ରିମ ବୁଦ୍ଧିମତ୍ତା (AI) ଓ ସ୍ମାର୍ଟ ପ୍ରଯୁକ୍ତି।
ସ୍ଥାୟୀ ଓ ପରିବେଶ ଅନୁକୂଳ ଖଣି ପ୍ରଚଳନ।
ଖଣିଜ ସମୃଦ୍ଧିକରଣ ଓ ଅତ୍ୟାଧୁନିକ ପ୍ରକ୍ରିୟାକରଣ ପ୍ରଯୁକ୍ତି।
ଖଣି ସୁରକ୍ଷା, ଶ୍ରମିକଙ୍କ ସୁରକ୍ଷା ଓ କାର୍ଯ୍ୟକ୍ଷମତା ବୃଦ୍ଧି।
ବିଦ୍ୟୁତ୍ ଚାଳିତ ଓ ଶକ୍ତି-ଦକ୍ଷ ଖଣି ଯନ୍ତ୍ରପାତି।
କ୍ରିଟିକାଲ୍ ମିନେରାଲ୍ସ ଓ ରଣନୈତିକ ଖଣିଜ ସମ୍ପଦର ବିକାଶ।
ବର୍ଜ୍ୟବସ୍ତୁ ପରିଚାଳନା, ଖଣି ପୁନରୁଦ୍ଧାର ଓ ପରିବେଶ ନିରୀକ୍ଷଣ।
ଫ୍ୟୁଚରେକ୍ସ ଗ୍ରୁପ୍ର ଅଧ୍ୟକ୍ଷ ସ୍ୱାମୀ ପ୍ରେମ ଅନ୍ୱେଷୀ କହିଛନ୍ତି:
“ଗତ ଚାରୋଟି ସଂସ୍କରଣ ମଧ୍ୟରେ ଓଡ଼ିଶା ମାଇନିଂ, ଇଣ୍ଡଷ୍ଟ୍ରି ଆଣ୍ଡ ଇନ୍ଫ୍ରାଷ୍ଟ୍ରକ୍ଚର ଇଣ୍ଟରନ୍ୟାସନାଲ୍ କନକ୍ଲେଭ୍ ଆଣ୍ଡ ଏକ୍ସପୋ ଖଣି ଓ ଭିତ୍ତିଭୂମି ଶିଳ୍ପ ପାଇଁ ଏକ ଗୁରୁତ୍ୱପୂର୍ଣ୍ଣ ମଞ୍ଚ ଭାବେ ବିକଶିତ ହୋଇଛି। ପଞ୍ଚମ ସଂସ୍କରଣ ଆମର ଏହି ଯାତ୍ରାର ଆଉ ଏକ ମହତ୍ତ୍ୱପୂର୍ଣ୍ଣ ମାଇଲଖୁଣ୍ଟ। ବିଶ୍ୱସ୍ତରୀୟ ଖଣି ପ୍ରଯୁକ୍ତିବିଦ୍ୟା, ଶିଳ୍ପ ପୁଞ୍ଜିନିବେଶ ଓ ବ୍ୟବସାୟିକ ସହଯୋଗ ପାଇଁ ଓଡ଼ିଶାକୁ ଏକ ପସନ୍ଦଯୋଗ୍ୟ ଗନ୍ତବ୍ୟସ୍ଥଳ ଭାବେ ପ୍ରତିଷ୍ଠା କରିବା ଆମର ଲକ୍ଷ୍ୟ।”
ଡଃ ତପନ କୁମାର ଚାନ୍ଦ, ପୂର୍ବତନ ସିଏମ୍ଡି, ନାଲକୋ ଏବଂ ନିର୍ଦ୍ଦେଶକ, ବେଦାନ୍ତ ଲିମିଟେଡ୍ ତଥା ଏକ୍ସପୋ ଆୟୋଜନ କମିଟିର ଅଧ୍ୟକ୍ଷ କହିଛନ୍ତି:
“ଓଡ଼ିଶାରେ କେବଳ ଖଣିଜ ଉତ୍ତୋଳନ ନୁହେଁ, ବରଂ ଖଣିଜ ପଦାର୍ଥର ମୂଲ୍ୟବୃଦ୍ଧି, ପ୍ରକ୍ରିୟାକରଣ, ଖଣି ଯନ୍ତ୍ରପାତି ନିର୍ମାଣ ଏବଂ ଏହାର ଅନୁବନ୍ଧିତ ଶିଳ୍ପ କ୍ଷେତ୍ରରେ ଅପାର ସମ୍ଭାବନା ରହିଛି। ଖଣି ଓ ଖଣିଜ ଶିଳ୍ପ ପାଇଁ ଓଡ଼ିଶା ଏକ ଚିନ୍ତନ କେନ୍ଦ୍ର (Think Tank)ର ମୁଖ୍ୟାଳୟ ଭାବେ ମଧ୍ୟ ପ୍ରତିଷ୍ଠିତ ହୋଇପାରିବ।
ଖଣି କ୍ଷେତ୍ର ଅଧିକ ଯାନ୍ତ୍ରିକୀକରଣ, ଡିଜିଟାଲୀକରଣ ଓ ପରିବେଶଗତ ସ୍ଥାୟୀତ୍ୱ ଦିଗରେ ଅଗ୍ରସର ହେଉଥିବା ବେଳେ ଏଭଳି ପ୍ରଦର୍ଶନୀ ଓ ସମ୍ମିଳନୀ ଅତ୍ୟାଧୁନିକ ପ୍ରଯୁକ୍ତିର ଉପଯୋଗକୁ ତ୍ୱରାନ୍ୱିତ କରିବା ସହ ଭାରତର ଶିଳ୍ପ କ୍ଷମତାକୁ ଆହୁରି ସୁଦୃଢ଼ କରିବ। ୨୦୨୭ ଜାନୁଆରୀ ୭ରୁ ୧୦ ତାରିଖ ପର୍ଯ୍ୟନ୍ତ ଭୁବନେଶ୍ୱରରେ ଆୟୋଜିତ ଏହି ପଞ୍ଚମ ସଂସ୍କରଣରେ ଖଣି ଶିଳ୍ପ ସହ ଜଡ଼ିତ ବ୍ୟକ୍ତିବିଶେଷ, ଯନ୍ତ୍ରପାତି ନିର୍ମାତା, ନିବେଶକ, ଶିଳ୍ପ ଜଗତର ନେତୃବୃନ୍ଦ ଓ ଅନ୍ତର୍ଜାତୀୟ ପ୍ରତିନିଧିମାନଙ୍କୁ ସ୍ୱାଗତ କରିବାକୁ ଆମେ ଉପସ୍ଥିତ ରହିବୁ।”