ସେମି-ହାଇ ସ୍ପିଡ୍ ଟ୍ରେନ୍ ବନ୍ଦେ ଭାରତ ଏକ୍ସପ୍ରେସ ଯାତ୍ରୀମାନଙ୍କ ପ୍ରଥମ ପସନ୍ଦ ପାଲଟିଛି | ବର୍ତ୍ତମାନ ବନ୍ଦେ ଭାରତ ଏକ୍ସପ୍ରେସ ଟ୍ରେନଗୁଡିକ ୧୦ଟି ରୁଟରେ ପ୍ରାୟ ପୂର୍ଣ୍ଣ କ୍ଷମତାରେ ଚାଲୁଥିବାବେଳେ ସେପଟେ ସାଂସଦମାନଙ୍କ ମଧ୍ୟରେ ବନ୍ଦେ ଭାରତକୁ ନେଇ କ୍ରେଜ ବଢ଼ିବାରେ ଲାଗିଛି। ପ୍ରାୟ ୬୦ ଜଣ ସାଂସଦ ଭାରତୀୟ ରେଳବାଇକୁ ନିଜ ନିର୍ବାଚନମଣ୍ଡଳୀରେ ଏହି ଟ୍ରେନ୍ ଚଳାଇବାକୁ ଅନୁରୋଧ କରିଛନ୍ତି। ଏହି ସାଂସଦମାନଙ୍କ ମଧ୍ୟରୁ ୧୪ ଜଣ ଅଣ ଏନଡିଏ ଦଳର ହୋଇଥିବାବେଳେ ଅନ୍ୟମାନେ ବିଜେପି ସାଂସଦ ଅଛନ୍ତି । ସାଂସଦଙ୍କ ବ୍ୟତୀତ ମହାରାଷ୍ଟ୍ରର ଉପ-ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍ ମଧ୍ୟ ସୋଲାପୁର ଏବଂ ମୁମ୍ବାଇ ମଧ୍ୟରେ ଟ୍ରେନ୍ ଚଳାଇବାକୁ ଦାବି କରିଛନ୍ତି। କେନ୍ଦ୍ର ସଂସଦୀୟ ବ୍ୟାପାର ମନ୍ତ୍ରୀ ପ୍ରହ୍ଲାଦ ଯୋଶୀ ଧରୱାଡରୁ ବାଙ୍ଗାଲୋର ପର୍ଯ୍ୟନ୍ତ ବନ୍ଦେ ଭାରତ ଟ୍ରେନ୍ ଏବଂ ଗ୍ୱାଲିଅର୍ ପାଇଁ ବେସାମରିକ ବିମାନ ଚଳାଚଳ ମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆ ଅନୁରୋଧ କରିଛନ୍ତି।
