ବରଗଡ଼ରେ ଆଉ ଏକ ମାଲବାହୀ ଟ୍ରେନ୍ ଲାଇନଚ୍ୟୁତ

ବରଗଡ଼ : ଓଡ଼ିଶାରେ ଗତ କିଛି ଦିନ ତଳେ ସାରା ବିଶ୍ୱକୁ ଦୋହଲାଇ ଦେବା ଭଳି ଏକ ଟ୍ରେନ୍ ଲାଇନଚ୍ୟୁତ ହୋଇଥିବା ଘଟଣା ମନରୁ ନ ଲିଭୁଣୁ ପୁଣି ବରଗଡ଼ ଜିଲ୍ଲାରେ ସୋମବାର ସକାଳେ ଆଉ ଏକ ଟ୍ରେନ୍ ଦୁର୍ଘଟଣା ଘଟିଛି। ଏକ ମାଲବାହୀ ଟ୍ରେନ ଲାଇନଚ୍ୟୁତ ହୋଇଥିବା ଜଣାପଡିଛି।

ମିଳିଥିବା ସୂଚନା ଅନୁଯାୟୀ, ବରଗଡ଼ ଜିଲ୍ଲା ମେଡାପାଲି ନିକଟରେ ଚୂନପଥର ବୋଝେଇ ମାଲବାହୀ ଟ୍ରେନ୍ ଲାଇନଚ୍ୟୁତ ହୋଇଛି। ମାଲବାହୀ ଟ୍ରେନଟି ଡୁଙ୍ଗୁରି ଚୂନପଥର ଖଣିରୁ ଚୂନପଥର ନେଇ ବରଗଡ଼ ଏସିସି ସିମେଣ୍ଟ କାରଖାନା ଅଭିମୁଖେ ଯାଉଥିଲା।
ଟ୍ରେନର ଚକା ଭାଙ୍ଗିଯିବାରୁ ଟ୍ରେନର ୫ଟି ବଗି ଓଲଟି ପଡ଼ିଥିବା ସୂଚନା ମିଳିଛି। ତେବେ ଏଥିରେ କେହି ମୃତାହତ ହୋଇନଥିବା ଜଣାପଡିଛି। ପୁଲିସ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛି।