କୋଇଲା ବୋଝେଇ ମାଲବାହୀ ଟ୍ରେନରେ ଲାଗିଲା ଅଗ୍ନିକାଣ୍ଡ

ବାଲେଶ୍ୱର: କୋଇଲା ବୋଝେଇ ମାଲବାହୀ ଟ୍ରେନରେ ଲାଗିଲା ଅଗ୍ନିକାଣ୍ଡ । ଆଜି ସକାଳେ ଦକ୍ଷିଣ-ପୂର୍ବ ରେଳବାଇ ଅଧୀନରେ ଥିବା ରୁପ୍ସା ରେଳ ଷ୍ଟେସନରେ ଏହି ଘଟଣା ଘଟିଛି । ପଶ୍ଚିମବଙ୍ଗରୁ ବାଲେଶ୍ୱର ଅଭିମୁଖେ ଯାଉଥିବା ମାଲବାହୀ ଟ୍ରେନ ଦୁଇଟି ଖରାପ ୱାଗନର ମରାମତି ପାଇଁ ଏକ ମାସରୁ ଅଧିକ ସମୟ ଧରି ରୁପ୍ସା ଷ୍ଟେସନରେ ଅଟକିଥିଲା । ଶୁକ୍ରବାର ରାତିରେ ଏକ ୱାଗନରୁ ଧୂଆଁ ବାହାରୁଥିବାର ଦେଖି ଷ୍ଟେସନ କର୍ମଚାରୀମାନେ ରେଳ କର୍ତୃପକ୍ଷଙ୍କୁ ଖବର ଦେଇଥିଲେ । ପରେ ନିଆଁକୁ ଆୟତ କରାଯାଇଥିଲା । କିନ୍ତୁ ଆଜି ସକାଳେ ପୁଣି ଆଉ ଥରେ ଧୁଆଁ ବଢିବାରୁ ଅଗ୍ନିଶମ ବାହିନୀକୁ ଖବର ଦିଆଯାଇଥିଲା । ଅଗ୍ନିଶମ ବାହିନୀ ପହଂଚି ନିଆଁକୁ ଆୟତ କରିଥିଲା । ତେବେ ପ୍ରଭାବିତ ୱାଗନରୁ ସମସ୍ତ କୋଇଲା ବାହାର କରାଯିବ ଏବଂ ପରିସ୍ଥିତି ନିୟନ୍ତ୍ରଣରେ ଅଛି ବୋଲି ଷ୍ଟେସନ ମ୍ୟାନେଜର କହିଛନ୍ତି ।