ଫିଲିପାଇନ୍ସ: ୧୨୦ ଯାତ୍ରୀ ବିଶିଷ୍ଟ ଜାହାଜରେ ଲାଗିଲା ନିଆଁ

ଫିଲିପାଇନ୍ସ: ଫିଲିପାଇନ୍ସର ବୋହୋଲ ଦ୍ୱୀପରେ ରବିବାର ୧୨୦ ଜଣ ଯାତ୍ରୀଙ୍କୁ ନେଇ ଯାଉଥିବା ଏକ ଜାହାଜରେ ନିଆଁ ଲାଗିଯାଇଥିବାର ଦେଖିବାକୁ ମିଳିଛି। ଜାହାଜଟି ଫିଲିପାଇନ୍ସ ଦ୍ୱୀପପୁଞ୍ଜ ସିକିଜୋର ଏବଂ ବୋହୋଲ ମଧ୍ୟରେ ଯାତ୍ରା କରୁଥିବା ବେଳେ ନିଆଁ ଲାଗିଯାଇଥିଲା। ତେଣୁ ଏଥିରେ ଥିବା ଲୋକଙ୍କୁ ଉଦ୍ଧାର କରିବା ଏବଂ ନିଆଁ ଲିଭାଇବା ପାଇଁ ତଟରକ୍ଷୀ ବାହିନୀର ଏକ ଜାହାଜ ନିୟୋଜିତ କରାଯାଇଛି।
ଫିଲିପାଇନ୍ସ ତଟରକ୍ଷୀ ବାହିନୀ ପକ୍ଷରୁ ଜାରି କରାଯାଇଥିବା ଫଟୋ ଓ ଭିଡିଓରେ ଦେଖିବାକୁ ମିଳିଛି ଯେ ଜାହାଜର ଗୋଟିଏ ପାର୍ଶ୍ୱରେ ଥିବା ଦୁଇଟି ଡେକରୁ ନିଆଁ ଓ କଳା ଧୂଆଁ ବାହାରୁଥିବା ବେଳେ ଅନ୍ୟ ଏକ ଜାହାଜରେ ଥିବା ତଟରକ୍ଷୀ ବାହିନୀର ଯବାନମାନେ ନିଆଁ ଲିଭାଇବାକୁ ଚେଷ୍ଟା କରିଥିଲେ।
ମିଳିଥିବା ସୂଚନା ଅନୁଯାୟୀ, ଜାହାଜରୁ ସମସ୍ତ ୧୨୦ ଜଣ ଯାତ୍ରୀ ଏବଂ କର୍ମଚାରୀଙ୍କୁ ସୁରକ୍ଷିତ ଭାବେ ବାହାର କରାଯିବା ସହ ଅଗ୍ନିକାଣ୍ଡକୁ ଆୟତ୍ତ କରାଯାଇଛି ଏବଂ କୌଣସି କ୍ଷୟକ୍ଷତି ହୋଇନାହିଁ।