ମୟୂରଭଞ୍ଜ: ମଣିଷର ଅର୍ଦ୍ଧଦଗ୍ଧ ମାଂସ ଖାଇଲା ମଣିଷ!

ମୟୂରଭଞ୍ଜ: ମଣିଷର ଅର୍ଦ୍ଧଦଗ୍ଧ ଶରୀର ମାଂସ ଖାଇଲା ମଣିଷ। ଏଭଳି ଏକ ଅଭାବନୀୟ ଘଟଣା ଘଟିଛି ମୟୂରଭଞ୍ଜ ଜିଲ୍ଲାର ବଡ଼ସାହି ଥାନା ଅନ୍ତର୍ଗତ ବନ୍ଧସାହି ଗ୍ରାମରେ। ଏ ନେଇ ଦୁଇ ଅଭିଯୁକ୍ତଙ୍କୁ ଗିରଫ କରାଯାଇଛି। ମୟୂରଭଞ୍ଜ ଜିଲ୍ଲା ଏକ ଶ୍ମଶାନରେ ଅର୍ଦ୍ଧଦଗ୍ଧ ମଣିଷ ମାଂସ ଖାଉଥିବା ବେଳେ ଦୁଇ ଜଣଙ୍କୁ ଗିରଫ କରାଯାଇଛି। ଏହି ଘଟଣାକୁ କେନ୍ଦ୍ର କରି ବଡ଼ସାହି ଥାନା ଅନ୍ତର୍ଗତ ବନ୍ଧସାହି ଗାଁ ଓ ଆଖପାଖ ଅଞ୍ଚଳରେ ଉତ୍ତେଜନା ପ୍ରକାଶ ପାଇଛି।

ମିଳିଥିବା ସୂଚନା ଅନୁଯାୟୀ, ବନ୍ଧସାହି ଗ୍ରାମର ମଧୁସ୍ମିତା ସିଂହ(୨୫) ମଙ୍ଗଳବାର ଅସୁସ୍ଥ ହୋଇ ନିକଟସ୍ଥ ଡାକ୍ତରଖାନାରେ ଭର୍ତ୍ତି ହୋଇଥିଲେ। ମଧୁସ୍ମିତାଙ୍କ ମୃତ୍ୟୁ ଘଟିବା ପରେ ଶବ ବ୍ୟବଚ୍ଛେଦ ପାଇଁ ବାରିପଦା ଡାକ୍ତରଖାନାକୁ ପଠାଯାଇଥିଲା। ପରେ ଶବ ସତ୍କାର ପାଇଁ ମଶାଣି ଗାଁକୁ ନିଆଯାଇଥିଲା। ଶବ ସତ୍କାର ସମୟରେ ବର୍ଷା ହେଉଥିବାରୁ ମୃତଦେହ ସମ୍ପୂର୍ଣ୍ଣ ଜଳି ନଥିଲା। ଏହା ଦେଖି ଜଣେ ବୟସ୍କ ବ୍ୟକ୍ତି ସନ୍ଦୋରମନ ସିଂ ମୃତଦେହକୁ ଏକ ପାତ୍ରରେ ଜାଳି ସାହାଯ୍ୟ କରିବେ ବୋଲି ପରାମର୍ଶ ଦେଇଥିଲେ। ମୃତକଙ୍କ ବାପାଙ୍କ ଠାରୁ ଅନୁମତି ପାଇବା ପରେ ସେ ଓ ଅନ୍ୟ ଜଣେ ଯୁବକ ଭୋରନ ସିଂ ମୃତଦେହର ଲିଭରକୁ ତିନି ଭାଗରେ କାଟି ନିଆଁ ଲଗାଇବା ପରିବର୍ତ୍ତେ ଅର୍ଦ୍ଧଦଗ୍ଧ ଅଂଶ ଖାଇବା ଆରମ୍ଭ କରିଥିଲେ। ଏହି ଘଟଣାରେ ଆଶ୍ଚର୍ଯ୍ୟ ହୋଇ ସ୍ଥାନୀୟ ଗ୍ରାମବାସୀ ଉଭୟ ଅଭିଯୁକ୍ତଙ୍କୁ ଧରି ପୁଲିସକୁ ଖବର ଦେବା ପୂର୍ବରୁ ମାଡ଼ ମାରିଥିଲେ। ସେମାନେ ପହଞ୍ଚିବା ପରେ ପୁଲିସ ଅଭିଯୁକ୍ତକୁ ଗିରଫ କରିବା ସହ ଉତ୍ତ୍ୟକ୍ତ ଗ୍ରାମବାସୀଙ୍କୁ ବୁଝାସୁଝା କରିଥିଲେ। ତେବେ ଅଭିଯୁକ୍ତଙ୍କୁ ଏ ସମ୍ପର୍କରେ ପଚାରିବାରୁ ସେ ନିଶାସକ୍ତ ଅବସ୍ଥାରେ ଏଭଳି କରିଛନ୍ତି ବୋଲି କହିଛନ୍ତି।