ଭୁବନେଶ୍ୱର, ୧୯/୮: ଫଟୋ କଥା କୁହେ। ହେଲେ କଥାକୁହା ଫଟୋ ସମସ୍ତେ ଉଠାଇ ପାରିବେ ନାହିଁ। ବାହାଘର ଫଟୋ ସୁଟ୍ ସହଜ। ହେଲେ ପେଶାଦାର ଫଟୋଗ୍ରାଫରଙ୍କ ଆଭିମୁଖ୍ୟ ନିଆରା ଥାଏ। ପେଶାଦାର ସାମ୍ବାଦିକମାନଙ୍କୁ ପ୍ରୋତ୍ସାହନ କରିବା ଦିଗରେ ରାଜ୍ୟ ସରକାର ନିଶ୍ଚିତ ଭାବେ ପଦକ୍ଷେପ ନେବେ। ନବୀନ ସୂତ୍ରଧର ଟ୍ରଷ୍ଟ ପକ୍ଷରୁ ଆୟୋଜିତ ତୃତୀୟ ରାଜ୍ୟସ୍ତରୀୟ ଫଟୋ ପ୍ରଦର୍ଶନୀ କାର୍ଯ୍ୟକ୍ରମରେ ଯୋଗଦେଇ ଏହା କହିଛନ୍ତି ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ମନ୍ତ୍ରୀ ସୂର୍ଯ୍ୟବଂଶୀ ସୂରଜ୍।
ମୁଖ୍ୟଅତିଥି ଭାବେ ଯୋଗଦେଇ ସୂରଜ କହିଲେ ଯେ, ଗୋଟିଏ ଗୋଟିଏ ଫଟୋ ସମାଜର ପ୍ରକୃତ ଚିତ୍ରକୁ ବଖାଣିଥାଏ। ଫଟୋଟିଏ ଅନେକ ମନକୁ ଆନ୍ଦୋଳିତ କରିପାରେ। ଅତୀତରେ ଗୋଟିଏ ଫଟୋ ସାରା ବିଶ୍ୱରେ ବି ଆଲୋଡ଼ନ ସୃଷ୍ଟି କରିବାର ନଜିର ରହିଛି। ପେଶାଦାର ଫଟୋଗ୍ରାଫି ଏକ କଳା। ଏହାକୁ ପ୍ରୋତ୍ସାହିତ କରିବାର ଆବଶ୍ୟକତା ରହିଛି। ବିଶ୍ୱ ଫଟୋଗ୍ରାଫି ଦିବସ ଅବସରରେ ସେ ଏହି ଦାୟିତ୍ୱ ନେବାକୁ ଚାହୁଁଛନ୍ତି। ନିଶ୍ଚିତ ଭାବେ ରାଜ୍ୟ ସରକାରଙ୍କ ପକ୍ଷରୁ ଏନେଇ କିଛି ପଦକ୍ଷେପ ନିଆଯିବ ବୋଲି ସେ ପ୍ରତିଶ୍ରୁତି ଦେଇଥିଲେ।
ସେହିପରି ଉତ୍ସବର ଅନ୍ୟତମ ଆକର୍ଷଣ ପଦ୍ମଶ୍ରୀ ସୁଦର୍ଶନ ପଟ୍ଟନାୟକ ଫଟୋ କିଭଳି ତାଙ୍କୁ ବିଦେଶରେ ଏକ ଅପ୍ରୀତିକର ସ୍ଥିତିରୁ ରକ୍ଷା କରିଥିଲା ସେ ନେଇ କହିଥିଲେ। ବାଲୁକା କଳା ଆରମ୍ଭ କାଳରେ ସେ ଫଟୋଟିଏ ସାଇତି ରଖିବାର ବ୍ୟାକୁଳତା କଥା ବି ମନେ ପକାଇଥିଲେ। ରାଜ୍ୟ ସରକାରଙ୍କ ଲଳିତ କଳା ଏକାଡେମୀ ପକ୍ଷରୁ ସରକାରୀ ସ୍ତରରେ ବିଭିନ୍ନ ଫଟୋ ପ୍ରଦର୍ଶନୀ ଆୟୋଜନ ପାଇଁ ୧୫ ଲକ୍ଷ ଟଙ୍କାର ବ୍ୟୟ ଅଟକଳ ରହିଥିବା ସେ ପ୍ରକାଶ କରିଛନ୍ତି। ଏଦିଗରେ ଖୁବଶୀଘ୍ର ପଦକ୍ଷେପ ନିଆଯିବ ବୋଲି ସେ କହିଥିଲେ। ଅନ୍ୟମାନଙ୍କ ମଧ୍ୟରେ ବିଶିଷ୍ଟ କଳା, ସଂସ୍କୃତି ଓ ଐତିହ୍ୟ ଗବେଷକ ଶ୍ରୀ ଅନିଲ ଧୀର, ଐତିହ୍ୟ ଓ ସଂସ୍କୃତି ଗବେଷକ ପ୍ରଫେସର ସଞ୍ଜୟ ଆଚାର୍ଯ୍ୟ, ଶିଳ୍ପପତି ତଥା ଉତ୍କଳ ଚାମ୍ବର ଅଫ କମର୍ସ ର ସଭାପତି ଶ୍ରୀ ତାରିଣୀ ପ୍ରସାଦ ମହାନ୍ତି, ପ୍ରଗତିବାଦୀ ଖବର କାଗଜ ର ସମ୍ପାଦକ ବିରୁପାକ୍ଷ ତ୍ରିପାଠୀ, ଯୁବ ସାମ୍ବାଦିକ ରାମଚଣ୍ଡୀ ରଣସିଂହ ପ୍ରମୁଖ ଯୋଗ ଦେଇ ଅନୁଷ୍ଠାନର କାର୍ଯ୍ୟକୁ ପ୍ରଶଂସା କରିବା ସହ ସରକାର କିଭଳି ଭାବେ ଫଟୋଗ୍ରାଫର ମାନଙ୍କୁ ବିଭିନ୍ନ କ୍ଷେତ୍ରରେ ସାହାଯ୍ୟ ଓ ସହଯୋଗ କରିବା ଆବଶ୍ୟକ ତାହା ଉଲ୍ଲେଖ କରିଥିଲେ। ଏହି ଅବସରରେ ଅନୁଷ୍ଠାନ ପକ୍ଷରୁ ବିଭିନ୍ନ କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ଖାସ କରି ଫଟୋଗ୍ରାଫି ଓ ଫଟୋଗ୍ରାଫରଙ୍କ ପ୍ରତି ଭଲପାଇବା ପାଇଁ ୧୦ ଜଣ ବ୍ୟକ୍ତି ବିଶେଷ ଯଥା :ସୁଧି ରଞ୍ଜନ ମିଶ୍ର, ଶୈଳେନ୍ଦ୍ର ଜେନା, ପ୍ରତାପ ପ୍ରଧାନ, ବୈଲୋଚନ ସାହୁ, ବାଳକୃଷ୍ଣ ରାଉତ, ମିହିର କୁମାର ରାଉତ, ଅଭିଷେକ ଯୋଶୀ, ବସନ୍ତ ପରିଡା, ଦିପ୍ତୀରଞ୍ଜନ ପରିଡା ଓ ବିଶ୍ଵନାଥ ସ୍ୱାଇଁଙ୍କୁ ଫଟୋ ବନ୍ଧୁ ସମ୍ମାନ ରେ ସମ୍ମାନିତ କରାଯାଇଛି।
ସୂଚନାଯୋଗ୍ୟ କି ନବୀନ ସୂତ୍ରଧର ଟ୍ରଷ୍ଟ ପକ୍ଷରୁ ବିଗତ ତିନି ବର୍ଷ ଧରି ବିଶ୍ୱ ଫଟୋଗ୍ରାଫି ଦିବସକୁ ବେଶ ଉତ୍ସାହର ସହ ପାଳନ କରାଯାଉଛି। ତତ୍ ସହିତ ଏହି ଅବସରରେ ନବୀନ ସୂତ୍ରଧର ଟ୍ରଷ୍ଟ ପକ୍ଷରୁ ତୃତୀୟ ରାଜ୍ୟସ୍ତରୀୟ ଫଟୋ ପ୍ରଦର୍ଶନୀ ସ୍ଥାନୀୟ ଜୟଦେବ ଭଵନ ରେ ଆରମ୍ଭ ହୋଇଯାଇଛି। ଏଥିରେ ସାରା ରାଜ୍ୟରୁ ୭୦ରୁ ଉର୍ଦ୍ଧ୍ବ ପ୍ରତିଯୋଗୀ ଅଂଶଗ୍ରହଣ କରି ଫଟୋ ମାଧ୍ୟମରେ ସେମାନଙ୍କ କଳା ନୈପୂଣ୍ୟତା ପରିପ୍ରକାଶ କରିଛନ୍ତି।ଏହି ପ୍ରଦର୍ଶନୀ ଆସନ୍ତା ୨୨ ତାରିଖ ପର୍ଯ୍ୟନ୍ତ ସକାଳ ୯ ଟାରୁ ସନ୍ଧ୍ୟା ୮ ଘଟିକା ପର୍ଯ୍ୟନ୍ତ ଦର୍ଶକ ତଥା ଫଟୋପ୍ରେମୀ ଓ ଉତ୍ସାହୀ ଛାତ୍ରଛାତ୍ରୀଙ୍କ ପରିଦର୍ଶନ ପାଇଁ ଉନ୍ମୁକ୍ତ ରହିବ ବୋଲି ଅନୁଷ୍ଠାନର ଅଧକ୍ଷ ଲକ୍ଷ୍ମୀକାନ୍ତ ଦାସ ପ୍ରକାଶ କରିଛନ୍ତି।