ପୋଲିସ ହାତରେ ବିଖ୍ୟାତ ଲେଡି ଡନ୍ ଜୋୟା ଖାନ୍

୧ କୋଟି ମୂଲ୍ୟର ହେରୋଇନ ଜବତ

ନୂଆଦିଲ୍ଲୀ, ୨୧/୦୨: ଦିଲ୍ଲୀର ବିଖ୍ୟାତ ଗ୍ୟାଙ୍ଗଷ୍ଟର ହାସିମ ବାବାଙ୍କ ପତ୍ନୀ ତଥା ଲେଡି ଡନ୍ ଜୋୟା ଖାନଙ୍କୁ ଗିରଫ କରିଛି ଦିଲ୍ଲୀ ପୋଲିସ। ତାଙ୍କ ନିକଟରୁ ପ୍ରାୟ ୧ କୋଟି ଟଙ୍କା ମୂଲ୍ୟର ୨୭୦ ଗ୍ରାମ ହେରୋଇନ୍ ଜବତ କରାଯାଇଛି।

ଗ୍ୟାଙ୍ଗଷ୍ଟର ହାସିମ ବାବା ତିହାର ଜେଲରେ ଅଛନ୍ତି। ତାଙ୍କ ବିରୋଧରେ ହତ୍ୟା, ଦାଦାବଟି ଏବଂ ଅସ୍ତ୍ରଶସ୍ତ୍ର ଚୋରା କାରବାର ଭଳି ଏକାଧିକ ମାମଲା ରହିଛି। ହାସିମ ବାବାଙ୍କ ତୃତୀୟ ପତ୍ନୀ ଜୋୟା ୨୦୧୭ରେ ପ୍ରଥମ ସ୍ୱାମୀଙ୍କୁ ଛାଡ଼ପତ୍ର ଦେବା ପରେ ତାଙ୍କୁ ବିବାହ କରିଥିଲେ। ଜେଲରେ ଥିବାରୁ ହାସିମ ବାବାଙ୍କ ଅପରାଧିକ ସାମ୍ରାଜ୍ୟକୁ ପରିଚାଳନା କରୁଥିଲେ ୩୩ ବର୍ଷୀୟା ଜୋୟା ଖାନ। ଜୋୟା ଜେଲ୍ ବାହାରୁ ଏହି ଗ୍ୟାଙ୍ଗ୍ ର କାର୍ଯ୍ୟକଳାପ ତଦାରଖ କରୁଥିଲେ। ଦାଦାବଟି ଆଦାୟ ଓ ଅନ୍ୟାନ୍ୟ ଅପରାଧରେ ସାହାଯ୍ୟ କରୁଥିଲେ।

ଜୋୟା ଖାନ ବିଭିନ୍ନ ହାଇ ପ୍ରୋଫାଇଲ୍ ପାର୍ଟିରେ ଯୋଗ ଦେବା ସହ ନିୟମିତ ଜେଲରେ ହାସିନ ବାବାଙ୍କୁ ଦେଖା କରୁଥିଲେ। ସେ ନିଶା ଦ୍ରବ୍ୟ ଚୋରା ଚାଲାଣ ସହ ଦାଦାବଟି ଆଦାୟରେ ସମ୍ପୃକ୍ତ ଥିଲେ।