ଢାକା, ୧୬/୧୧: ବାଂଲାଦେଶର ବହିଷ୍କୃତ ପ୍ରଧାନମନ୍ତ୍ରୀ ଶେଖ ହସିନାଙ୍କୁ ନେଇ ବଡ଼ ଶୁଣାଣି ହେବାକୁ ଯାଉଛି। ଆଗାମୀ ୨୪ ଘଣ୍ଟା ମଧ୍ୟରେ ତାଙ୍କ ଜୀବନକୁ ନେଇ ବଡ଼ ନିଷ୍ପତ୍ତି ନିଆଯିବ। ଏହା ପୂର୍ବରୁ ବାଂଲାଦେଶରେ ଉତ୍ତେଜନା ପ୍ରକାଶ ପାଇଛି।
ବାଂଲାଦେଶର ୟୁନୁସ୍ ସରକାର କୋର୍ଟରୁ ଶେଖ ହସିନାଙ୍କ ପାଇଁ ମୃତ୍ୟୁଦଣ୍ଡ ଦାବି କରିଛନ୍ତି। ଏପରି ପରିସ୍ଥିତିରେ, ଯଦି କୋର୍ଟ ତାଙ୍କୁ ମୃତ୍ୟୁଦଣ୍ଡ ଦିଅନ୍ତି, ତେବେ ଦେଶର ସୁରକ୍ଷା ବ୍ୟବସ୍ଥା ଆହୁରି ଖରାପ ହୋଇପାରେ। ଏହାକୁ ଦୃଷ୍ଟିରେ ରଖି, ୟୁନୁସ୍ ସରକାର ୨୪ ଘଣ୍ଟା ପୂର୍ବରୁ ଦେଶର ସୁରକ୍ଷା ସଂସ୍ଥାଗୁଡ଼ିକୁ ହାଇ ଆଲର୍ଟ ଜାରି କରିଛନ୍ତି ଏବଂ ସମ୍ବେଦନଶୀଳ ସ୍ଥାନଗୁଡ଼ିକରେ ସୁରକ୍ଷା ବୃଦ୍ଧି କରାଯାଇଛି।
ସୋମବାର ପୂର୍ବତନ ପ୍ରଧାନମନ୍ତ୍ରୀ ଶେଖ୍ ହାସିନାଙ୍କ ବିରୋଧରେ ଏକ ସ୍ୱତନ୍ତ୍ର ଟ୍ରିବ୍ୟୁନାଲ୍ ଏକ ବଡ଼ ରାୟ ଦେବାକୁ ଯାଉଛି। ଏହି ମାମଲା ଗତ ବର୍ଷ ସରକାର ବିରୋଧୀ ପ୍ରତିବାଦ ସମୟରେ ହୋଇଥିବା ମାନବତା ବିରୋଧୀ ଅପରାଧ ସହିତ ଜଡିତ। ପୂର୍ବ ବର୍ଷର ଘଟଣା ପାଇଁ ଶେଖ୍ ହାସିନା ଏବଂ ତାଙ୍କ ଦଳ ଦାୟୀ ବୋଲି ଅଭିଯୋଗ କରାଯାଇଛି।
ହସିନାଙ୍କ ବ୍ୟତୀତ, ପୂର୍ବତନ ଗୃହମନ୍ତ୍ରୀ ଅସଦୁଜ୍ଜମାନ ଖାନ କମଲ ଏବଂ ତତ୍କାଳୀନ ପୋଲିସ ମହାନିର୍ଦ୍ଦେଶକ (ଆଇଜିପି) ଚୌଧୁରୀ ଅବଦୁଲ୍ଲା ଅଲ-ମାମୁନଙ୍କ ବିରୁଦ୍ଧରେ ଅଭିଯୋଗ ଆସିଛି। ସେମାନଙ୍କ ବିରୁଦ୍ଧରେ ହତ୍ୟା, ହତ୍ୟା ଉଦ୍ୟମ, ନିର୍ଯାତନା ଏବଂ ଅନ୍ୟାନ୍ୟ ଅମାନବୀୟ କାର୍ଯ୍ୟର ଅଭିଯୋଗ ଥିଲା। ସେମାନଙ୍କୁ ଏକ ଟ୍ରିବ୍ୟୁନାଲ ସମ୍ମୁଖରେ ବିଚାର କରାଯାଇଥିଲା। ପୂର୍ବତନ ପ୍ରଧାନମନ୍ତ୍ରୀ ଏବଂ କମଲଙ୍କୁ ସେମାନଙ୍କ ଅନୁପସ୍ଥିତିରେ ବିଚାର କରାଯାଇଥିଲା, କୋର୍ଟ ସେମାନଙ୍କୁ ପଳାତକ ଘୋଷଣା କରିଥିଲେ।
ହସିନାଙ୍କ ବିରୋଧରେ ମାମଲାର ଶୁଣାଣିରେ ପୂର୍ବତନ ପୋଲିସ ମହାନିର୍ଦ୍ଦେଶକ ଚୌଧୁରୀ ଅବଦୁଲ୍ଲା ଅଲ-ମାମୁନଙ୍କ ବିରୋଧରେ ଅଭିଯୋଗ ଆସିଥିଲେ ମଧ୍ୟ ସେ ଏବେ ସରକାରୀ ସାକ୍ଷୀ ପାଲଟିଛନ୍ତି।
ଜାତିସଂଘ ମାନବାଧିକାର କାର୍ଯ୍ୟାଳୟର ଏକ ରିପୋର୍ଟ ଅନୁଯାୟୀ, ଗତ ବର୍ଷ ଜୁଲାଇ ୧୫ ରୁ ଅଗଷ୍ଟ ୧୫ ମଧ୍ୟରେ (ଜୁଲାଇ ବିଦ୍ରୋହ) ପ୍ରଦର୍ଶନକାରୀଙ୍କ ଉପରେ ହସିନା ସରକାରଙ୍କ ଦ୍ୱାରା କାର୍ଯ୍ୟାନୁଷ୍ଠାନ ନିର୍ଦ୍ଦେଶ ଦିଆଯିବା ପରେ ୧୪୦୦ ଜଣ ଲୋକ ପ୍ରାଣ ହରାଇଥିଲେ।
ମୁଖ୍ୟ ପବ୍ଲିକ ପ୍ରସିକ୍ୟୁଟର ମହମ୍ମଦ ତାଜୁଲ ଇସଲାମ ହସିନାଙ୍କ ପାଇଁ ମୃତ୍ୟୁଦଣ୍ଡ ଆବେଦନ କରିଛନ୍ତି। ସେ ଅଭିଯୋଗ କରିଛନ୍ତି ଯେ ସେ ଗତ ବର୍ଷର ପ୍ରତିବାଦ ସମୟରେ ମାନବତା ବିରୋଧୀ ଅପରାଧର “ମୁଖ୍ୟ ଅଭିଯୁକ୍ତ ଏବଂ ମୁଖ୍ୟ ଅପରାଧୀ” ଥିଲେ ହସିନା। କିନ୍ତୁ ହସିନାଙ୍କ ସମର୍ଥକମାନେ କହିଛନ୍ତି ଯେ ତାଙ୍କ ବିରୁଦ୍ଧରେ ଅଭିଯୋଗ ରାଜନୈତିକ ଭାବରେ ପ୍ରେରିତ।
୫ ଅଗଷ୍ଟ ୨୦୨୪ ରେ ହସିନାଙ୍କ ଆୱାମୀ ଲିଗ୍ ସରକାର କ୍ଷମତାଚ୍ୟୁତ ହେବା ପରେ ବାଂଲାଦେଶ ଛାଡି ବର୍ତ୍ତମାନ ଭାରତରେ ରହୁଛନ୍ତି ଶେଖ୍ ହସିନା। କମଲ ମଧ୍ୟ ପଡ଼ୋଶୀ ଦେଶରେ ଆଶ୍ରୟ ନେଇଥିବା ଜଣାପଡ଼ିଛି।
ସେପଟେ ମହମ୍ମଦ ୟୁନୁସଙ୍କ ନେତୃତ୍ୱାଧୀନ ଅନ୍ତରୀଣ ସରକାର ହସିନାଙ୍କ ପ୍ରତ୍ୟର୍ପଣ ପାଇଁ ଆବେଦନ କରିଛନ୍ତି, କିନ୍ତୁ ଭାରତ ଏପର୍ଯ୍ୟନ୍ତ କିଛି ଉତ୍ତର ଦେଇନାହିଁ।