ଧର୍ମଶାଳା, ୦୨/୦୧: ହିମାଚଳ ପ୍ରଦେଶର ଧର୍ମଶାଳାର ଏକ ସରକାରୀ କଲେଜର ଜଣେ ଛାତ୍ରୀଙ୍କ ମୃତ୍ୟୁ ଘଟଣା ସାରା ଦେଶରେ ଆଲୋଡ଼ନ ସୃଷ୍ଟି କରିଛି। ତିନି ଜଣ ଛାତ୍ରୀ ଏବଂ ଜଣେ ପ୍ରଫେସରଙ୍କ ବିରୋଧରେ ରାଗିଂ ଏବଂ ଯୌନ ନିର୍ଯାତନା ଅଭିଯୋଗ କରିଛନ୍ତି। ଏହା ମଧ୍ୟ ଅଭିଯୋଗ କରାଯାଇଛି ଯେ ତାଙ୍କୁ କେବଳ ରାଗିଂ କରାଯାଇ ନଥିଲା ବରଂ ମାଡ଼ ମଧ୍ୟ ଦିଆଯାଇଥିଲା। ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଥିଲା। ମୃତ୍ୟୁ ପୂର୍ବରୁ ଛାତ୍ରୀ ଜଣକ ହସ୍ପିଟାଲରେ ଏକ ମୋବାଇଲ୍ ଭିଡିଓ ରେକର୍ଡ କରିଥିଲେ, ଯେଉଁଥିରେ ସମ୍ପୂର୍ଣ୍ଣ ଘଟଣା ବିଷୟରେ ବର୍ଣ୍ଣନା କରିଥିଲେ।
ମୃତ ଛାତ୍ରୀ ଜଣକ କହିଛନ୍ତି ଯେ ତାଙ୍କୁ ମାନସିକ ଏବଂ ଯୌନ ନିର୍ଯାତନା ଦିଆଯାଇଥିଲା ଏବଂ ନିର୍ଯାତନା ବିରୁଦ୍ଧରେ କାହାକୁ ନ କହିବାକୁ ଧମକ ଦିଆଯାଇଥିଲା। ପୋଲିସ କହିଛି ଯେ ପୀଡିତାଙ୍କର ଲୁଧିଆନାର ଏକ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ୨୦୨୫ ଡିସେମ୍ବର ୨୬ ରେ ମୃତ୍ୟୁ ହୋଇଥିଲା। କିନ୍ତୁ ଗୁରୁବାର ମାମଲା ରୁଜୁ ହୋଇଥିଲା। ମୃତ ଛାତ୍ରୀଙ୍କ ବାପା ଏକ ଅଭିଯୋଗ ଦାଖଲ କରିଥିଲେ, ଯାହା ପରେ ଏହି ଘଟଣା ସବୁ ବାହାରକୁ ଆସିଥିଲା। କଲେଜ ପ୍ରଶାସନ କହିଛି ଯେ ଛାତ୍ରୀ ଜଣକ ପ୍ରଥମ ବର୍ଷରେ ଫେଲ୍ ହୋଇଥିଲେ କିନ୍ତୁ ଦ୍ୱିତୀୟ ବର୍ଷରେ ନାମ ଲେଖାଇଥିଲେ।
ମୃତ ଛାତ୍ରୀଙ୍କ ପିତା ଏକ ଅଭିଯୋଗ ଦାଖଲ କରିଥିଲେ ଯେ ୧୮ ସେପ୍ଟେମ୍ବର, ୨୦୨୫ ରେ ତିନି ଜଣ ସିନିୟର ଛାତ୍ରୀ ତାଙ୍କ ଝିଅକୁ ଆକ୍ରମଣ କରିଥିଲେ ଏବଂ ପରେ ଚୁପ୍ ରହିବାକୁ ଧମକ ଦେଇଥିଲେ। ଜଣେ କଲେଜ ପ୍ରଫେସର ତାଙ୍କ ଝିଅକୁ ଅଶ୍ଳୀଳ ଇଙ୍ଗିତ କରିଥିଲେ ଏବଂ ଯୌନ ନିର୍ଯାତନା ଦେଇଥିଲେ। ଏହି ନିର୍ଯାତନା ପରେ ତାଙ୍କ ଝିଅକୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା ଏବଂ ଚିକିତ୍ସା ସମୟରେ ତାଙ୍କର ମୃତ୍ୟୁ ହୋଇଥିଲା।
ଡିସେମ୍ବର ୨୬ ତାରିଖରେ ଲୁଧିଆନାର ଡିଏମସି ହସ୍ପିଟାଲରେ ଚିକିତ୍ସାଧୀନ ଥିବା ବେଳେ ଝିଅଟି ମୃତ୍ୟୁ ପୂର୍ବରୁ ଅନେକ ହସ୍ପିଟାଲରେ ଭର୍ତ୍ତି ହୋଇଥିଲା। ପୋଲିସ ଅଧିକାରୀ ଅଶୋକ ରତନ କହିଛନ୍ତି ଯେ ଅଭିଯୁକ୍ତଙ୍କ ବିରୁଦ୍ଧରେ ଭାରତୀୟ ଦଣ୍ଡ ସଂହିତା (ଆଇବି)ର ଧାରା ୭୫, ୧୧୫(୨) ଏବଂ ହିମାଚଳ ପ୍ରଦେଶ ଶିକ୍ଷାନୁଷ୍ଠାନ (ରାଗିଂ ନିଷେଧ) ଆଇନର ଧାରା ୩ ଅନୁଯାୟୀ ମାମଲା ରୁଜୁ କରାଯାଇଛି ଏବଂ ତଦନ୍ତ ଆରମ୍ଭ କରାଯାଇଛି।