ଠିକ୍ ସମୟରେ ପହଞ୍ଚିଲାନି ପୋଲିସ, ହାତ କାଟି ବିଭତ୍ସ ହତ୍ୟା କଲେ ଖଣି ମାଫିଆ

ଓଡ଼ଙ୍ଗା, ୧୧/୦୫: ନୟାଗଡ଼ ଜିଲ୍ଲାର ଓଡ଼ଗାଁ ଥାନା ଅଞ୍ଚଳରେ ବେଆଇନ ଖଣି କାର୍ଯ୍ୟକୁ ବିରୋଧ କରିବାରୁ ପଥର ଖଣି ମାଫିଆଙ୍କ ଦ୍ୱାରା ଜଣେ ସ୍ଥାନୀୟ ବାସିନ୍ଦାଙ୍କୁ ନିର୍ମମ ଆକ୍ରମଣ କରାଯାଇ ହତ୍ୟା କରାଯାଇଛି। ମୃତକଙ୍କ ନାମ ଅଜିତ ସାହୁ, ସେ ଓଡଗାଁର ବିଜୟ ମଣ୍ଡପ ସାହିର ବାସିନ୍ଦା।

ରିପୋର୍ଟ ଅନୁଯାୟୀ, ଏହି ଅଞ୍ଚଳର ବିଭିନ୍ନ ସ୍ଥାନରେ ବେଆଇନ ପଥର ଖଣି ଚାଲୁଛି, ଯାହାକୁ ନେଇ ସ୍ଥାନୀୟ ବାସିନ୍ଦା ବାରମ୍ବାର ବିରୋଧ କରୁଛନ୍ତି। ଘଟଣା ଦିନ, କିଛି ବ୍ୟକ୍ତି କଡାଲି ବନ୍ଧରେ ପଥର ବୋଝେଇ ଯାନଗୁଡ଼ିକୁ ଅଟକାଇ ପିସିଆରକୁ ସୂଚନା ଦେଇଥିଲେ, କିନ୍ତୁ ପୋଲିସ ଘଟଣାସ୍ଥଳରେ ପହଞ୍ଚିନଥିଲା। ଏହି ସମୟରେ ପଥର ଖଣି ମାଫିଆମାନେ ପ୍ରତିଆକ୍ରମଣ କରିବା ସମୟରେ ଦୁଇଜଣ ବ୍ୟକ୍ତି ସେଠାରୁ ଖସି ପଳାଇବାରେ ସଫଳ ହୋଇଥିଲେ। କିନ୍ତୁ ଓଡଗାଁର ବିଜୟ ମଣ୍ଡପ ସାହିର ବାସିନ୍ଦା ଅଜିତ ସାହୁଙ୍କୁ ସେମାନେ ଅତ୍ୟନ୍ତ ନିର୍ମମ ଭାବରେ ହତ୍ୟା କରିଥିଲେ। ଦୁଇଟି ହାତକୁ କାଟି ଦେଇଥିଲେ।

ପ୍ରତ୍ୟକ୍ଷଦର୍ଶୀଙ୍କ ବୟାନ ଏବଂ ପ୍ରାରମ୍ଭିକ ସୂଚନା ଅନୁଯାୟୀ ଆକ୍ରମଣକାରୀମାନେ ଅଜିତ ସାହୁଙ୍କ ଉପରେ ଅତ୍ୟନ୍ତ ନିର୍ମମ ଭାବେ ଆକ୍ରମଣ କରିଥିଲେ। ତାଙ୍କ ବାମ ହାତ ସମ୍ପୂର୍ଣ୍ଣ କଟି ଯାଇଥିଲା, ଡାହାଣ ହାତର ବୁଢ଼ା ଆଙ୍ଗୁଠି ତଳୁ କାଟି ଦିଆଯାଇଥିଲା ଏବଂ ତାଙ୍କ ଶରୀରରେ ଅନେକ ଆଘାତ ଚିହ୍ନ ଥିଲା।

ହତ୍ୟାର ପ୍ରତିବାଦରେ ସ୍ଥାନୀୟ ଲୋକମାନେ ଅଜିତ ସାହୁଙ୍କୁ ତୁରନ୍ତ ନ୍ୟାୟ ଦାବି କରି ଓଡ଼ଗାଁ-ନୟାଗଡ଼ ରାସ୍ତା ଅବରୋଧ କରିଥିଲେ। ରାଜପଥରେ ଶହେରୁ ଅଧିକ ଯାନବାହନ ଅଟକି ରହିବା ସହିତ ଯାତାୟାତ ଠପ୍ ହୋଇଯାଇଥିଲା।

ଓଡଗାଁ ପୋଲିସ ଘଟଣାସ୍ଥଳରେ ପହଞ୍ଚି ହତ୍ୟାକାଣ୍ଡର ତଦନ୍ତ ଆରମ୍ଭ କରିଛି।