ନୂଆଦିଲ୍ଲୀ, ୩୧/୦୫: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ‘ମନ କି ବାତ୍’ର ୧୩୪ ତମ ସଂସ୍କରଣରେ ଦେଶବାସୀଙ୍କୁ ସମ୍ବୋଧିତ କରିଛନ୍ତି। ଏହି ଅବସରରେ ପ୍ରଧାନମନ୍ତ୍ରୀ ମୋଦି ଓଡ଼ିଶାର ବେଲପଣାକୁ ପ୍ରଶଂସା କରିଛନ୍ତି। ବେଲ ପଣା ସହ ଓଡ଼ିଶାର ସୁସ୍ବାଦୁ ଆମ୍ବକୁ ମଧ୍ୟ ପ୍ରଶଂସା କରିଛନ୍ତି। ଏଥି ସହ ଗ୍ରୀଷ୍ମ ପ୍ରବାହକୁ ନେଇ ସତର୍କ ରହିବାକୁ ପ୍ରଧାନମନ୍ତ୍ରୀଙ୍କ ପରାମର୍ଶ ଦେବା ସହ ଦେଶର ବିଭିନ୍ନ ସ୍ଥାନର ପାନୀୟକୁ ନେଇ ଆଲୋଚନା କରିଛନ୍ତି।
ପ୍ରଧାନମନ୍ତ୍ରୀ ମୋଦି କହିଛନ୍ତି, ଯେତେବେଳେ ଆପଣ ପଞ୍ଜାବ ଏବଂ ହରିୟାଣା ଯାଆନ୍ତି, ସେତେବେଳେ ଆପଣଙ୍କୁ ଲସି ପିଇବାର ସୁଯୋଗ ମିଳିଥାଏ। ରାଜସ୍ଥାନ ଏବଂ ଗୁଜରାଟରେ, ଚାସ୍ କିମ୍ବା ବଟରମିଲ୍କ, ପ୍ରତ୍ୟେକ ଖାଦ୍ୟର ଏକ ଅବିଚ୍ଛେଦ୍ୟ ଅଂଶ ହୋଇଥାଏ। ବିହାର, ଝାଡ଼ଖଣ୍ଡ ଏବଂ ପୂର୍ବ ଉତ୍ତର ପ୍ରଦେଶରେ, ଛତୁଆ ସରବତ ପିଇବାକୁ ମିଳିଥାଏ। ଏହି ପାନୀୟ ପେଟ ଭର୍ତ୍ତି କରିବା ସହ ଦୀର୍ଘ ସମୟ ପାଇଁ ଶକ୍ତି ଯୋଗାଇଥାଏ। କୋଙ୍କଣ ଏବଂ ଗୋଆରେ, କୋକମ୍ ସରବତ ଏବଂ ସୋଲକାଢି ଲୋକପ୍ରିୟ। ଦକ୍ଷିଣ ଭାରତରେ, ପନକମ୍, ନୀର ମୋର ଏବଂ ସାମ୍ବରର ସ୍ୱାଦ ନେଉଥିବା ବେଳେ, ଓଡ଼ିଶାରେ ବେଲ ପଣା ହେଉଛି ପ୍ରିୟ ଗ୍ରୀଷ୍ମ ପାନୀୟ,” ପ୍ରଧାନମନ୍ତ୍ରୀ ମୋଦି କହିଥିଲେ।
ସେହିପରି ପ୍ରଧାନମନ୍ତ୍ରୀ ମୋଦି ଆହୁରି କହିଥିଲେ ଯେ ଭାରତରେ ଖରାଦିନେ ସୁସ୍ୱାଦୁ ଆମ୍ବର ମଜା ନେବା ପାଇଁ ସମସ୍ତେ ଅପେକ୍ଷା କରିଥାନ୍ତି। ପ୍ରତ୍ୟେକ ଅଞ୍ଚଳର ନିଜସ୍ୱ ଆମ୍ବ, ନିଜସ୍ୱ ସ୍ୱାଦ, ନିଜସ୍ୱ ସୁଗନ୍ଧ ଅଛି। ମହାରାଷ୍ଟ୍ର ଏବଂ କୋଙ୍କଣର ହାପୁସ୍, ଆଲଫୋନ୍ସୋ, ଗୁଜୁରାଟର କେଶର, ଉତ୍ତର ପ୍ରଦେଶର ଦଶହରୀ ଏବଂ କାଶୀର ଲାଙ୍ଗରା। ତେବେ ଲାଙ୍ଗରା ଆମ୍ବରେ ଏକ ବିଶେଷ ଗୁଣ ଅଛି: ଏହା ପ୍ରାୟତଃ ପାଚିବା ପରେ ମଧ୍ୟ ସବୁଜ ରହିଥାଏ। ବିହାରର ଜରଡାଲୁ, ଯାହାର ସୁଗନ୍ଧ ଯୋଗୁଁ ଦୂରରୁ ଚିହ୍ନିହେବ। ଦକ୍ଷିଣ ଭାରତରେ ବାଇଗଣ ପଲେଇ, ତୋଟାପୁରୀ, ନୀଲମ, ମାଲଗୋଭା, ପଶ୍ଚିମବଙ୍ଗର ହିମସାଗର, ଓଡ଼ିଶା ଏବଂ ଆନ୍ଧ୍ର ପ୍ରଦେଶର ସୁବର୍ଣ୍ଣରେଖା ବହୁତ ସ୍ୱାଦିଷ୍ଟ। ସ୍ଥାନ ଅନୁସାରେ ଆମ୍ବର ରଙ୍ଗ ଓ ସ୍ୱାଦ ମଧ୍ୟ ଭିନ୍ନ ଥାଏ ବୋଲି କହିଛନ୍ତି ପ୍ରଧାନମନ୍ତ୍ରୀ।