କଲିକତା ହାଇକୋର୍ଟର ମୁଖ୍ୟ ବିଚାରପତି ଭାବେ ଶପଥ ଗ୍ରହଣ କଲେ ଜଷ୍ଟିସ୍ ରବିନ୍ଦ୍ର ବିଠଲରାଓ ଘୁଗେ

କଲିକତା, ୦୯/୦୯: କଲିକତା ହାଇକୋର୍ଟର ୪୫ତମ ମୁଖ୍ୟ ବିଚାରପତି ଭାବରେ ଶପଥ ଗ୍ରହଣ କରିଛନ୍ତି ଜଷ୍ଟିସ୍ ରବିନ୍ଦ୍ର ବିଠଲରାଓ ଘୁଗେ। ପଶ୍ଚିମବଙ୍ଗ ରାଜ୍ୟପାଳ ଆରଏନ ରବି ଜଷ୍ଟିସ୍ ରବିନ୍ଦ୍ର ବିଠଲରାଓ ଘୁଗେଙ୍କୁ ଶପଥ ପାଠ କରାଇଛନ୍ତି।

କୋର୍ଟ ପରିସରରେ ଆୟୋଜିତ ଏକ ଆନୁଷ୍ଠାନିକ ସମାରୋହରେ ଶପଥ ଗ୍ରହଣ ଉତ୍ସବ ଅନୁଷ୍ଠିତ ହୋଇଯାଇଛି। ଏହି ସମାରୋହରେ ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀ, ପଶ୍ଚିମବଙ୍ଗ ବିଧାନସଭା ବାଚସ୍ପତି ରଥିନ୍ଦ୍ର ବୋଷ ଏବଂ ରାଜ୍ୟ କ୍ୟାବିନେଟର ବରିଷ୍ଠ ସଦସ୍ୟମାନେ ଉପସ୍ଥିତ ଥିଲେ। ବିଭିନ୍ନ ହାଇକୋର୍ଟର ପୂର୍ବତନ ଏବଂ କାର୍ଯ୍ୟରତ ବିଚାରପତିମାନେ ମଧ୍ୟ ଶପଥ ଗ୍ରହଣ ଉତ୍ସବରେ ଯୋଗ ଦେଇଥିଲେ।

ଜଷ୍ଟିସ ଘୁଗେ ୧୯୯୦ ମସିହାରେ ଜଣେ ଓକିଲ ଭାବରେ ତାଙ୍କର ଆଇନଗତ କ୍ୟାରିଅର ଆରମ୍ଭ କରିଥିଲେ। ସେ ୨୦୦୫ ରୁ ୨୦୦୮ ପର୍ଯ୍ୟନ୍ତ ଡକ୍ଟର ବାବାସାହେବ ଆମ୍ବେଦକର ମରଠୱାଡା ବିଶ୍ୱବିଦ୍ୟାଳୟ (BAMU)ରେ PG LL.M ପାଠ୍ୟକ୍ରମର ପ୍ରଫେସର ଭାବରେ ମଧ୍ୟ କାର୍ଯ୍ୟ କରିଥିଲେ। ଜଷ୍ଟିସ୍ ଘୁଗେ ପାଞ୍ଚ ବର୍ଷ ପାଇଁ ଔରଙ୍ଗାବାଦର ବାର ଆସୋସିଏସନ ଅଫ୍ ଇଣ୍ଡଷ୍ଟ୍ରିଆଲ୍ ଲୟର୍ସର ସଚିବ ଏବଂ ଜୁଲାଇ ୨୦୧୦ ରୁ ଡିସେମ୍ବର ୨୦୧୧ ପର୍ଯ୍ୟନ୍ତ ଏହାର ସଭାପତି ଭାବରେ କାର୍ଯ୍ୟ କରିଥିଲେ।

ଜୁନ ୨୦୧୩ରେ ବମ୍ବେ ହାଇକୋର୍ଟର ଅତିରିକ୍ତ ବିଚାରପତି ଭାବରେ ନିଯୁକ୍ତି ହୋଇଥିଲେ। ସେ ମାର୍ଚ୍ଚ ୨୦୧୬ରେ ସେଠାରେ ସ୍ଥାୟୀ ବିଚାରପତି ହୋଇଥିଲେ। ଏହା ପରେ ଜୁନ୍ ୨୦୨୬ରେ ତାଙ୍କୁ ବମ୍ବେ ହାଇକୋର୍ଟର କାର୍ଯ୍ୟକାରୀ ମୁଖ୍ୟ ବିଚାରପତି ଭାବରେ ନିଯୁକ୍ତ କରାଯାଇଥିଲା।