ମୁଖ୍ୟମନ୍ତ୍ରୀଙ୍କ ୟୁଏଇ ଗସ୍ତ: ୧୪ ଏମଓୟୁ, ଆସିବ ୨.୧୦ ଲକ୍ଷ କୋଟି ନିବେଶ
ସୃଷ୍ଟି ହେବ ୮ ଲକ୍ଷ ୬୮ ହଜାର ନିଯୁକ୍ତି ସୁଯୋଗ
ଆବୁଧାବି, ୧୦/୦୯: ସଂଯୁକ୍ତ ଆରବ ଏମିରେଟ୍ସ (ୟୁଏଇ) ଗସ୍ତର ପ୍ରଥମ ଦିନରେ ଓଡ଼ିଶା ସରକାର ଅନ୍ତର୍ଜାତୀୟ ନିବେଶ ଓ ବାଣିଜ୍ୟିକ ସହଭାଗିତା କ୍ଷେତ୍ରରେ ଏକ ବଡ଼ ସଫଳତା ହାସଲ କରିଛନ୍ତି। ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ନେତୃତ୍ୱରେ ଆବୁଧାବି ଓ ଦୁବାଇଠାରେ ଆୟୋଜିତ ଏହି କାର୍ଯ୍ୟକ୍ରମରେ ୧୪ଟି ନୂତନ ପ୍ରକଳ୍ପ ପାଇଁ ବୁଝାମଣା ପତ୍ର (ଏମଓୟୁ) ସ୍ୱାକ୍ଷରିତ ହେବା ସହ ବନ୍ଦର, ବାଣିଜ୍ୟ ଓ ପେଟ୍ରୋକେମିକାଲ କ୍ଷେତ୍ରରେ ବ୍ୟାପକ ସହଯୋଗ ପାଇଁ ଆଲୋଚନା ହୋଇଛି।
ଆବୁଧାବିର ଇଣ୍ଟରନ୍ୟାସନାଲ ହୋଲ୍ଡିଂ କମ୍ପାନୀ (IHC) ଏବଂ ଆଦାନୀ ଗ୍ରୁପ୍ ସହିତ ଓଡ଼ିଶା ସରକାର ୧୪ଟି ନୂତନ ପ୍ରକଳ୍ପ ପାଇଁ MoU ସ୍ୱାକ୍ଷର କରିଛନ୍ତି। ଏହି ପ୍ରକଳ୍ପଗୁଡ଼ିକ ମାଧ୍ୟମରେ ପ୍ରାୟ ୨,୧୦,୫୦୦ କୋଟି ଟଙ୍କାର ଆନୁମାନିକ ପୁଞ୍ଜିନିବେଶ ହେବ ଏବଂ ପ୍ରାୟ ୮,୬୮,୨୦୦ ଜଣଙ୍କୁ ନିଯୁକ୍ତି ସୁଯୋଗ ମିଳିବ।
ଡାଉନ୍-ଷ୍ଟ୍ରିମ୍ ଧାତୁ ଶିଳ୍ପ, ସ୍ଲରୀ ପାଇପଲାଇନ୍, କ୍ରିଟିକାଲ ମିନେରାଲ୍ସ, ପେଟ୍ରୋକେମିକାଲ୍ସ, ଅକ୍ଷୟ ଶକ୍ତି ଉପକରଣ, ସ୍ୱାସ୍ଥ୍ୟସେବା, ଶିଳ୍ପ ଭିତ୍ତିଭୂମି, ପର୍ଯ୍ୟଟନ, ଦକ୍ଷତା ବିକାଶ ଓ କ୍ରୀଡ଼ା ଭିତ୍ତିଭୂମି ଉପରେ ଗୁରୁତ୍ବ ଦିଆଯାଇଛି।
ଇଣ୍ଡିଆନ୍ ବିଜନେସ୍ ଆଣ୍ଡ ପ୍ରୋଫେସନାଲ୍ ଗ୍ରୁପ୍ (IBPG) ସହିତ ଏକ ସହଯୋଗ ରାଜିନାମା ସ୍ୱାକ୍ଷରିତ ହୋଇଛି। ଓଡ଼ିଶାରୁ ହଳଦୀ, ଅଦା, ସୁଆଦିଆ ସାମୁଦ୍ରିକ ଖାଦ୍ୟ ଏବଂ ଅନ୍ୟାନ୍ୟ କୃଷିଜାତ ଦ୍ରବ୍ୟ UAE କୁ ରପ୍ତାନି କରିବା ସହ ଦକ୍ଷ ମାନବସମ୍ବଳ ନିୟୋଜନ ପାଇଁ ଆଲୋଚନା ହୋଇଛି।
ବୋରୁଜ୍ କମ୍ପାନୀର ସିଇଓ ହଜିମ୍ ସୁଲତାନ୍ ଅଲ୍ ସୁୱାଇଦୀଙ୍କ ସହ ମୁଖ୍ୟମନ୍ତ୍ରୀ ଆଲୋଚନା କରି ପାରାଦୀପରେ ଇଣ୍ଡିଆନ୍ ଅଏଲ୍ (IOCL) ର ନାପଥା କ୍ରାକର ପ୍ରକଳ୍ପ ସହ ଯୋଡ଼ି ହୋଇ ଏକ ବୃହତ୍ ରାସାୟନିକ ଡାଉନ୍-ଷ୍ଟ୍ରିମ୍ କମ୍ପ୍ଲେକ୍ସ ପ୍ରତିଷ୍ଠା ପାଇଁ ନିମନ୍ତ୍ରଣ କରିଛନ୍ତି ମୁଖ୍ୟମନ୍ତ୍ରୀ।
ୟୁଏଇର ନିବେଶକ ଓ ସଂସ୍ଥାଗୁଡ଼ିକୁ ଓଡ଼ିଶାର ବନ୍ଦର ଓ ସରକାରୀ-ପ୍ରାଇଭେଟ୍ ପାର୍ଟନରସିପ୍ ଭିତ୍ତିଭୂମି ପ୍ରକଳ୍ପରେ ଭାଗିଦାର ହେବାକୁ ମୁଖ୍ୟମନ୍ତ୍ରୀ ଆହ୍ୱାନ ଦେଇଛନ୍ତି।
ଏହି ଗସ୍ତ ‘ସମୃଦ୍ଧ ଓଡ଼ିଶା’ ଗଠନ ସହ ରାଜ୍ୟକୁ ବିଶ୍ୱସ୍ତରୀୟ ଶିଳ୍ପ ଓ ବାଣିଜ୍ୟିକ ହବ୍ରେ ପରିଣତ କରିବାରେ ଏକ ବଡ଼ ମାଇଲଖୁଣ୍ଟ ସାବ୍ୟସ୍ତ ହେବ।