ପାରିବାରିକ କଳହର କରୁଣ ପରିଣତି; ସ୍ତ୍ରୀକୁ ପିଟି ପିଟି ହତ୍ୟା କଲା ସ୍ୱାମୀ

ବାଲେଶ୍ୱର: ବାଲେଶ୍ୱର ଜିଲ୍ଲା ସୋରରେ ପାରିବାରିକ କଳହକୁ କେନ୍ଦ୍ର କରି ଜଣେ ସ୍ୱାମୀ ନିଜ ପତ୍ନୀଙ୍କୁ ପିଟି ପିଟି ହତ୍ୟା କରିଥିବା ଅଭିଯୋଗ ହୋଇଛି। ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି ବାଲେଶ୍ୱର ଜିଲ୍ଲା ଉପଡା ଥାନା ଅନ୍ତର୍ଗତ ଫତେପୁର ପଂଚାୟତର ପାଇକପଡ଼ା ଗାଁରେ। ମୃତମହିଳାଙ୍କ ନାମ ସରମିଳା ସିଂହ ହୋଇଥିବା ବେଳେ ଅଭିଯୁକ୍ତ ସ୍ୱାମୀଙ୍କ ନାମ ରାମଚନ୍ଦ୍ର ସିଂହ ବୋଲି ଜଣାପଡ଼ିଛି।
ମିଳିଥିବା ସୂଚନା ଅନୁଯାୟୀ, ଡ୍ରାଇଭର ଭାବେ କାମ କରୁଥିବା ରାମଚନ୍ଦ୍ର ଶନିବାର ଅପରାହ୍ନ ପ୍ରାୟ ୫ଟାରେ ଘରକୁ ଫେରିବା ପରେ ପତ୍ନୀଙ୍କ ସହ ତାଙ୍କର ଯୁକ୍ତିତର୍କ ହୋଇଥିଲା। ଯୁକ୍ତିତର୍କ ଉଗ୍ର ରୂପ ନେବାରୁ ରାମଚନ୍ଦ୍ର ଖଣ୍ଡା ଉଠାଇ ପତ୍ନୀଙ୍କୁ ଆକ୍ରମଣ କରିଥିଲେ। ଯେତେବେଳେ ତାଙ୍କ ପୁଅମାନେ ତାଙ୍କୁ ସେମାନଙ୍କ ମା’ଙ୍କୁ ଆକ୍ରମଣ କରିବାକୁ ବାରଣ କରିଥିଲେ ଏବଂ ରାମଚନ୍ଦ୍ରଙ୍କ ଠାରୁ ଖଣ୍ଡା ଛଡ଼ାଇ ନେଇଥିଲେ, ସେ ସେମାନଙ୍କୁ ଘରୁ ବାହାର କରିଦେଇଥିଲେ। ପରେ ସେ ଏକ କାଠ ଖୁଣ୍ଟ ଉଠାଇ ସରମିଳାଙ୍କୁ ନିର୍ମମ ଭାବେ ମାଡ଼ ମାରିବା ଆରମ୍ଭ କରିଥିଲେ। ଫଳରେ ସରମିଳାଙ୍କ ମୁଣ୍ଡରେ ଗଭୀର ଆଘାତ ଲାଗିବାରୁ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିଲା। ଏହି ଘଟଣା ସମ୍ପର୍କରେ ସ୍ଥାନୀୟ ଲୋକେ ଜାଣିବା ପରେ ପୁଲିସକୁ ଖବର ଦେଇଥିଲେ। ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି ଏବଂ ରାମଚନ୍ଦ୍ରଙ୍କୁ ଅଟକ ରଖି ଘଟଣାର ତଦନ୍ତ ଆରମ୍ଭ କରିଛି।