ଛାତ୍ରଙ୍କୁ କ୍ଲାସରୁମରେ ବନ୍ଦ କରିଦେଲେ ସ୍କୁଲ କର୍ତ୍ତୃପକ୍ଷ

ମୟୂରଭଞ୍ଜ: ବେତନଟୀ ବ୍ଲକ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟର ଜଣେ ତୃତୀୟ ଶ୍ରେଣୀ ଛାତ୍ରଙ୍କୁ ସ୍କୁଲ ଭିତରେ ବନ୍ଦ କରି ନିଜ ଘରକୁ ଚାଲିଯାଇଛନ୍ତି ସ୍କୁଲ କର୍ତ୍ତୃପକ୍ଷ। ଏଭଳି ଅଭାବନୀୟ ଘଟଣା ଘଟିଛି ମୟୂରଭଞ୍ଜ ଜିଲ୍ଲା ବୈଶିଙ୍ଗା ଥାନା ଅନ୍ତର୍ଗତ ସୈତପୁର ପଞ୍ଚାୟତର କୁରାଡ଼ିକା ଗ୍ରାମରେ।

ମିଳିଥିବା ସୂଚନା ଅନୁଯାୟୀ, ବସନ୍ତ ମହାନ୍ତିଙ୍କ ୮ ବର୍ଷର ପୁଅ କୃଷ୍ଣଚନ୍ଦ୍ର ମହାନ୍ତି ମଙ୍ଗଳବାର ତଳେ ପଡ଼ି ଆହତ ହୋଇଥିଲେ। ତାଙ୍କ ସାଙ୍ଗମାନେ ଅଚେତ କୃଷ୍ଣଚନ୍ଦ୍ରଙ୍କୁ ଉଠାଇ ଏକ ଖାଲି ଶ୍ରେଣୀ ଗୃହକୁ ସ୍ଥାନାନ୍ତର କରିଥିଲେ। ତେବେ ଅପରାହ୍ନ ୪ଟା ୧୦ରେ ସ୍କୁଲ ସରିବା ପରେ ସମସ୍ତେ ପିଲାଟିକୁ ଭୁଲି ଘରକୁ ଚାଲିଯାଇଥିଲେ।

କୃଷ୍ଣଚନ୍ଦ୍ର ଘରକୁ ନ ଫେରିବାରୁ ତାଙ୍କ ପିତାମାତା ଚିନ୍ତିତ ହୋଇ ତାଙ୍କୁ ଖୋଜିବା ଆରମ୍ଭ କରିଥିଲେ। ସ୍କୁଲର ପ୍ରଧାନଶିକ୍ଷକଙ୍କୁ ପଚାରିବାରୁ ସ୍କୁଲ ସରିବା ପରେ କୃଷ୍ଣଚନ୍ଦ୍ର ଅନ୍ୟ ଛାତ୍ରଛାତ୍ରୀଙ୍କ ସହ ଘରକୁ ଚାଲିଯାଇଥିବା କହିଥିଲେ। କିଛି ଘଣ୍ଟା ପରେ ପିଲାଟି ଚେତା ଫେରିବା ପରେ ଝରକା ଦେଇ କ୍ଲାସରୁମରୁ ବାହାରକୁ ଆସି ତାଲା ପଡ଼ିଥିବା ସ୍କୁଲ ଗେଟ୍ ନିକଟରେ ବସିଥିବା ବେଳେ ଗ୍ରାମବାସୀ କୃଷ୍ଣଚନ୍ଦ୍ରଙ୍କୁ ଦେଖି ତାଙ୍କୁ ଉଦ୍ଧାର କରିଥିଲେ। କୃଷ୍ଣଚନ୍ଦ୍ରଙ୍କୁ ଉଦ୍ଧାର କରି ସ୍ଥାନୀୟ ଡାକ୍ତରଖାନାରେ ଭର୍ତ୍ତି କରିଥିଲେ। ତାଙ୍କ ବାପା ବସନ୍ତ ମହାନ୍ତି ସ୍କୁଲ କର୍ତ୍ତୃପକ୍ଷଙ୍କ ବିରୋଧରେ ବୈଶିଙ୍ଗା ଥାନାରେ ଅଭିଯୋଗ କରିଛନ୍ତି।