ଶିକ୍ଷକ ନିଯୁକ୍ତି ଦାବିରେ ଜିଲ୍ଲାପାଳଙ୍କ କାର୍ଯ୍ୟାଳୟକୁ ଚାଲି ଚାଲି ଗଲେ ଛାତ୍ରଛାତ୍ରୀ

ମୟୂରଭଞ୍ଜ: ରାଜ୍ୟରେ ଅନେକ ଶିକ୍ଷାନୁଷ୍ଠାନରେ ଶିକ୍ଷକ ନିଯୁକ୍ତିର ଅଭାବ ଦେଖାଦେଉଛି । ପ୍ରାୟ ସମୟରେ ଗଣମାଧ୍ୟମରେ ଏ ନେଇ ଖବର ମଧ୍ୟ ପ୍ରକାଶ ପାଏ । କିନ୍ତୁ ଏଥର ଏକ ଭିନ୍ନ ଧରଣର ଘଟଣା ଦେଖିବାକୁ ମିଳିଛି । ବିଦ୍ୟାଳୟରେ ଶିକ୍ଷକ ଅଭାବ ଥିବାରୁ ଜିଲ୍ଲାପାଳଙ୍କ କାର୍ଯ୍ୟାଳୟକୁ ଦାବି ଜଣାଇବା ପାଇଁ କିଛି ଛାତ୍ରଛାତ୍ରୀ ଚାଲି ଚାଲି ଯାଇଥିବାର ଦେଖିବାକୁ ମିଳିଛି । ଏଭଳି ଘଟଣା ଦେଖିବାକୁ ମିଳିଛି ମୟୂରଭଞ୍ଜ ଜିଲ୍ଲା ବାରିପଦା ସହର ଉପକଂଠ ସୁବର୍ଣ୍ଣରେଖା ପ୍ରକଳ୍ପ ଉଚ୍ଚ ବିଦ୍ୟାଳୟରେ । ଏହି ସ୍କୁଲର ପ୍ରାୟ ୩୦୦ ଛାତ୍ରଛାତ୍ରୀ ଚାଲି ଚାଲି ଜିଲ୍ଲାପାଳଙ୍କ କାର୍ଯ୍ୟାଳୟ ଆଡକୁ ଚାଲି ଚାଲି ଯାଉଥିଲେ । କିନ୍ତୁ ଅଧା ବାଟରେ ଉପଜିଲ୍ଲାପାଳ, ତହସିଲଦାର ଓ ଅନ୍ୟ ଅଧିକାରୀମାନେ ବୁଝାସୁଝା କରିବା ପରେ ପିଲାମାନେ ସ୍କୁଲକୁ ଫେରିଥିଲେ ।
ସୂଚନାନୁଯାୟୀ, ସୁବର୍ଣ୍ଣରେଖା ପ୍ରକଳ୍ପ ହାଇସ୍କୁଲରେ ପ୍ରଥମରୁ ଦଶମ ଶ୍ରେଣୀ ଯାଏ ପ୍ରାୟ ୩୦୦ ଜଣ ଛାତ୍ରଛାତ୍ରୀ ପାଠ ପଢୁଛନ୍ତି । କିନ୍ତୁ ମାତ୍ର ୩ ଜଣ ଶିକ୍ଷକ ଏହି ସ୍କୁଲରେ ଥିବା ବେଳେ ବାରମ୍ବାର ଶିକ୍ଷକ ନିଯୁକ୍ତି ପାଇଁ ଅଭିଭାବକ ଓ ଗ୍ରାମବାସୀମାନେ ଦାବି କରୁଥିଲେ ମଧ୍ୟ ଜିଲ୍ଲା ପ୍ରଶାସନ ତରଫରୁ କୌଣସି ପଦକ୍ଷେପ ନିଆ ଯାଉନାହିଁ । ଯାହାଫଳରେ ଏଭଳି ଏକ ଭିନ୍ନ ପ୍ରକ୍ରିୟାରେ ଛାତ୍ରଛାତ୍ରୀମାନେ ଦାବି ଜଣାଇବା ପାଇଁ ଚାଲି ଚାଲି ଯାଇଥିଲେ ।