ସାଇମୁନ୍-୨୦୨୩ରେ ଯୋଗ ଦେଲେ ବିଶ୍ୱସ୍ତରୀୟ ପ୍ରତିନିଧି

ଭୁବନେଶ୍ବର: ସାଇ ଇଣ୍ଟରନ୍ୟାସନାଲ ପକ୍ଷରୁ ଜୁଲାଇ ୨୮ ଓ ୨୯ ତାରିଖରେ ସାଇ ମଡେଲ ୟୁନାଇଟେଡ୍ ନେସନ୍ସ ୨୦୨୩ର ୧୧ତମ ସଂସ୍କରଣ ଅନୁଷ୍ଠିତ ହୋଇଥିଲା, ଯେଉଁଥିରେ ଶୁକ୍ରବାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ। ଏହି ବିଶ୍ୱ ସମାବେଶରେ ଶ୍ରୀଲଙ୍କା, ଉଗାଣ୍ଡା, ସାଉଦି ଆରବ, ସିରିଆ, ଭୁଟାନ, କେନିଆ, ଏସୱାତିନୀ, ଇଥିଓପିଆ, ମାଲି ଏବଂ ଭାରତ ଭଳି ୧୦ଟି ବିବିଧ ରାଷ୍ଟ୍ରକୁ ପ୍ରତିନିଧିତ୍ୱ କରୁଥିବା ୭୦୦ରୁ ଅଧିକ ପ୍ରତିନିଧି ପ୍ରମୁଖ ଅଂଶଗ୍ରହଣ କରିଥିଲେ ।

ସଭାକୁ ସମ୍ବୋଧିତ କରି ଶ୍ରୀ ପଟ୍ଟନାୟକ କହିଛନ୍ତି, “ମୁଁ ବିଶ୍ୱର ସମସ୍ତ ଛାତ୍ରଛାତ୍ରୀ ଓ ପ୍ରତିନିଧିଙ୍କୁ ଶୁଭେଚ୍ଛା ଜଣାଉଛି। ଆପଣଙ୍କ ଆଖପାଖ ଦୁନିଆ, ସମାଜ ଏବଂ ଲୋକମାନଙ୍କୁ ବୁଝିବା ପାଇଁ ଏହି ସମ୍ମିଳନୀ ଏକ ଅନନ୍ୟ ସୁଯୋଗ। ବିବିଧ ସଂସ୍କୃତି ଓ ଅଭ୍ୟାସର ଜ୍ଞାନ ବିବିଧତା ପ୍ରତି ଆମର ଗ୍ରହଣୀୟତାକୁ ବଢ଼ାଇଥାଏ। ଏହା ଆମକୁ ବିଶ୍ୱ ଶାନ୍ତି, ସୌହାର୍ଦ୍ଦ୍ୟ ଏବଂ ଅଭିବୃଦ୍ଧି ପାଇଁ ଏକ ସାଧାରଣ ଆଭିମୁଖ୍ୟ ଖୋଜିବାରେ ସାହାଯ୍ୟ କରେ। ମୁଁ ବିଶ୍ୱାସ କରେ, ଆପଣମାନେ ଏଠାରେ ଯେଉଁ ଅଭିଜ୍ଞତା ପାଇବେ, ତାହା ଆପଣଙ୍କୁ ବିଶ୍ୱସ୍ତରୀୟ ନେତା ହେବା ଏବଂ ମାନବିକତା ପାଇଁ ଅର୍ଥପୂର୍ଣ୍ଣ ଅବଦାନ ଦେବାରେ ସାହାଯ୍ୟ କରିବ।”

ଅତ୍ୟାଧୁନିକ ବିଜୟ ଇଣ୍ଡୋର ଷ୍ଟାଡିୟମକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଉଦଘାଟନ କରିଛନ୍ତି। ଶିକ୍ଷଣ ପାଠ୍ୟକ୍ରମରେ କ୍ରୀଡ଼ା ଶିକ୍ଷାର ମହତ୍ତ୍ବ ଉପରେ ଆଲୋକପାତ କରିବା ସହ ଦୂରଦର୍ଶୀ ପ୍ରତିଷ୍ଠାତା ଅଧ୍ୟକ୍ଷ ଡ. ବିଜୟ କୁମାର ସାହୁଙ୍କ ସ୍ମୃତିରେ ଏହି ଷ୍ଟାଡିୟମରେ ୬ଟି ଟେବୁଲ ଟେନିସ୍ କୋର୍ଟ, ୬ଟି ବ୍ୟାଡମିଣ୍ଟନ କୋର୍ଟ, ୩ଟି ବାସ୍କେଟବଲ୍ କୋର୍ଟ, ଏକ ସ୍କ୍ୱାସ୍ କୋର୍ଟ, ବହୁମୁଖୀ ଭଲିବଲ୍ ଓ ଟେନିସ୍ କୋର୍ଟ, ଲନ୍ ଟେନିସ୍ କୋର୍ଟ, ସ୍କେଟିଂ ଟ୍ରାକ୍, ଚେସ୍ ଭଳି ଇନ୍ଡୋର ଗେମ୍ ରହିଛି। ଏହି ଷ୍ଟାଡିୟମକୁ ଉଦଘାଟନ କରି ସେ ଆନନ୍ଦିତ ବୋଲି ମୁଖ୍ୟମନ୍ତ୍ରୀ କହିଛନ୍ତି। ଏହି ଅବସରରେ ମୁଖ୍ୟମନ୍ତ୍ରୀ ବିଦ୍ୟାଳୟର ପ୍ରତିଷ୍ଠାତାଙ୍କୁ ଗଭୀର ଶ୍ରଦ୍ଧାଞ୍ଜଳି ଜ୍ଞାପନ କରି କହିଥିଲେ, ଓଡ଼ିଶାରେ ବିଦ୍ୟାଳୟ ଶିକ୍ଷାକୁ ଏକ ନୂଆ ଦିଗ ଦେଇ ସେ ଉଲ୍ଲେଖନୀୟ ଅବଦାନ ଦେଇଛନ୍ତି।

ଏହାବ୍ୟତୀତ ଅନ୍ୟ ଏକ ବହୁମୁଖୀ ଆଉଟଡୋର କ୍ରୀଡ଼ା କମ୍ପ୍ଲେକ୍ସ ବିଜୟ ମଇଦାନରେ ଏକ ଫୁଟବଲ ପଡ଼ିଆ, କ୍ରିକେଟ ପଡ଼ିଆ, ରେସିଂ ଟ୍ରାକ୍, ଭଲିବଲ୍, ଥ୍ରୋବଲ୍, କବାଡି, ଖୋଖୋ ଓ ୩ଟି ସୁଇମିଂ ପୁଲ୍ ରହିଛି, ଯେଉଁଥିରେ ଏକ ଗ୍ୟାଲେରୀ ରହିଛି। ଏହି ଷ୍ଟାଡିୟମ ଦେଶର ଏକ ବୃହତ୍ତମ ବିଦ୍ୟାଳୟସ୍ତରୀୟ ଇନଡୋର ସ୍ପୋର୍ଟସ କମ୍ପ୍ଲେକ୍ସ, ଯାହା କ୍ରୀଡ଼ାପ୍ରେମୀ ଏବଂ ଆଥଲେଟମାନଙ୍କୁ ସେମାନଙ୍କ ଦକ୍ଷତା ବୃଦ୍ଧି କରିବା ଏବଂ ଉତ୍ତମ ସର୍ବାଙ୍ଗୀନ ବ୍ୟକ୍ତି ହେବା ପାଇଁ ଏକ ପ୍ଲାଟଫର୍ମ ପ୍ରଦାନ କରିବ।