ଲେବାନନ ଓ ସିରିଆରୁ ବହୁମୁଖୀ ଯୁଦ୍ଧ ଧମକ ସମ୍ମୁଖୀନ

ନୂଆଦିଲ୍ଲୀ, ୧୧,୧୦: ଆରବୀ ଦେଶ ପାଲେଷ୍ଟାଇନର ଆତଙ୍କୀ ଗୋଷ୍ଠୀ ହାମାସ ଓ ଇହୁଦୀ ଦେଶ ଇସ୍ରାଏଲ ମଧ୍ଯରେ ଘମାଘୋଟ ଯୁଦ୍ଧ ଜାରି ରହିଛି। ଚାରିଆଡେ ହାହାକାର ପରିସ୍ଥିତି ଉପୁଜିଛି। ହମାସ ଆତଙ୍କବାଦୀମାନେ ପିଲାମାନଙ୍କୁ ବାନ୍ଧି, ପୋଡ଼ି ହତ୍ୟା କରିଛନ୍ତି। ଇସ୍ରାଏଲ ବିନା ଚେତାବନୀରେ ଗାଜା ଉପତ୍ୟକାରେ ଥିବା ପାଲେଷ୍ଟାଇନ୍ ଘର ଉପରକୁ ବୋମା ପକାଇଲେ ଜଣେ ବନ୍ଦୀଙ୍କୁ ଫାଶୀ ଦିଆଯିବ ବୋଲି ହାମାସ ଧମକ ଦେଇଛି। ସେପଟେ ଇସ୍ରାଏଲ କହିଛି ସେମାନେ ହାମାସ ଗୋଷ୍ଠୀଠାରୁ ଗାଜା ସୀମାନ୍ତ ଅଞ୍ଚଳକୁ ପୁନର୍ବାର ଅକ୍ତିଆର କରିଛନ୍ତି ଏବଂ ଏହି ଭୟଙ୍କର ସଂଘର୍ଷ ପଞ୍ଚମ ଦିନରେ ପ୍ରବେଶ କରିଛି ଏବଂ ଉଭୟ ପକ୍ଷର ହଜାର ହଜାର ଲୋକ ପ୍ରାଣ ହରାଇଛନ୍ତି। ଅନ୍ୟପକ୍ଷରେ ପାଲେଷ୍ଟାଇନକୁ ସମର୍ଥନ କରିଛି ଲେବାନନ, ସିରିଆ ଭଳି ଦେଶ ମଧ୍ୟ ସମର୍ଥନ କରିଛି। ତେଣୁ ଲେବାନନ ଓ ସିରିଆରୁ ଇସ୍ରାଏଲକୁ ବହୁମୁଖୀ ଯୁଦ୍ଧ ଧମକ ମିଳୁଛି।

ଇସ୍ରାଏଲ ଇତିହାସରେ ଘଟିଥିବା ଚଳିତବର୍ଷର ସବୁଠାରୁ ଭୟଙ୍କର ଆକ୍ରମଣରେ ମୃତ୍ୟୁ ସଂଖ୍ୟା ୧୨୦୦ ଟପିଥିବା ବେଳେ ଗାଜା ଅଧିକାରୀମାନେ ଏପର୍ଯ୍ୟନ୍ତ ୭୬୫ ଜଣଙ୍କ ମୃତ୍ୟୁ ହୋଇଥିବା ସୂଚନା ଦେଇଛନ୍ତି। ଇସ୍ରାଏଲ ସେନା ଆହୁରି ମଧ୍ୟ କହିଛି ଯେ ଇସ୍ରାଏଲ ଭିତରେ ପ୍ରାୟ ୧୫୦୦ ହାମାସ ଆତଙ୍କବାଦୀଙ୍କ ମୃତଦେହ ଉଦ୍ଧାର କରାଯାଇଛି।

ବିନା ଚେତାବନୀରେ ଆମ ଲୋକଙ୍କୁ ଟାର୍ଗେଟ କଲେ ଜଣେ ବେସାମରିକ ବନ୍ଧକଙ୍କୁ ଫାଶୀ ଦିଆଯିବ ବୋଲି ହାମାସର ସଶସ୍ତ୍ର ଶାଖା ଇସ୍ରାଏଲକୁ ଚେତାବନୀ ଦେଇଛି। ହାମାସ ଗୋଷ୍ଠୀ ପିଲାଙ୍କ ସମେତ ୧୫୦ ଜଣଙ୍କୁ ବନ୍ଦୀ କରି ରଖିଛି। ଇସ୍ରାଏଲ ଗାଜା ଉପତ୍ୟକାକୁ ସମ୍ପୂର୍ଣ୍ଣ ଘେରାଉ କରିବା ସହ ଖାଦ୍ୟ, ଜଳ, ବିଜୁଳି, ଇନ୍ଧନ ଯୋଗାଣ ବନ୍ଦ କରିବା ପରେ ଏହି ଧମକ ମିଳିଛି। ଏହି ପଦକ୍ଷେପ ପୂର୍ବରୁ ଭୟଙ୍କର ମାନବିକ ସ୍ଥିତି ଆହୁରି ଖରାପ ହେବାର ଆଶଙ୍କା ସୃଷ୍ଟି କରିଛି।

ଇସ୍ରାଏଲର ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ଚେତାବନୀ ଦେଇଛନ୍ତି ଯେ ଶନିବାର ପାଲେଷ୍ଟାଇନ ସଙ୍ଗଠନ ଦ୍ୱାରା ସାମୂହିକ ଉଲ୍ଲଂଘନ ପରେ ଇସ୍ରାଏଲର ସାମରିକ ଅଭିଯାନ କେବଳ ହାମାସକୁ ଧ୍ୱଂସ କରିବା ଏବଂ “ମଧ୍ୟପ୍ରାଚ୍ୟକୁ ପରିବର୍ତ୍ତନ କରିବା” ପାଇଁ ଏକ ନିରନ୍ତର ଯୁଦ୍ଧର ଆରମ୍ଭ। ଏମାନେ ବର୍ବର। ହାମାସ ହେଉଛି ଆଇଏସ୍ଆଇଏସ୍ ବୋଲି ନେତାନ୍ୟାହୁ କହିଛନ୍ତି।

ବ୍ରିଟେନ, ଫ୍ରାନ୍ସ, ଜର୍ମାନୀ ଓ ଇଟାଲୀ ଭଳି ପ୍ରମୁଖ ସହଯୋଗୀ ଆମେରିକା ଇସ୍ରାଏଲକୁ ପୂର୍ଣ୍ଣ ସମର୍ଥନ ଦେବା ଉପରେ ଗୁରୁତ୍ୱାରୋପ କରିଛି। ଏକ ମିଳିତ ବିବୃତିରେ ସେମାନଙ୍କ ନେତାମାନେ କହିଛନ୍ତି ଯେ ଆମେ “ପାଲେଷ୍ଟାଇନ୍ ଲୋକଙ୍କ ବୈଧ ଆକାଂକ୍ଷାକୁ ସ୍ୱୀକାର କରୁଛୁ” କିନ୍ତୁ ହାମାସ “ପାଲେଷ୍ଟାଇନ ଲୋକଙ୍କ ପାଇଁ ଅଧିକ ଆତଙ୍କ ଏବଂ ରକ୍ତପାତ ବ୍ୟତୀତ ଅନ୍ୟ କିଛି ପ୍ରଦାନ କରେ ନାହିଁ”।

ଆମେରିକା ବ୍ୟତୀତ ବ୍ରାଜିଲ, କାମ୍ବୋଡିଆ, କାନାଡା, ଆୟର୍ଲାଣ୍ଡ, ମେକ୍ସିକୋ, ନେପାଳ, ପାନାମା, ପାରାଗୁଏ, ରୁଷିଆ, ଶ୍ରୀଲଙ୍କା, ଥାଇଲାଣ୍ଡ ଏବଂ ୟୁକ୍ରେନ ସମେତ ଅନେକ ଦେଶ ସେମାନଙ୍କ ନାଗରିକଙ୍କୁ ହତ୍ୟା, ଅପହରଣ କିମ୍ବା ନିଖୋଜ କରିଥିବା ସୂଚନା ଦେଇଛନ୍ତି। ଯେତେବେଳେ ହାମାସ ଇସ୍ରାଏଲ ଉପରେ ଆକ୍ରମଣ କରିଥିଲା ସେତେବେଳେ ନିଖୋଜ ବିଦେଶୀମାନଙ୍କ ମଧ୍ୟରୁ ଅଧିକାଂଶ ଦକ୍ଷିଣ ଇସ୍ରାଏଲର ଏକ ସଙ୍ଗୀତ ଉତ୍ସବରେ ଥିଲେ।