ବଦଳିବ ଆଲିଗଡ଼ର ନାଁ

ନୂଆଦିଲ୍ଲୀ,୦୭/୧୧/୨୩: ଉତ୍ତରପ୍ରଦେଶର ଆଲିଗଡ଼ ସହରର ନାମ ବଦଳି ହେବ ହରିଗଡ଼। ଆଲିଗଡ଼ ମହାନଗର ନିଗମ ସର୍ବସମ୍ମତିକ୍ରମେ ଆଲିଗଡ଼ର ନାମ ହରିଗଡ଼ ରଖିବା ପାଇଁ ଏକ ପ୍ରସ୍ତାବ ଉପସ୍ଥାପନ କରିଛି ଏବଂ ବର୍ତ୍ତମାନ ଏହି ପ୍ରସ୍ତାବକୁ ଅନୁମୋଦନ ପାଇଁ ରାଜ୍ୟ ସରକାରଙ୍କ ନିକଟକୁ ପଠାଇବ।

ଯଦି ଆଲିଗଡ଼ର ନାମ ହରିଗଡ଼କୁ ପରିବର୍ତ୍ତନ କରାଯାଏ, ତେବେ ୟୁପି ସରକାର ଯେଉଁ ସହରଗୁଡିକର ନାମ ପରିବର୍ତ୍ତନ କରିଛନ୍ତି ସେମାନଙ୍କ ତାଲିକାରେ ଏହା ସାମିଲ ହେବ – ଆହ୍ଲାବାଦକୁ ପ୍ରୟାଗରାଜ, ମୋଗଲ ସରାଇ ହେଉଛି ପଣ୍ଡିତ ଦୀନଦୟାଲ ଉପାଧ୍ୟାୟ ନଗର ଏବଂ ଫୈଜାବାଦର ନାମ ପରିବର୍ତ୍ତନ କରି ଅଯୋଧ୍ୟା ରଖାଯାଇଛି ।

୨୦୨୧ମସିହାରେ ଆଲିଗଡ଼ ଜିଲ୍ଲା ପଞ୍ଚାୟତ ଆଲିଗଡ଼ର ନାମ ହରିଗଡ଼ ରଖିବା ପାଇଁ ଏକ ସଂକଳ୍ପ ପାରିତ କରିଥିଲା। ଗତକାଲି ଏକ ବୈଠକରେ ଆଲିଗଡ଼ର ନାମ ପରିବର୍ତ୍ତନ କରି ହରିଗଡ଼ କରିବାକୁ ସର୍ବସମ୍ମତିକ୍ରମେ ଏକ ପ୍ରସ୍ତାବ ଉପସ୍ଥାପିତ ହୋଇଥିଲା। ଏବେ ଏହି ପ୍ରସ୍ତାବ କୁ ପ୍ରଶାସନ ନିକଟକୁ ପଠାଯିବ।

ଆଲିଗଡ଼ର ମେୟର ପ୍ରଶାନ୍ତ ସିଙ୍ଘଲ କହିଛନ୍ତି, “ମୁଁ ଆଶା କରୁଛି ପ୍ରଶାସନ ଏହି ପ୍ରସ୍ତାବକୁ ଗ୍ରହଣ କରିବ ଏବଂ ଆଲିଗଡ଼ର ନାମ ହରିଗଡ଼ କରିବାକୁ ଆମର ଦାବି ପୂରଣ କରିବ। ଏହି ଦାବି ଦୀର୍ଘ ଦିନ ଧରି ଉଠାଯାଉଛି।”