ଦେଖନ୍ତୁ ‘ଡଙ୍କି’ର ବ୍ଲକବଷ୍ଟର ଆୟ: ‘ପଠାନ’, ‘ଜବାନ’କୁ ଟପେଇ ପାରିବ କି ‘ଡଙ୍କି’

ମୁମ୍ବାଇ, ୨୨/୧୨/୨୩: ଡିସେମ୍ବର ୨୧ରେ ବଲିଉଡ ଷ୍ଟାର ଶାହାରୁଖ ଖାନଙ୍କ ‘ଡଙ୍କି’ ମୁକ୍ତିଲାଭ କରିଛି। ଭାବପ୍ରବଣତାରେ ଭରି ରହିଥିବା ଏହି ଫିଲ୍ମ ପ୍ରଶଂସକଙ୍କ ଉପରେ ବିଶେଷ ପ୍ରଭାବ ପକାଇ ପାରିନାହିଁ ବୋଲି କେତେକ ପ୍ରଶଂସକ କହୁଛନ୍ତି। ବେଆଇନ ଇମିଗ୍ରେସନ ଏବଂ ସ୍ୱଦେଶ ପ୍ରତ୍ୟାବର୍ତ୍ତନ ବିଷୟବସ୍ତୁ ଉପରେ ଆଧାରିତ ଏହି ବଲିଉଡ ଚଳଚ୍ଚିତ୍ର। ଏହି ଚଳଚ୍ଚିତ୍ରରେ ତାପସୀ ପାନ୍ନୁ ଓ ଭିକି କୌଶଲ ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଛନ୍ତି।

୧୨୦ କୋଟି ଟଙ୍କାର ବଜେଟରେ ତିଆରି ହୋଇଥିବା ଚଳଚ୍ଚିତ୍ର ‘ଡଙ୍କି’ ମୁକ୍ତିଲାଭର ପ୍ରଥମ ଦିନରେ ଘରୋଇ ବଜାରରେ ୩୫.୨୩ କୋଟି ଟଙ୍କା ରୋଜଗାର କରିଛି। ଯାହାକି ଜଣାପଡୁଛି, ଶାହରୁଖ ଖାନଙ୍କ ଅଭିନୀତ ‘ପଠାନ’ ଓ ‘ଜବାନ’କୁ ଟପେଇ ପାରିନି। କିନ୍ତୁ ବିଦେଶୀ ବଜାରରେ, ବିଶେଷକରି ବ୍ରିଟେନରେ ଯେଉଁଠାରେ ଚଳଚ୍ଚିତ୍ରର ଏକ ଅଂଶ ଆଧାରିତ ସେଠାରେ ଏହା ଭଲ ପ୍ରଦର୍ଶନ କରିବ ବୋଲି ଆଶା କରାଯାଉଛି ।

ସେହିଭଳି ଦ୍ୱିତୀୟ ଦିନରେ ମଧ୍ୟ ‘ଡଙ୍କି’ ରୋଜଗାର କରିଛି ୩୦ରୁ ୩୫ କୋଟି, ଯାହାକି ପ୍ରଥମ ଦିନ ତୁଳନାରେ କମ। ତେବେ ଆଗକୁ ସାପ୍ତାହିକ ଦିନ ଶନିବାର ଓ ରବିବାର ଦିନ ବେଶ ଆୟ କରିପାରେ ବୋଲି ଆଶା କରାଯାଉଛି।

ପ୍ରଥମ କିଛି ଦିନରେ ଭଲ ପ୍ରଦର୍ଶନ ନକଲେ ମଧ୍ୟ ‘ଡଙ୍କି’ ଦୀର୍ଘକାଳୀନ ଭାବେ ଭଲ ପ୍ରଦର୍ଶନ କରିବ ବୋଲି ସିନେ ସମୀକ୍ଷକ କହିଛନ୍ତି। ଯେହେତୁ ଏହା କୌଣସି ଆକ୍ସନ୍ ଚଳଚ୍ଚିତ୍ର ନୁହେଁ, ତେଣୁ ଚଳଚ୍ଚିତ୍ରଟି ଶାହରୁଖଙ୍କ ବର୍ଷର ଅନ୍ୟ ଦୁଇଟି ମୁକ୍ତିଲାଭ ପଠାନ ଏବଂ ଜବାନ ସହିତ ନିକଟତର ହେବାର ସମ୍ଭାବନା ନାହିଁ ।

୨୦୨୩ର ପ୍ରଥମ ବ୍ଲକବଷ୍ଟର ଫିଲ୍ମ ‘ପଠାନ୍’ ଘରୋଇ ବଜାରରେ ପ୍ରଥମ ଦିନରେ ୫୭ କୋଟି ଟଙ୍କା ଆୟ କରିଥିବା ବେଳେ ହିନ୍ଦୀ ଭର୍ସନରୁ ୫୫ କୋଟି ଟଙ୍କା ଆସିଛି। ସିଦ୍ଧାର୍ଥ ଆନନ୍ଦଙ୍କ ନିର୍ଦ୍ଦେଶନାରେ ନିର୍ମିତ ଏହି ଫିଲ୍ମ ଭାରତରେ ୫୪୩.୦୯ କୋଟି ଟଙ୍କା ଆୟ କରିଥିଲା। ଏହି ସିନେମାର ବଜେଟ ଥିଲା ୨୨୫ କୋଟି।

‘ଜବାନ’ର ପ୍ରଥମ ଦିନର ବକ୍ସ ଅଫିସ କଲେକ୍ସନ ଆହୁରି ଅଧିକ ଥିଲା। ଅଟଲିଙ୍କ ନିର୍ଦ୍ଦେଶିତ ଏହି ଫିଲ୍ମ ଭାରତରେ ପ୍ରଥମ ଦିନରେ ୭୫ କୋଟି ଟଙ୍କା ଆୟ କରିଥିଲା। ହିନ୍ଦୀ ସଂସ୍କରଣ ୬୫.୫ କୋଟି ଟଙ୍କା ଆୟ କରିଥିଲା। ୩୦୦ କୋଟି ବଜେଟରେ ନିର୍ମିତ ହୋଇଥିବା ଏହି ଚଳଚ୍ଚିତ୍ର ଶେଷରେ ଭାରତରେ ୬୪୦.୨୫ କୋଟି ଟଙ୍କା ଆୟ କରିଥିଲା।