ନୂଆଦିଲ୍ଲୀ, ୨୯/୦୩: ମିଆଁମାରରେ ଶୁକ୍ରବାର ଭୟଙ୍କର ଭୂମିକମ୍ପ ହୋଇଥିବା ବେଳେ ଶନିବାର ପୁଣି ଥରେ ଭୂକମ୍ପରେ ଥରିଛି ଦେଶ। ଆମେରିକାର ଭୂତତ୍ତ୍ୱ ସର୍ଭେ (ୟୁଏସଜିଏସ୍) ଆକଳନ ଅନୁସାରେ ରିଆକ୍ଟର ସ୍କେଲରେ ଭୂକମ୍ପର ତୀବ୍ରତା ୫.୧ ଥିଲା। ସ୍ଥାନୀୟ ସମୟ ଅପରାହ୍ନ ୨.୫୦ରେ ଏହି ଭୂମିକମ୍ପ ହୋଇଥିଲା। ନେପିଡୋ ନିକଟରେ ଏହି ଭୂମିକମ୍ପର କେନ୍ଦ୍ର ସ୍ଥଳୀ ଥିଲା ବୋଲି କୁହାଯାଉଛି। ତେବେ ଏପର୍ଯ୍ୟନ୍ତ ଯାଏ ଏହି ଭୂମିକମ୍ପରେ କେତେ କ୍ଷୟକ୍ଷତି ହୋଇଛି, ତାହା ଜଣାପଡ଼ିନାହିଁ। ଯଦିଓ ଗତ କାଲିଠୁ ଭୂମିକମ୍ପରେ ପ୍ରଭାବିତ ହୋଇ ମିଆଁମାରରେ ଜରୁରୀକାଳୀନ ପରିସ୍ଥିତି ଘୋଷଣା ହୋଇଛି ଏବଂ ଅନେକ ଅଞ୍ଚଳ ସମ୍ପୂର୍ଣ୍ଣ ବିଚ୍ଛିନ୍ନ ହୋଇଯାଇଛି। ହୋଟେଲ, ହସ୍ପିଟାଲ, ସ୍କୁଲ, ମଲ୍, ରେଳଷ୍ଟେସନ ଓ ବିମାନବନ୍ଦର ଠାରୁ ଆରମ୍ଭ କରି ସବୁକିଛି କାଲି ମାଟିରେ ମିଶିଯାଇଛି। ଏହା ଦ୍ୱାରା ଦେଶକୁ ଆର୍ଥିକ ଓ ମାନବୀୟ କ୍ଷେତ୍ରରେ ବହୁ କ୍ଷତି ସହିବାକୁ ପଡ଼ିବ।
ସେପଟେ ଭାରତ ପକ୍ଷରୁ ରିଲିଫ ସାମଗ୍ରୀ ଯୋଗାଇବା ସହିତ ‘ଅପରେସନ ବ୍ରହ୍ମା’ ଜରିଆରେ ମାନବୀୟ ସହାୟତା ମଧ୍ୟ ଯୋଗାଇ ଦିଆଯାଇଛି। ସେହିପରି ଋଷ ଓ ଚୀନ ମଧ୍ୟ ଉଦ୍ଧାରକାରୀ ଦଳଙ୍କୁ ମିଆଁମାର ପଠାଇଛି।