ପ୍ରଧାନମନ୍ତ୍ରୀଙ୍କ ଦ୍ୱାରା ଓଡ଼ିଶାରେ ୧୭୦୦ କୋଟି ଟଙ୍କାରୁ ଅଧିକ ମୂଲ୍ୟର ରେଳ ପ୍ରକଳ୍ପର ଶୁଭାରମ୍ଭ

ଝାରସୁଗୁଡ଼ା, ୨୭/୯: ମାନ୍ୟବର ପ୍ରଧାନମନ୍ତ୍ରୀ ଆଜି ୧୭୦୦ କୋଟି ଟଙ୍କାରୁ ଅଧିକ ମୂଲ୍ୟର ରେଳ ପ୍ରକଳ୍ପର ଶୁଭାରମ୍ଭ ଏବଂ ଦେଶ ଉଦ୍ଦେଶ୍ୟରେ ଉତ୍ସର୍ଗ କରିଛନ୍ତି , ଯାହା ଓଡ଼ିଶାର ଭିତ୍ତିଭୂମି ଏବଂ ସଂଯୋଗୀକରଣକୁ ବୃଦ୍ଧି କରିବାରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ । ଏହି ପ୍ରକଳ୍ପଗୁଡ଼ିକର ଲକ୍ଷ୍ୟ ଯାତ୍ରୀ ସୁବିଧାରେ ଉନ୍ନତି ଆଣିବା, ମାଲ ପରିବହନକୁ ସୁଦୃଢ଼ କରିବା ଏବଂ ସମଗ୍ର ଅଞ୍ଚଳରେ ଆର୍ଥିକ କାର୍ଯ୍ୟକଳାପକୁ ପ୍ରୋତ୍ସାହିତ କରିବା।

ସମାରୋହରେ, ପ୍ରଧାନମନ୍ତ୍ରୀ ନିମ୍ନଲିଖିତ କାର୍ଯ୍ୟ ପାଇଁ ଭିତ୍ତିପ୍ରସ୍ତର ସ୍ଥାପନ କରିଥିଲେ:

ସମ୍ବଲପୁର ସହର ଏବଂ ସାରଲା ମଧ୍ୟରେ ରେଳ ଫ୍ଲାଏଓଭର (₹273 କୋଟି ): ଏହି ପ୍ରକଳ୍ପ ସାରଲା ଷ୍ଟେସନରେ ଭିଡ଼ ଦୂର କରିବ ଏବଂ କୋଇଲା, ଖଣିଜ ଏବଂ ଶିଳ୍ପ ମାଲ ପରିବହନ ପାଇଁ ଏକ ଗୁରୁତ୍ୱପୂର୍ଣ୍ଣ କରିଡର, ବ୍ୟସ୍ତ ସମ୍ବଲପୁର-ଝାରସୁଗୁଡ଼ା ଲାଇନରେ ଟ୍ରେନଗୁଡ଼ିକର ନିରବଚ୍ଛିନ୍ନ ଚଳାଚଳ ସୁନିଶ୍ଚିତ କରିବ । ଏହି ପଦକ୍ଷେପ ସମ୍ବଲପୁର ଏବଂ ସଂଲଗ୍ନ ଅଞ୍ଚଳର ଲୋକମାନଙ୍କୁ ବହୁତ ଲାଭ ଦେବ ।

ପ୍ରଧାନମନ୍ତ୍ରୀ ମଧ୍ୟ ନିମ୍ନଲିଖିତ ପ୍ରକଳ୍ପଗୁଡ଼ିକୁ ରାଷ୍ଟ୍ର ଉଦ୍ଦେଶ୍ୟରେ ସମର୍ପିତ କରିଥିଲେ:

କୋରାପୁଟ-ବାଇଗୁଡ଼ା ରେଳ ଲାଇନର ଦୋହରୀକରଣ (34 କିମି, ₹481 କୋଟି ): ଏହି ବିକାଶ ଟ୍ରେନ ପରିଚାଳନାକୁ ସୁଗମ କରିବ, ଖଣିଜ ପଦାର୍ଥ ଏବଂ କୃଷି ଉତ୍ପାଦର ପରିବହନକୁ ସହଜ କରିବ ଏବଂ ସମ୍ପଦ ସମୃଦ୍ଧ କୋରାପୁଟ ଅଞ୍ଚଳରେ ଶିଳ୍ପ ଅଭିବୃଦ୍ଧିରେ ଯୋଗଦାନ ଦେବ ।

ମାନବାର-କୋରାପୁଟ-ଗୋରାପୁର ରେଳ ଲାଇନର ଦୋହରୀକରଣ (82 କିମି, ₹955 କୋଟି ): ଏହା ଏକ ଜାତୀୟ ଗୁରୁତ୍ୱର ପ୍ରକଳ୍ପ, ଏହା ବୈଲାଡିଲା ଖଣିରୁ ସାରା ଭାରତରେ ଇସ୍ପାତ କାରଖାନାକୁ ଲୁହାପଥର ପରିବହନକୁ ଦ୍ରୁତତର କରିବ । ଏହା କୋରାପୁଟ ( ଓଡିଶା ) ଏବଂ ବିଶାଖାପାଟଣା (ଆନ୍ଧ୍ରପ୍ରଦେଶ) ଜିଲ୍ଲାରେ ଯାତ୍ରୀ ଏବଂ ମାଲ ପରିବହନ ସେବାକୁ ମଧ୍ୟ ବୃଦ୍ଧି କରିବ ।

ଏହା ସହିତ, ପ୍ରଧାନମନ୍ତ୍ରୀ ଭିଡିଓ ଲିଙ୍କ୍ ମାଧ୍ୟମରେ ଝାରସୁଗୁଡ଼ାରୁ ବ୍ରହ୍ମପୁର ଏବଂ ଉଧନା ( ସୁରଟ ) ମଧ୍ୟରେ ଅମୃତ ଭାରତ ଏକ୍ସପ୍ରେସକୁ ପତାକା ଦେଖାଇ ଶୁଭାରମ୍ଭ କରିଥିଲେ। ଅମୃତ ଭାରତ ଏକ୍ସପ୍ରେସ ସୁଲଭତା, ଶକ୍ତି ଦକ୍ଷତା, ସୁରକ୍ଷା ଏବଂ ଯାତ୍ରୀ ଆରାମକୁ କେନ୍ଦ୍ରରେ ରଖି ଡିଜାଇନ୍ କରାଯାଇଥିବା ଏକ ନୂତନ ପିଢ଼ିର ଟ୍ରେନକୁ ପ୍ରତିନିଧିତ୍ୱ କରେ। ପ୍ରମୁଖ ବୈଶିଷ୍ଟ୍ୟଗୁଡ଼ିକ ମଧ୍ୟରେ ଅନ୍ତର୍ଭୁକ୍ତ:

ସୁଲଭ ଯାତ୍ରା:

କମ ଖର୍ଚ୍ଚରେ ଡିଜାଇନ୍ ନୂତନତ୍ୱ ସହିତ ନିର୍ମିତ, ଏହି ଟ୍ରେନ୍ ମିତବ୍ୟୟୀ ଭଡ଼ା ପ୍ରଦାନ କରେ, ଯାହା ସମାଜର ସମସ୍ତ ବର୍ଗର ଲୋକଙ୍କ ପାଇଁ ଆଧୁନିକ ରେଳ ଯାତ୍ରାକୁ ସୁଲଭ କରିଥାଏ।

ଉନ୍ନତ ସୁରକ୍ଷା: ଆଧୁନିକ ସୁରକ୍ଷା ପ୍ରଣାଳୀ ଏବଂ ଦୃଢ଼ କୋଚ୍ ଡିଜାଇନ୍ ସହିତ ସଜ୍ଜିତ, ଦୂରଗାମୀ ଯାତ୍ରୀଙ୍କ ପାଇଁ ସୁରକ୍ଷିତ ଯାତ୍ରା ସୁନିଶ୍ଚିତ କରେ ।

ଯାତ୍ରୀ-ଅନୁକୂଳ ସୁବିଧା: ଆରାମଦାୟକ ଆସନ, ଉନ୍ନତ ଭିତର ସାଜସଜ୍ଜା, LED ଆଲୋକ, ଜୈବ-ଶୌଚାଳୟ ଏବଂ ଉତ୍ତମ ବାୟୁଚଳନ ସମସ୍ତ ଯାତ୍ରୀଙ୍କ ପାଇଁ ଏକ ସୁବିଧାଜନକ ଏବଂ ସୁଖଦ ଯାତ୍ରା ଅଭିଜ୍ଞତା ସୁନିଶ୍ଚିତ କରେ।

ଅମୃତ ଭାରତ ଏକ୍ସପ୍ରେସ୍ ସିଧାସଳଖ ଓଡ଼ିଶାକୁ ଗୁଜରାଟ ସହିତ ସଂଯୋଗ କରି ଏବଂ ଆନ୍ଧ୍ର ପ୍ରଦେଶ, ଛତିଶଗଡ଼ ଏବଂ ମହାରାଷ୍ଟ୍ରର ଜିଲ୍ଲାଗୁଡ଼ିକୁ ସେବା ପ୍ରଦାନ କରି, ଏହା କେବଳ ଦ୍ରୁତ ଏବଂ ସୁରକ୍ଷିତ ଯାତ୍ରା ପ୍ରଦାନ କରିବ ନାହିଁ ବରଂ ପୂର୍ବ, କେନ୍ଦ୍ରୀୟ ଏବଂ ପଶ୍ଚିମ ଭାରତରେ ଆହୁରି ଦୃଢ଼ ଆର୍ଥିକ ଏବଂ ସାଂସ୍କୃତିକ ସମ୍ପର୍କକୁ ବୃଦ୍ଧି କରିବ।

ଓଡ଼ିଶାର ରେଳ ବିକାଶରେ ଏକ ପରିବର୍ତ୍ତନକାରୀ ପଦକ୍ଷେପକୁ ପ୍ରତିନିଧିତ୍ୱ କରେ । ଏଗୁଡ଼ିକ ଯାତ୍ରା ସମୟ ହ୍ରାସ କରିବ, ସୁରକ୍ଷା ଏବଂ ସମୟାନୁବର୍ତ୍ତିତାରେ ଉନ୍ନତି ଆଣିବ, ଶିଳ୍ପ ପ୍ରସାରକୁ ସମର୍ଥନ କରିବ ଏବଂ ରାଜ୍ୟ ସାରା ଚାଷୀ, ବ୍ୟବସାୟୀ, ଯୁବକ ଏବଂ ଶ୍ରମିକଙ୍କ ପାଇଁ ନୂତନ ନିଯୁକ୍ତି ସୁଯୋଗ ସୃଷ୍ଟି କରିବ।

ପ୍ରଧାନମନ୍ତ୍ରୀ ପୁନର୍ବାର କହିଛନ୍ତି ଯେ ଏହି ପ୍ରକଳ୍ପଗୁଡ଼ିକ ଭାରତ ସରକାରଙ୍କ “ସବକା ସାଥ, ସବକା ବିକାଶ, ସବକା ବିଶ୍ୱାସ, ସବକା ପ୍ରୟାସ” ଦୃଷ୍ଟିକୋଣକୁ ପ୍ରତିପାଦନ କରୁଛି ଏବଂ ଏକ ବିକାଶିତ ଭାରତ ଏବଂ ଏକ ବିକାଶିତ ଓଡ଼ିଶା ଗଠନର ଅବିଚ୍ଛେଦ୍ୟ ଅଂଶ, ଯାହା ରାଜ୍ୟର ପ୍ରତ୍ୟେକ ଭାଗରେ ପ୍ରଗତି ଏବଂ ଆଧୁନିକ ଭିତ୍ତିଭୂମି ପହଞ୍ଚିବା ସୁନିଶ୍ଚିତ କରିବ।