ନୂଆଦିଲ୍ଲୀ, ୧୨/୦୨: ଜାତୀୟ ସଙ୍ଗୀତ ଜନ ଗଣ ମନ ପୂର୍ବରୁ ବାଧ୍ୟତାମୂଳକ ବନ୍ଦେ ମାତରମ୍ ଗୀତ ଗାଇବା। ଏ ନେଇ କେନ୍ଦ୍ର ସରକାର ଜାତୀୟ ଗୀତ ‘ବନ୍ଦେ ମାତରମ୍’କୁ ନେଇ ନିର୍ଦ୍ଦେଶାବଳୀ ଜାରି କରିଛନ୍ତି। ଭାରତର ଜାତୀୟ ଗୀତ ‘ବନ୍ଦେ ମାତରମ୍’ ନେଇ ନୂଆ ବିଜ୍ଞପ୍ତି ପ୍ରକାଶ ପାଇଛି।
ପଦ୍ମ ପୁରସ୍କାର ଓ ରାଷ୍ଟ୍ରପତିଙ୍କ କାର୍ଯ୍ୟକ୍ରମରେ ବାଧ୍ୟତାମୂଳକ ବନ୍ଦେ ମାତରମ୍। ତ୍ରିରଙ୍ଗା ଉତ୍ତୋଳନ, କାର୍ଯ୍ୟକ୍ରମରେ ରାଷ୍ଟ୍ରପତିଙ୍କ ଆଗମନ, ସମୁଦାୟ ଉଦ୍ଦେଶ୍ୟରେ ତାଙ୍କର ଭାଷଣ ପୂର୍ବରୁ ଏବଂ ପରେ, ରାଜ୍ୟପାଳମାନଙ୍କ ଆଗମନ ଏବଂ ଭାଷଣ ପୂର୍ବରୁ ଏବଂ ପରେ ସମେତ ଅନେକ ସରକାରୀ ଅବସରରେ ବନ୍ଦେ ମାତରମ୍ ବଜାଇବା ବାଧ୍ୟତାମୂଳକ ହେବ।
ସିନେମା ହଲ୍ ଭଳି ସାର୍ବଜନୀନ ସ୍ଥାନରେ ମଧ୍ୟ ବାଜିବ ବନ୍ଦେ ମାତରମ୍। ସମସ୍ତ ସରକାରୀ ସ୍କୁଲ୍ ଓ କାର୍ଯ୍ୟକ୍ରମରେ ଗାନ ହେବ। ଏପରିକି ଅଫିସିଆଲ୍ କାର୍ଯ୍ୟକ୍ରମରେ ‘ବନ୍ଦେ ମାତରମ୍’ ବାଧ୍ୟତାମୂଳକ ହେବ।
ନୂତନ ନିୟମ ଅନୁଯାୟୀ, ଜାତୀୟ ସଙ୍ଗୀତର ସମସ୍ତ ଛଅଟି ପଦ ଗାନ କରାଯିବ, ମୋଟ ୩ ମିନିଟ୍ ୧୦ ସେକେଣ୍ଡ। ଏପର୍ଯ୍ୟନ୍ତ, ମୂଳ ଗୀତର କେବଳ ପ୍ରଥମ ଦୁଇଟି ପଦ ଗାନ କରାଯାଉଥିଲା।
‘ବନ୍ଦେ ମାତରମ୍’ ଗାନ ବେଳେ ସାବଧାନ ଭଙ୍ଗୀରେ ରହିବାକୁ ନିର୍ଦ୍ଦେଶନାମାରେ କୁହାଯାଇଛି। ଯଦି କେହି ଅସମ୍ମାନ କରନ୍ତି ସର୍ବାଧିକ ୩ ବର୍ଷ ଜେଲଦଣ୍ଡ ଦିଆଯିବ।
ସୂଚନାଯୋଗ୍ୟ, ଭାରତର ଜାତୀୟ ଗୀତ “ବନ୍ଦେ ମାତରମ୍”, ୧୮୭୫ ମସିହା ନଭେମ୍ବର ୭ ତାରିଖରେ ଅକ୍ଷୟ ନବମୀର ପବିତ୍ର ଅବସରରେ ବଙ୍କିମ ଚନ୍ଦ୍ର ଚାଟାର୍ଜୀଙ୍କ ଦ୍ୱାରା ଲେଖାଯାଇଥିଲା। ଏହା ପ୍ରଥମେ ୧୮୮୨ ମସିହାରେ ତାଙ୍କ ପତ୍ରିକା “ବଙ୍ଗଦର୍ଶନ”ରେ ତାଙ୍କ ଉପନ୍ୟାସ “ଆନନ୍ଦମଠ” ର ଅଂଶ ଭାବରେ ପ୍ରକାଶିତ ହୋଇଥିଲା।
୧୮୯୬ ମସିହାରେ, ରବୀନ୍ଦ୍ରନାଥ ଟାଗୋର ଭାରତୀୟ ଜାତୀୟ କଂଗ୍ରେସ ଅଧିବେଶନରେ ମଞ୍ଚ ଉପରେ “ବନ୍ଦେ ମାତରମ୍” ଗାଇଥିଲେ। ଏହା ପ୍ରଥମ ଥର ପାଇଁ ଥିଲା ଯେତେବେଳେ ଏହି ଗୀତଟି ଜାତୀୟ ସ୍ତରରେ ସାର୍ବଜନୀନ ଭାବରେ ଗାନ କରାଯାଇଥିଲା।
“ବନ୍ଦେ ମାତରମ୍” ଏକ ସଂସ୍କୃତ ବାକ୍ୟାଂଶ ଯାହାର ଅର୍ଥ ହେଉଛି, “ହେ ମାତା, ମୁଁ ତୁମକୁ ପ୍ରଣାମ କରୁଛି।” ସ୍ୱାଧୀନତା ସଂଗ୍ରାମ ସମୟରେ, “ବନ୍ଦେ ମାତରମ୍” ଭାରତକୁ ଉପନିବେଶବାଦୀ ଶାସନରୁ ମୁକ୍ତ କରିବା ପାଇଁ ସଂଘର୍ଷ କରୁଥିବା ସ୍ୱାଧୀନତା ସଂଗ୍ରାମୀଙ୍କ ସ୍ଲୋଗାନରେ ପରିଣତ ହୋଇଥିଲା।