ରାୟପୁର, ୦୬/୦୪: ଛତିଶଗଡ଼ର ପୂର୍ବତନ ମୁଖ୍ୟମନ୍ତ୍ରୀ ଅଜିତ ଯୋଗୀଙ୍କ ପୁଅ ତଥା ପୂର୍ବତନ ବିଧାୟକ ଅମିତ ଯୋଗୀଙ୍କୁ ଏକ ହତ୍ୟା ମାମଲାରେ ଆଜୀବନ କାରାଦଣ୍ଡ ଶୁଣାଇଛନ୍ତି ମାନ୍ୟବର ହାଇକୋର୍ଟ। ଏଥିସହ ୭ ଦିନ ମଧ୍ୟରେ ଆତ୍ମସମର୍ପଣ କରିବାକୁ ନିର୍ଦ୍ଦେଶ ଦେଇଛନ୍ତି। ମୁଖ୍ୟ ବିଚାରପତି ରମେଶ ସିହ୍ନା ଓ ଜଷ୍ଟିସ ଅରବିନ୍ଦ କୁମାର ବର୍ମାଙ୍କୁ ନେଇ ଗଠିତ ଖଣ୍ଡପୀଠ ଏହି ରାୟ ଶୁଣାଇଛନ୍ତି।
୨୦୦୩ ମସିହାରେ ଏକ ହତ୍ୟାକାଣ୍ଡ ସହ ସମ୍ପୃକ୍ତ ମାମଲାରେ ଏହି ରାୟ ଶୁଣାଇଛନ୍ତି କୋର୍ଟ। ସେତେବେଳେ ଏନସିପି ନେତା ରାମ ଅବତାର ଜଗିଙ୍କୁ ଗୁଳି କରି ହତ୍ୟା କରାଯାଇଥିଲା। ଘଟଣାକୁ ନେଇ ପୋଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା ଓ ତଦନ୍ତରେ ଅମିତ ଯୋଗୀ ମୁଖ୍ୟ ଅଭିଯୁକ୍ତ ବୋଲି ଜଣାପଡ଼ିଥିଲା।
ସେହି ସମୟରେ ଅଜିତ ଯୋଗୀ ଛତିଶଗଡ଼ର ମୁଖ୍ୟମନ୍ତ୍ରୀ ଥିଲେ। ୨୦୦୭ରେ ଏହି ମାମଲାରେ ୨୭ ଜଣଙ୍କୁ ଦୋଷୀ ସାବ୍ୟସ୍ତ କରାଯାଇଥିଲା। ଦୀର୍ଘ ୨୩ ବର୍ଷ ଧରି ଚାଲିଥିବା ନ୍ୟାୟିକ ପ୍ରକ୍ରିୟା ପରେ ଶେଷରେ ଅମିତ ଯୋଗୀଙ୍କୁ ଦଣ୍ଡ ବିଧାନ କରାଯାଇଛି। ଗତ ଗୁରୁବାର ତାଙ୍କୁ ଦୋଷୀ ସାବ୍ୟସ୍ତ କରିଥିଲେ ହାଇକୋର୍ଟ।
ରାୟରେ ଅଦାଲତ ସ୍ପଷ୍ଟ କରିଛନ୍ତି ଯେ ଆଇନ ସମ୍ମୁଖରେ ସମସ୍ତେ ସମାନ ଓ କାହାରି ପଦବୀ କିମ୍ବା ପ୍ରଭାବ ନ୍ୟାୟିକ ପ୍ରକ୍ରିୟାକୁ ପ୍ରଭାବିତ କରିପାରିବ ନାହିଁ। କେତେକ ନେତା ଏହାକୁ ନ୍ୟାୟର ଜୟ ବୋଲି ବର୍ଣ୍ଣନା କରିଥିବା ବେଳେ ଅନ୍ୟମାନେ ଏହାକୁ ରାଜନୀତିକ ଷଡଯନ୍ତ୍ର ବୋଲି ଅଭିଯୋଗ କରିଛନ୍ତି।
ତେବେ ହାଇକୋର୍ଟଙ୍କୁ ଚ୍ୟାଲେଞ୍ଜ କରି ସୁପ୍ରିମକୋର୍ଟଙ୍କ ଦ୍ଵାରସ୍ଥ ହୋଇଛନ୍ତି ଅମିତ। ଅନ୍ୟପଟେ ରାମ ଅବତାର ଜଗିଙ୍କ ପୁଅ ସତୀଶ ଯୋଗୀ ବାପାଙ୍କୁ ଆଜି ପ୍ରକୃତ ଶ୍ରଦ୍ଧାଞ୍ଜଳି ମିଳିଥିବା କହିଛନ୍ତି।