ଜଗତସିଂହପୁର, ୦୨/୦୭: ଜଗତସିଂହପୁର ଜିଲ୍ଲାର ୨୨ ମୌଜା ଅଞ୍ଚଳର ବିଶିଷ୍ଟ ବ୍ୟକ୍ତି ତଥା ବହୁଚର୍ଚ୍ଚିତ ସ୍ୱର୍ଗତ ଛବିରାଣୀଙ୍କ ସ୍ୱାମୀ ସ୍ୱର୍ଗତ ନବକିଶୋର ମହାପାତ୍ରଙ୍କ ଏକାଦଶାହ କାର୍ଯ୍ୟକ୍ରମ ସ୍ଥାନୀୟ ଅଞ୍ଚଳରେ ଶ୍ରଦ୍ଧା ଓ ଭକ୍ତିପୂର୍ଣ୍ଣ ପରିବେଶରେ ଅନୁଷ୍ଠିତ ହୋଇଯାଇଛି।
ଏହି ଅବସରରେ ଆୟୋଜିତ ସ୍ମୃତିଚାରଣ ସଭାରେ ଭାରତୀୟ ଜନତା ପାର୍ଟିର ବରିଷ୍ଠ ନେତା ଶ୍ରୀ ଗୋଲକ ମହାପାତ୍ର, ମାନ୍ୟବର ସାଂସଦ ଶ୍ରୀ ବିଭୁ ପ୍ରସାଦ ତରାଇ, ବିଜେପି ରାଜ୍ୟ ଉପସଭାପତି ଶ୍ରୀମତୀ ସିପ୍ରା ବାଜପେୟୀ, ତିର୍ତ୍ତୋଲ ବିଧାନସଭାର ପୂର୍ବତନ ପ୍ରାର୍ଥୀ ଶ୍ରୀ ରାଜକିଶୋର ବେହେରାଙ୍କ ସମେତ ବହୁ ସମାଜସେବୀ, ବୁଦ୍ଧିଜୀବୀ ଓ ମାନ୍ୟଗଣ୍ୟ ବ୍ୟକ୍ତି ଯୋଗଦେଇ ଦିବଙ୍ଗତ ନବକିଶୋର ମହାପାତ୍ରଙ୍କ ପ୍ରତି ପୁଷ୍ପମାଲ୍ୟ ଅର୍ପଣ କରି ଭକ୍ତିପୂର୍ଣ୍ଣ ଶ୍ରଦ୍ଧାଞ୍ଜଳି ଜଣାଇଥିଲେ। ଉପସ୍ଥିତ ନେତୃବୃନ୍ଦ ଶୋକସନ୍ତପ୍ତ ପରିବାରବର୍ଗଙ୍କୁ ସାକ୍ଷାତ କରି ସମବେଦନା ଜଣାଇବା ସହ ସାନ୍ତ୍ୱନା ପ୍ରଦାନ କରିଥିଲେ।
ସ୍ମୃତିଚାରଣ ସଭାରେ ନିଜର ପ୍ରତିକ୍ରିୟା ରଖି ଶ୍ରୀ ଗୋଲକ ମହାପାତ୍ର କହିଥିଲେ ଯେ, ସ୍ୱର୍ଗତ ଛବିରାଣୀଙ୍କୁ କେନ୍ଦ୍ର କରି ଘଟିଥିବା ସେହି ସମୟର ହତ୍ୟାକାଣ୍ଡ ଓଡ଼ିଶାର ଇତିହାସରେ ଏକ ହୃଦୟବିଦାରକ ଏବଂ ଅଭୁଲା ଅଧ୍ୟାୟ ଭାବେ ସ୍ମରଣୀୟ। ଏହି ଘଟଣା ସମଗ୍ର ରାଜ୍ୟରେ ନ୍ୟାୟ, ନାରୀ ସୁରକ୍ଷା ଏବଂ ସାମାଜିକ ସଚେତନତା ପ୍ରତି ଏକ ଗଭୀର ଆଲୋଚନା ଓ ଜାଗରଣର ସୂତ୍ରପାତ କରିଥିଲା। ଅନ୍ୟାୟ ବିରୋଧରେ ସ୍ୱର ଉଠାଇବା ଏବଂ ସମାଜରେ ନ୍ୟାୟ ପ୍ରତିଷ୍ଠା ପାଇଁ ସଦା ସଚେତନ ଓ ଦୃଢ଼ ରହିବା ପ୍ରତ୍ୟେକ ନାଗରିକଙ୍କର କର୍ତ୍ତବ୍ୟ ବୋଲି ସେ କହିଥିଲେ।
ଶେଷରେ ଉପସ୍ଥିତ ସମସ୍ତେ ମହାପ୍ରଭୁ ଶ୍ରୀଜଗନ୍ନାଥଙ୍କ ନିକଟରେ ସ୍ୱର୍ଗତ ନବକିଶୋର ମହାପାତ୍ରଙ୍କ ଅମର ଆତ୍ମାର ସଦ୍ଗତି ଓ ଚିରଶାନ୍ତି କାମନା କରିବା ସହ ଶୋକାକୁଳ ପରିବାରବର୍ଗଙ୍କୁ ଏହି ଅପୂରଣୀୟ କ୍ଷତି ସହିବା ପାଇଁ ଶକ୍ତି ଓ ସାହସ ପ୍ରଦାନ କରିବାକୁ ପ୍ରାର୍ଥନା କରିଥିଲେ।