ମମତା ବାନାର୍ଜୀଙ୍କ ଗାଡ଼ିକୁ କାଦୁଅ ଫିଙ୍ଗିବା ସହ ପଥର ମାଡ଼

କୋଲକାତା, ୦୯/୦୮: ପଶ୍ଚିମବଙ୍ଗର ଉତ୍ତର ୨୪ ପରଗନା ଜିଲ୍ଲାର ହାଲିଶାହାର/ବିଜପୁର ଅଞ୍ଚଳରେ ପୂର୍ବତନ ମୁଖ୍ୟମନ୍ତ୍ରୀ ତଥା ତୃଣମୂଳ କଂଗ୍ରେସ (ଟିଏମସି) ସୁପ୍ରିମୋ ମମତା ବାନାର୍ଜୀଙ୍କ କନଭୟ ଉପରେ ଆକ୍ରମଣ ହୋଇଛି। ପ୍ରତିବାଦକାରୀମାନେ ତାଙ୍କ ଗାଡ଼ିକୁ ଘେରି କାଦୁଅ ଫିଙ୍ଗିବା ସହ ଚପଲ, ଇଟା ଓ ପାଣି ବୋତଲ ମାଡ଼ କରିଥିଲେ। ଏପରିକି ଚୋର ଓ ଡକାୟତ ରାଣୀ ଭଳି ସ୍ଲୋଗାନ ଦେଇଥିଲେ। ହାଜତରେ ମୃତ୍ୟୁ ହୋଇଥିବା ଜଣେ ବ୍ୟକ୍ତିଙ୍କ ପରିବାରକୁ ଦେଖା କରିବାକୁ ଯିବା ବେଳେ ମମତା ବାନାର୍ଜୀ ଏଭଳି ପ୍ରତିବାଦକାରୀଙ୍କ ସାମ୍ନା କରିଛନ୍ତି।

ଟିଏମସି କର୍ମୀ ବିର୍ଜୁ କେଓଟଙ୍କ ମୃତ୍ୟୁ ପରେ ଏହି ଘଟଣା ଘଟିଛି। ସେ କାଞ୍ଚରାପାଡ଼ା ପୌରସଭାର ପୂର୍ବତନ ଟିଏମସି କରିଷଦ ଜେନି ଶର୍ମା କେଓଟଙ୍କ ସ୍ୱାମୀ ଥିଲେ। ଶୁକ୍ରବାର ହାଲିଶାହାର ପୋଲିସ ତାଙ୍କୁ ଅପହରଣ/ଅତ୍ୟାଚାର ଓ ଦୁର୍ନୀତି ଅଭିଯୋଗରେ ଗିରଫ କରିଥିଲେ। ଅଦାଲତ ତାଙ୍କୁ ୫ ଦିନର ପୋଲିସ ହେପାଜତରେ ରଖିଥିଲେ। ଶନିବାର ରାତିରେ ଲକ୍‌ଅପ୍‌ରେ ସେ ଅସୁସ୍ଥ ହୋଇପଡିଥିଲେ। ଏହା ପରେ ତାଙ୍କୁ ଜୱାହରଲାଲ ନେହେରୁ ହସ୍ପିଟାଲକୁ ନିଆଯାଇଥିଲା। କିନ୍ତୁ ଡାକ୍ତର ସେଠାରେ ତାଙ୍କୁ ମୃତ ଘୋଷଣା କରିଥିଲେ।

ପୋଲିସ ପକ୍ଷରୁ ହୃଦଘାତ କାରଣ ବୋଲି କୁହାଯାଉଥିବା ବେଳେ ପରିବାର ଲୋକେ ହାଜତରେ ନିର୍ଯାତନା ଓ ମାରପିଟ ଅଭିଯୋଗ କରିଛନ୍ତି। ଜେନି ଶର୍ମା କେଓଟ କହିଛନ୍ତି ଯେ ଶୁକ୍ରବାର ରାତି ୯-୧୦ଟା ସମୟରେ ସେ ଭଲ ଥିଲେ, କିନ୍ତୁ ପରେ ମାଡ଼ ମାରିବାରୁ ତାଙ୍କ ଶରୀରରେ କ୍ଷତ ଚିହ୍ନ ଓ କାନରୁ ରକ୍ତ ବାହାରିଥିବା ଦେଖାଯାଇଥିଲା।

ମମତା ବାନାର୍ଜୀ ରବିବାର ସେହି ପରିବାରକୁ ଭେଟିବା ପାଇଁ ଯାଉଥିଲେ। ତାଙ୍କ ସହ ଲୋକସଭା ସାଂସଦ କଲ୍ୟାଣ ବାନାର୍ଜୀ ଓ ରାଜ୍ୟସଭା ସାଂସଦ ଡୋଲା ସେନ ଥିଲେ। ବିଜପୁର/ହାଲିଶାହାର ଅଞ୍ଚଳରେ ପ୍ରତିବାଦକାରୀମାନେ ଗାଡ଼ିକୁ ଘେରି ଆକ୍ରମଣ କରିଥିଲେ। କାଦୁଅ ଫିଙ୍ଗିବା ସହ ଚପଲ ଓ ପଥର ମାଡ଼ କରିଥିଲେ। ପୋଲିସ ହସ୍ତକ୍ଷେପ କରି ସୁରକ୍ଷିତ ଭାବେ କନଭୟକୁ ବାହାର କରିଥିଲେ ଏବଂ ମମତା ମୃତକଙ୍କ ପରିବାରକୁ ଭେଟିଥିଲେ।

ଏହି ଘଟଣା ପରେ ମମତା ଗଣମାଧ୍ୟମରେ କହିଛନ୍ତି ଯେ, “ପୋଲିସ ସାମନାରେ ମୋ ଗାଡ଼ି ଉପରେ ବଡ଼ ବଡ଼ ପଥର ଫିଙ୍ଗାଯାଇଛି। ଯଦି ୱିଣ୍ଡୋ ଖୋଲା ରହିଥାନ୍ତା ତେବେ ମୋ ମୁଣ୍ଡ ଫାଟି ଯାଇଥାନ୍ତା। ଆମେ ସମସ୍ତେ ମରି ଯାଇଥାନ୍ତୁ। ଏହା ପୋଲିସ ସାମନାରେ ଘଟିଛି। ମୁଁ ଏପରି କେବେ ଦେଖିନାହିଁ। ପୋଲିସ ବିଜେପିକୁ ସୁରକ୍ଷା ଦେଉଛନ୍ତି।”

ସେ ଏହାକୁ ଷଡ଼ଯନ୍ତ୍ର ବୋଲି କହି ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀ ଓ ବିଜେପି ସରକାରଙ୍କୁ ଦୋଷ ଦେଇଛନ୍ତି। କଲ୍ୟାଣ ବାନାର୍ଜୀ ଏହାକୁ ହତ୍ୟା କରିବା ପାଇଁ ଚେଷ୍ଟା ବୋଲି କହିଛନ୍ତି।

ପଶ୍ଚିମବଙ୍ଗ ବିଜେପି ଅଧ୍ୟକ୍ଷ ସମିକ ଭଟ୍ଟାଚାର୍ଯ୍ୟ ଘଟଣାର ନିନ୍ଦା କରି ଦଳର ସମ୍ପୃକ୍ତିକୁ ଅସ୍ୱୀକାର କରିଛନ୍ତି। ସେ କହିଛନ୍ତି ଯେ କାଦୁଅ ଓ ଚପଲ ଫିଙ୍ଗିବାକୁ ବିଜେପି ସମର୍ଥନ କରେ ନାହିଁ ଏବଂ ଏପରି କାର୍ଯ୍ୟ ରାଜ୍ୟର ଭାବମୂର୍ତ୍ତିକୁ ଖରାପ କରୁଛି।