କଟକ: ମୁକୁଳା ଡ୍ରେନରେ ପଡ଼ି ଯୁବକଙ୍କ ମୃତ୍ୟୁ

କଟକ: କଟକର ଝୋଲା ସାହିରେ ଖୋଲା ଡ୍ରେନରେ ପଡ଼ି ଜଣେ ଯୁବକଙ୍କ ମୃତ୍ୟୁ ଘଟିଛି। ମୃତ ଯୁବକଙ୍କ ନାମ ରାହୁଲ ଓ ସେ ରାଜସ୍ଥାନର ବାସିନ୍ଦା ବୋଲି ଜଣାପଡ଼ିଛି। ମିଳିଥିବା ସୂଚନା ଅନୁଯାୟୀ, ଗତକାଲି ରାହୁଲ ନିଜ ସମ୍ପର୍କୀୟଙ୍କୁ ଭେଟିବା ପାଇଁ କଟକ ଆସିଥିଲେ କିନ୍ତୁ ଗତକାଲି ଡ୍ରେନରେ ପଡ଼ି ତାଙ୍କର ମୃତ୍ୟୁ ଘଟିଥିଲା। ଗତକାଲି ପ୍ରବଳ ବର୍ଷା ହେଉଥିବାରୁ ଅନେକ ତଳିଆ ଅଞ୍ଚଳ ଜଳମଗ୍ନ ହୋଇ ଯାଇଥିଲା। ତେବେ ଝୋଲା ସାହିରେ ଏକ ଚା’ ଦୋକାନକୁ ଯିବା ସମୟରେ ଜାଣି ନପାରି ଏକ ମୁକୁଳା ଡ୍ରେନରେ ପଡି ଯାଇଥିଲେ। ଅନ୍ୟପକ୍ଷରେ ଯୁବକଙ୍କ ବାପା ଆଜି ପୁରୀଘାଟ ଥାନାରେ ଏ ନେଇ ଅଭିଯୋଗ କରିଛନ୍ତି।

ଏ ନେଇ ସ୍ଥାନୀୟ କର୍ପୋରେଟର ଗଗନ ଓଝା କହିଛନ୍ତି, ଏହା ସରକାର ଓ ଜିଲ୍ଲା ପ୍ରଶାସନର ସମ୍ପୂର୍ଣ୍ଣ ବିଫଳତା। ସେମାନେ ବଡ଼ ବଡ଼ ଦାବି କରନ୍ତି, କିନ୍ତୁ ଖୋଲା ଡ୍ରେନ୍ ବାସ୍ତବତାକୁ ପଦାରେ ପକାଇଥାଏ। ପୂର୍ବରୁ ମୁଁ ନିଜେ କମିଶନରଙ୍କୁ ଘଟଣାସ୍ଥଳକୁ ନେଇ ସ୍ଲାବ୍ ଲଗାଇବାକୁ ଅନୁରୋଧ କରିଥିଲି। ଏପରିକି ପୁନରୁଦ୍ଧାର କାର୍ଯ୍ୟ ପାଇଁ ସେମାନେ ୧.୪ କୋଟି ଟଙ୍କା ପ୍ରସ୍ତୁତ କରିଥିଲେ। ତେବେ ସେମାନେ ଟଙ୍କା ଅଟକାଇ କଟକ ମହାନଗର ନିଗମ ଅଞ୍ଚଳରେ କାମ ପାଇଁ ଜାଇକା ଟେଣ୍ଡର ନେଇଥିବା କହିଥିଲେ। କିନ୍ତୁ ଜାଇକା କଟକରେ କୌଣସି କାମ କରିବାରେ ସମ୍ପୂର୍ଣ୍ଣ ବିଫଳ ହୋଇଛି। ଏଭଳି ଅବହେଳା ଜାରି ରହିଲେ ଆହୁରି ଅନେକ ଲୋକଙ୍କ ମୃତ୍ୟୁ ଘଟିବ ଏବଂ ଏଥିପାଇଁ ପ୍ରଶାସନ ଦାୟୀ ରହିବ ବୋଲି ସେ କହିଛନ୍ତି।