୧୬ରେ ବାରବାଟୀରେ ଅନୁଷ୍ଠିତ ହେବ ସିସିଏଲ

ମୁମ୍ବାଇ, ୧୨/୦୨: ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ବିଧାନସଭାରେ ଭେଟିଛନ୍ତି ବଲିଉଡର ଲୋକପ୍ରିୟ ଅଭିନେତା ଅର୍ଜୁନ କପୁର ଓ ପ୍ରଯୋଜକ ବୋନି କପୁର। ଏହା ସହ କ୍ରୀଡ଼ା ଓ ଯୁବସେବା ମନ୍ତ୍ରୀ ସୂର୍ଯ୍ୟବଂଶୀ ସୁରଜଙ୍କୁ ମଧ୍ୟ ସାକ୍ଷାତ କରିଥିବା ସୂଚନା ମିଳିଛି। ମୁଖ୍ୟମନ୍ତ୍ରୀଙ୍କୁ ସୌଜନ୍ୟମୂଳକ ସାକ୍ଷାତ କରିବା ସହ ଆସନ୍ତା ୧୬ ତାରିଖରେ କଟକ ବାରବାଟୀ ଷ୍ଟାଡିୟମରେ ହେବାକୁ ଥିବା ସେଲିବ୍ରିଟି କ୍ରିକେଟ ଲିଗ୍ ରେ ଯୋଗ ଦେବା ପାଇଁ ମୁଖ୍ୟମନ୍ତ୍ରୀଙ୍କୁ ନିମନ୍ତ୍ରଣ କରିଛନ୍ତି।

ଉଲ୍ଲେଖଯୋଗ୍ୟ, ଆସନ୍ତା ଫେବ୍ରୁଆରି ୧୬ ତାରିଖରେ ସେଲିବ୍ରିଟି କ୍ରିକେଟ ଲିଗ୍ (ସିସିଏଲ୍) ଅନୁଷ୍ଠିତ ହେବାକୁ ଯାଉଛି। ଏଥର କଟକର ବାରବାଟୀ ଷ୍ଟାଡିୟମରେ ଖେଳାଯିବ ଏହି ରୋମାଞ୍ଚକର ମ୍ୟାଚ।

ପଞ୍ଜାବ ଦେ ଶେର ବନାମ ଭୋଜପୁରୀ ଦବଙ୍ଗ୍ସ: ଅପରାହ୍ନ ୨ଟାରୁ ସନ୍ଧ୍ୟା ୬ଟା

ମୁମ୍ବାଇ ହିରୋଜ୍ ବନାମ ବେଙ୍ଗଲ ଟାଇଗର୍ସ: ସନ୍ଧ୍ୟା ୬ଟା ୩୦ରୁ ରାତି ସାଢ଼େ ୧୦ଟା

ପଞ୍ଜାବ ଦେ ଶେର ର ଅଧିନାୟକତ୍ୱ ଦାୟିତ୍ୱ ତୁଲାଇବେ ଜଣାଶୁଣା ଅଭିନେତା ସୋନୁ ସୁଡ। ଭୋଜପୁରୀ ଦବଙ୍ଗ୍ସର ଅଧିନାୟକ ଭୋଜପୁରୀ ଫିଲ୍ମ ଇଣ୍ଡଷ୍ଟ୍ରିର ଜଣାଶୁଣା ଅଭିନେତା ତଥା ଗାୟକ ମନୋଜ ତିୱାରୀ। ମୁମ୍ବାଇ ହିରୋଜ ର ଅଧିନାୟକ ହେଉଛନ୍ତି ବଲିଉଡର ଲୋକପ୍ରିୟ ଅଭିନେତା ରିତେଶ ଦେଶମୁଖ। ବେଙ୍ଗଲ ଟାଇଗର୍ସ ର ଅଧିନାୟକ ହେଉଛନ୍ତି ଜିଶୁ ସେନଗୁପ୍ତା।

ସୂଚନାଯୋଗ୍ୟ, ୨୦୧୧ରେ ପ୍ରଥମେ ଆରମ୍ଭ ହୋଇଥିଲା ସିସିଏଲ। ୨୦୧୩-୧୪ରେ କଟକ ବାରବାଟୀ ଷ୍ଟାଡିୟମରେ ଏହି ମ୍ୟାଚ୍ ଖେଳା ଯାଇଥିଲା। ଏହାକୁ ବହୁ ଲୋକପ୍ରିୟତା ମିଳୁଥିବା ହେତୁ ଆଗାମୀ ଦିନରେ ଓଡ଼ିଆ ସିନେ ଷ୍ଟାର ଟିମକୁ ସାମିଲ କରିବାକୁ ମ୍ୟାନେଜମେଣ୍ଟ ବିଚାର କରୁଛି। ଭାରତର ବିଭିନ୍ନ ପ୍ରାନ୍ତର ଚଳଚ୍ଚିତ୍ର ଜଗତର ସେଲିବ୍ରିଟିମାନଙ୍କୁ ନେଇ ଏହି ସିସିଏଲ ମ୍ୟାଚ ଖେଳା ଯାଇଥାଏ।