ଚେତୁ ନାହାନ୍ତି ସରକାରୀ କର୍ମଚାରୀ

ନବରଙ୍ଗପୁର, ୨୩/୦୨: ବାରମ୍ବାର ଧରପଗଡ ହେଉଥିଲେ ବି ଚେତୁ ନାହାନ୍ତି ସରକାରୀ ଅଧିକାରୀ। କୌଣସି ସରକାରୀ କାର୍ଯ୍ୟ କରାଇଦେବା ପାଇଁ ସାଧାରଣ ଲୋକଙ୍କଠାରୁ ଲାଞ୍ଚ ନେବାରେ ଅଭ୍ୟସ୍ତ ହେଉଛନ୍ତି। ଭିଜିଲାନ୍ସ ପକ୍ଷରୁ ଚଢ଼ାଉ କରାଗଲେ ମଧ୍ୟ ଲୋଭର ବଶବର୍ତ୍ତୀ ହୋଇ ଲାଞ୍ଚ ନେବାକୁ ପଛଘୁଞ୍ଚା ଦେଉନାହାନ୍ତି।

ଆଜି ସେଭଳି ଏକ ଲାଞ୍ଚ କାରବାର ସମୟରେ ଦୁଇ ସରକାରୀ କର୍ମଚାରୀଙ୍କୁ ଧରିଛି ଭିଜିଲାନ୍ସ। ଭିଜିଲାନ୍ସ ଜାଲରେ ଛନ୍ଦି ହୋଇଛନ୍ତି ନବରଙ୍ଗପୁର ଜିଲ୍ଳାର ଉମରକୋଟ କୃଷି ବିଭାଗ କାର୍ଯ୍ୟାଳୟର ଦୁଇ କର୍ମଚାରୀ। ଲାଞ୍ଚ ନେଉଥିବା ବେଳେ ଦୁଇ ସରକାରୀ କର୍ମଚାରୀଙ୍କୁ ଧରିଛି ଭିଜିଲାନ୍ସ। ଦୁଇ କର୍ମଚାରୀ ହେଲେ ଅତିରିକ୍ତ କୃଷି ଅଧିକାରୀ ନିଳକଣ୍ଠ ପରିଡ଼ା ଏବଂ ଡାଟା ଏଣ୍ଟ୍ରି ଅପରେଟର ସୁରେନ୍ଦ୍ର ସିଂ ବୁନ୍ଦେଲ।

ଜଣେ ଚାଷୀଙ୍କ ଠାରୁ ଜଳନିଧି ଯୋଜନାରେ ସବସିଡି କରାଇ ଦେବା ପାଇଁ ୫ ହଜାର ଟଙ୍କା ଲାଞ୍ଚ ନେଉଥିଲେ। ଜଳନିଧି ଯୋଜନାରେ ଉମରକୋଟ ବ୍ଲକ ଜମରେଣ୍ଡାର ଚାଷୀ ଲକ୍ଷ୍ମୀଧର ମାଝୀଙ୍କ ଜମିରେ ବୋରୱେଲ ସବସିଡି କରାଇ ଦେବା ପାଇଁ ୫ ହଜାର ମାଗିଥିଲେ। ଏ ନେଇ ସମ୍ପୃକ୍ତ ଚାଷୀ ଭିଜିଲାନ୍ସର‌ ଦ୍ୱାରସ୍ଥ ହୋଇଥିଲେ। ଯୋଜନା ମୁତାବକ ଭିଜିଲାନ୍ସ ଅଧିକାରୀମାନେ ଦୁଇ ସରକାରୀ କର୍ମଚାରୀଙ୍କୁ ରେଡ୍ ହ୍ୟାଣ୍ଡ ଧରିବା ପାଇଁ ଜାଲ ବୁଣିଥିଲେ। ଦୁଇ ଜଣ ଲାଞ୍ଚ ନେଉଥିବା ବେଳେ ସେମାନଙ୍କୁ ମାଡ଼ି ବସିଛି ଭିଜିଲାନ୍ସ। ସେମାନଙ୍କ ଠାରୁ ଲାଞ୍ଚ ଟଙ୍କା ଜବତ କରିବା ସହ ଦୁଇ ଜଣଙ୍କୁ ଗିରଫ କରିଛି ଭିଜିଲାନ୍ସ। ଅଧିକ ତଦନ୍ତ ଜାରି ରହିଛି।