ମହିଳାଙ୍କୁ ସମର୍ପିତ ହେବ ପ୍ରଧାନମନ୍ତ୍ରୀଙ୍କ ସୋସିଆଲ ମିଡିଆ ସାଇଟ

ନୂଆଦିଲ୍ଲୀ, ୨୩/୦୨: ମାର୍ଚ୍ଚ ୮ ତାରିଖରେ ଅନ୍ତର୍ଜାତୀୟ ମହିଳା ଦିବସ ଅବସରରେ ନିଜର ସୋସିଆଲ ମିଡିଆ ଆକାଉଣ୍ଟକୁ ଗୋଟିଏ ଦିନ ପାଇଁ କିଛି ପ୍ରେରଣାଦାୟୀ ମହିଳାଙ୍କୁ ହସ୍ତାନ୍ତର କରିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ବିଭିନ୍ନ କ୍ଷେତ୍ରରେ ପାରଦର୍ଶିତା ଲଭିଥିବା ମହିଳାମାନେ ମୋଦିଙ୍କ ସୋସିଆଲ ମିଡ଼ିଆ ଆକାଉଣ୍ଟ ଯେପରିକି ଏକ୍ସ ଓ ଇନଷ୍ଟାଗ୍ରାମ ଭଳି ସାଇଟ ସମ୍ଭାଳିବେ।

୧୧୯ତମ ‘ମନ୍ କି ବାତ୍’ ଅଭିଭାଷଣରେ ଆଜି ପ୍ରଧାନମନ୍ତ୍ରୀ ଏହି ଘୋଷଣା କରି କହିଛନ୍ତି, ଏଥର ମହିଳା ଦିବସରେ ମୁଁ ଗୋଟିଏ ଦିନ ପାଇଁ ଏକ ପଦକ୍ଷେପ ନେବାକୁ ଯାଉଛି, ଯାହା ଆମ ନାରୀ-ଶକ୍ତିକୁ ସମର୍ପିତ ହେବ। ଏହି ବିଶେଷ ଅବସରରେ ମୁଁ ଏକ୍ସ ଏବଂ ଇନଷ୍ଟାଗ୍ରାମ ଭଳି ମୋର ସୋସିଆଲ ମିଡିଆ ଆକାଉଣ୍ଟଦେଶର କିଛି ପ୍ରେରଣାଦାୟୀ ମହିଳାଙ୍କୁ ହସ୍ତାନ୍ତର କରିବି। ଯେଉଁ ମହିଳାମାନେ ବିଭିନ୍ନ କ୍ଷେତ୍ରରେ ସଫଳତା ହାସଲ କରିଛନ୍ତି; ଯେଉଁମାନେ ନିଜ ପାଇଁ ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିଛନ୍ତି। ମାର୍ଚ୍ଚ ୮ ତାରିଖରେ ସେମାନେ ନିଜ କାର୍ଯ୍ୟ ଓ ଅନୁଭୂତି ଦେଶବାସୀଙ୍କ ସହ ବାଣ୍ଟିବେ। ପ୍ଲାଟଫର୍ମ ମୋର ହୋଇପାରେ, କିନ୍ତୁ ଏହା ସେମାନଙ୍କ ଅନୁଭୂତି, ସେମାନଙ୍କ ଆହ୍ୱାନ ଏବଂ ସେମାନଙ୍କ ସଫଳତା ବିଷୟରେ ହେବ ବୋଲି ମୋଦି କହିଛନ୍ତି।