ଓଡ଼ିଆ ଅସ୍ମିତା ଓ ସାଂସ୍କୃତିକ ଐତିହ୍ୟର ସୁରକ୍ଷା ଆମ ସମସ୍ତଙ୍କ ଦାୟିତ୍ୱ: ଗୋଲକ ମହାପାତ୍ର

ଭୁବନେଶ୍ୱର, ୨୨/୦୯: ଓଡ଼ିଶାର ଗୌରବମୟ କଳା, ସାହିତ୍ୟ ଓ ସଂସ୍କୃତିକୁ ସମ୍ମାନ, ସଂରକ୍ଷଣ ଓ ନୂଆ ପିଢ଼ି ନିକଟରେ ପହଞ୍ଚାଇବାର ଉଦ୍ଦେଶ୍ୟରେ WOMEN EMPOWERMENT FOUNDATION TRUST ପକ୍ଷରୁ ଆୟୋଜିତ “ଓଡ଼ିଆ ସାଂସ୍କୃତିକ ବ୍ୟକ୍ତିତ୍ୱ ସମ୍ମାନ ଉତ୍ସବ–୨୦୨୬”ରେ ବିଜେପିର ବରିଷ୍ଠ ନେତା ଶ୍ରୀ ଗୋଲକ ମହାପାତ୍ର ଯୋଗଦେଇଥିଲେ।

ଓଡ଼ିଆ ମାଟିର ସୁଗନ୍ଧ, ଓଡ଼ିଆ ଭାଷାର ମାଧୁର୍ଯ୍ୟ ଏବଂ ଆମ ସମୃଦ୍ଧ ସାଂସ୍କୃତିକ ପରମ୍ପରାର ଗୌରବକୁ ପ୍ରତିଫଳିତ କରୁଥିବା ଏହି ଉତ୍ସବରେ ବିଭିନ୍ନ କ୍ଷେତ୍ରର ବିଶିଷ୍ଟ ପ୍ରତିଭାଙ୍କୁ ସମ୍ମାନିତ କରାଯାଇଥିଲା।

କାର୍ଯ୍ୟକ୍ରମରେ ମୁଖ୍ୟ ଅତିଥି ପଦ୍ମଶ୍ରୀ ଶିଶିର ମିଶ୍ର, ସ୍ୱତନ୍ତ୍ର ଅତିଥି ଶ୍ରୀ ଅଜିତ୍ ପଟ୍ଟନାୟକ, ମୁଖ୍ୟ ବକ୍ତା ଡ. ଶ୍ରଦ୍ଧାଞ୍ଜଳୀ ରାୟ, ସମ୍ମାନିତ ଅତିଥି ଶ୍ରୀ ଭାରତେନ୍ଦୁ ମହାପାତ୍ରଙ୍କ ସମେତ ଶ୍ରୀ ବ୍ରଜକିଶୋର ପ୍ରଧାନ ଓ ଶ୍ରୀ ସର୍ବେଶ୍ୱର ବେହୁରାଙ୍କ ଉପସ୍ଥିତି ଉତ୍ସବର ଗରିମାକୁ ଆହୁରି ବଢ଼ାଇଥିଲା।

ଏହି ଅବସରରେ ଶ୍ରୀ ଗୋଲକ ମହାପାତ୍ର କହିଥିଲେ, “ଓଡ଼ିଆ ଭାଷା, ସାହିତ୍ୟ, କଳା ଓ ସଂସ୍କୃତି କେବଳ ଆମର ପରିଚୟ ନୁହେଁ, ଏହା ଆମ ଅସ୍ତିତ୍ୱ ଓ ଆମ ଗୌରବର ଆଧାର। ଆମ ପୂର୍ବପୁରୁଷମାନେ ଯେଉଁ ସମୃଦ୍ଧ ଐତିହ୍ୟ ଆମକୁ ଦେଇଯାଇଛନ୍ତି, ତାହାକୁ ସୁରକ୍ଷିତ ରଖି ଆଗାମୀ ପିଢ଼ିକୁ ହସ୍ତାନ୍ତର କରିବା ଆମ ସମସ୍ତଙ୍କର ଦାୟିତ୍ୱ।”

ସେ ଆହୁରି କହିଥିଲେ ଯେ, ଓଡ଼ିଆ ସଂସ୍କୃତିର ବିକାଶ ଓ ପ୍ରଚାର-ପ୍ରସାର ପାଇଁ କଳାକାର, ସାହିତ୍ୟିକ, ସଂସ୍କୃତିପ୍ରେମୀ ଓ ସମାଜର ସମସ୍ତ ବର୍ଗଙ୍କର ସକ୍ରିୟ ସହଯୋଗ ଆବଶ୍ୟକ। ନିଜ କର୍ମ ଓ ପ୍ରତିଭା ମାଧ୍ୟମରେ ଓଡ଼ିଆ ଭାଷା ଓ ସଂସ୍କୃତିର ସେବା କରୁଥିବା ବ୍ୟକ୍ତିତ୍ୱମାନଙ୍କୁ ସମ୍ମାନ ଦେବା ଦ୍ୱାରା ସମାଜରେ ସୃଜନଶୀଳତା ଓ ସାଂସ୍କୃତିକ ଚେତନା ଆହୁରି ସୁଦୃଢ଼ ହେବ।

“ଆମ ଭାଷାର ଗର୍ବ, ଆମ ମାଟିର ଗୌରବ ଓ ଆମ ସଂସ୍କୃତିର ଅସ୍ମିତାକୁ ବିଶ୍ୱ ଦରବାରରେ ଆହୁରି ଉଜ୍ଜ୍ୱଳ କରିବା ଦିଗରେ ଏଭଳି ଆୟୋଜନ ଏକ ସକାରାତ୍ମକ ପଦକ୍ଷେପ”, ବୋଲି ଶ୍ରୀ ମହାପାତ୍ର ପ୍ରକାଶ କରିଥିଲେ।

ଏଭଳି ସାଂସ୍କୃତିକ ଆୟୋଜନ ମାଧ୍ୟମରେ ଓଡ଼ିଆ ଐତିହ୍ୟ, ପରମ୍ପରା ଓ ପ୍ରତିଭାକୁ ସମ୍ମାନ ମିଳିବା ସହ ଯୁବପିଢ଼ି ନିଜ ମାଟି, ଭାଷା ଓ ସଂସ୍କୃତି ସହ ଆହୁରି ନିକଟତର ହେବାର ସୁଯୋଗ ପାଇବେ।