ସାଇବର ଠକେଇର ଶିକାର ବୃଦ୍ଧ ଦମ୍ପତି

ବେଲଗାବି, ୨୯/୦୩: ସାଇବର ଠକେଇର ଶିକାର ହେଲେ କର୍ଣ୍ଣାଟକର ବୃଦ୍ଧ ଦମ୍ପତି। ସାଇବର ଅପରାଧୀ ମାନେ ଧମକ ଦେଇ ନେଇଗଲେ ୫୦ ଲକ୍ଷ ଟଙ୍କା। ବହୁ ପରିମାଣର ଠକେଇର ଶିକାର ହେବା ପରେ ମାନସିକ ଉତ୍ପୀଡନ ଏତେ ବଢ଼ିଗଲା ଯେ, ଶେଷରେ ଆତ୍ମହତ୍ୟା ଭଳି ଚରମ ପଦକ୍ଷେପ ଗ୍ରହଣ କଲେ। ଏଭଳି ଏକ ହୃଦୟ ବିଦାରକ ଘଟଣା ଘଟିଛି କର୍ଣ୍ଣାଟକର ବେଲଗାବି ଜିଲ୍ଲାର ନନ୍ଦଗଡ ଗାଁରେ।

ସୂଚନା ଅନୁଯାୟୀ, ନନ୍ଦଗଡ ଗାଁରେ ଦିୟାଙ୍ଗୋ ନଜରତ (୮୩) ପତ୍ନୀ ପ୍ଲେଭିଆନା ନଜରତ (୭୯) ଙ୍କ ସହ ରହୁଥିଲେ। ସେ ମହାରାଷ୍ଟ୍ର ସଚିବାଳୟରେ ପୂର୍ବରୁ କାର୍ଯ୍ୟ କରି ଅବସର ନେଇଥିଲେ। ତାଙ୍କର ନିଜର କେହି ସନ୍ତାନ ନଥିବା ବେଳେ କୌଣସି ଘନିଷ୍ଠ ସମ୍ପର୍କୀୟ ମଧ୍ୟ ନାହାନ୍ତି। ଗତ କିଛି ଦିନ ତଳେ ସାଇବର ଅପରାଧୀମାନେ ତାଙ୍କୁ ଦିଲ୍ଲୀ କ୍ରାଇମବ୍ରାଞ୍ଚର ଅଧିକାରୀ ବୋଲି ପରିଚୟ ଦେଇ ଭିଡ଼ିଓ କଲ କରିଥିଲେ ଏବଂ ମିଥ୍ୟା ମାମଲାରେ ଫସାଇ ଦେବେ ବୋଲି ଧମକ ଦେଇଥିଲେ। ସେମାନଙ୍କ ପରିଚୟ ପତ୍ର ଓ ମୋବାଇଲ ନମ୍ବର ଚୋରି ହୋଇ କୌଣସି ଅପରାଧିକ କାର୍ଯ୍ୟକଳାପରେ ଲାଗିଥିବା କହିଥିଲେ। ତେଣୁ ଏହାକୁ ସେଟଲମେଣ୍ଟ କରାଇବା ପାଇଁ ୫ ଲକ୍ଷ ଟଙ୍କା ମାଗିଥିଲେ। ଦମ୍ପତି ଏହି ପରିମାଣର ଟଙ୍କା ଦେବା ସହ ପୁଣି ଆହୁରି ଅଧିକ ବିଭିନ୍ନ ଆଳରେ ଟଙ୍କା ଲୁଟି ନେଇଥିଲେ। ଏହିପରି ଭାବେ ମୋଟ ୫୦ ଲକ୍ଷ ଟଙ୍କା ଲୁଟି ନେଇଥିଲେ ସାଇବର ଅପରାଧୀ। ନିଜ ଜୀବନ କାଳରେ ସଞ୍ଚୟ କରି ରଖିଥିବା ଧନ ଲୁଟ୍ ହୋଇଯିବା ପରେ ଚାପଗ୍ରସ୍ତ ରହୁଥିଲେ ଉଭୟ। ଅନ୍ୟୋପାୟ ନ ପାଇ ଶେଷରେ ଦୁହେଁ ଆତ୍ମହତ୍ୟା ଭଳି ଚରମ ପଦକ୍ଷେପ ନେଲେ। ଦିୟାଙ୍ଗୋ ନଜରତ ଗଳା କାଟି ଆତ୍ମହତ୍ୟା କରିଥିବା ବେଳେ ପତ୍ନୀ ପ୍ଲେଭିଆନା ନଜରତ (୭୯) ବିଷ ପିଇ ଆତ୍ମହତ୍ୟା କରିଛନ୍ତି।

ଏ ସଂକ୍ରାନ୍ତରେ ଖବର ପାଇ ପୋଲିସ ପହଞ୍ଚିବା ପରେ ଏହା ଏକ ହତ୍ୟାକାଣ୍ଡ ବୋଲି ଅନୁମାନ କରୁଥିଲେ। ହେଲେ, ଘରୁ ଏକ ସୁଇସାଇଡ ନୋଟ୍ ମିଳିବା ପରେ ଏହା ଆତ୍ମହତ୍ୟା ବୋଲି ଜଣା ପଡ଼ିଥିଲା। ଏହି ସୁଇସାଇଡ ନୋଟରେ ଏହି ଠକାମୀର ଘଟଣାବଳୀ ଲେଖା ହୋଇଛି।