ନୂଆଦିଲ୍ଲୀ, ୨୮/୦୧: ଭାରତ-ୟୁରୋପୀୟ ସଂଘ ମଧ୍ୟରେ ଐତିହାସିକ ଚୁକ୍ତି ସ୍ବାକ୍ଷରିତ ହୋଇଛି। ଉଭୟ ପକ୍ଷ ମଧ୍ୟରେ ଐତିହାସିକ ମୁକ୍ତ ବାଣିଜ୍ୟ ଚୁକ୍ତି ସ୍ବାକ୍ଷରିତ ହୋଇଛି। ଗତ କାଲି ଏହି ଐତିହାସିକ ଚୁକ୍ତି ହୋଇଥିବା ନେଇ ଘୋଷଣା କଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଭାରତ ଗସ୍ତରେ ଥିବା ୟୁରୋପୀୟ କମିଶନର ଅଧ୍ୟକ୍ଷ ଉର୍ସୁଲା ଭନ୍ ଡେର ଲେଏନ୍ ଏବଂ ୟୁରୋପୀୟ ପରିଷଦର ଅଧ୍ୟକ୍ଷ ଆଣ୍ଟୋନିଓ କୋଷ୍ଟାଙ୍କ ସହ ଏକ ମିଳିତ ସାମ୍ବାଦିକ ସମ୍ମିଳନୀରେ ପ୍ରଧାନମନ୍ତ୍ରୀ ମୋଦି ଏହି ଦିନକୁ “ଐତିହାସିକ” ବୋଲି କହିଛନ୍ତି।
ଏହି ଡିଲ୍ ମଧ୍ୟରେ ସବୁଠୁ ଗୁରୁତ୍ୱପୂର୍ଣ୍ଣ ହେଉଛି ଅଟୋ ମୋବାଇଲ କ୍ଷେତ୍ର। ଚୁକ୍ତି ଅନୁଯାୟୀ, ଭାରତ ଧୀରେ ଧୀରେ ୟୁରୋପୀୟ କାରଗୁଡ଼ିକ ଉପରେ ଶୁଳ୍କ ହ୍ରାସ କରି ୧୦% କରିବ, ଯାହାକି ବର୍ତ୍ତମାନ ୭୦% ଶୁଳ୍କ ଦେବାକୁ ପଡ଼ୁଛି। ଏହି ପରିବର୍ତ୍ତନ ମାଧ୍ୟମରେ ପ୍ରତିବର୍ଷ ୨ ଲକ୍ଷ ୫୦ ହଜାର ଯାନର କୋଟା ଲାଗୁ ହେବ।
ଭାରତକୁ ଆସୁଥିବା ୯୦% ରୁ ଅଧିକ EU ସାମଗ୍ରୀ ଉପରେ ଶୁଳ୍କ ହ୍ରାସ କରାଯିବ। ବ୍ରସେଲ୍ସ ଆଶା କରୁଛି ଯେ ଏହି ଚୁକ୍ତି ୨୦୩୨ ସୁଦ୍ଧା ଭାରତରେ EU ରପ୍ତାନିକୁ ଦ୍ୱିଗୁଣିତ କରିବ ଏବଂ ପ୍ରତିବର୍ଷ ୪ ବିଲିୟନ ୟୁରୋ ପର୍ଯ୍ୟନ୍ତ ଶୁଳ୍କ ସଞ୍ଚୟ କରିବ। ବର୍ତ୍ତମାନ ଯେଉଁ ଯନ୍ତ୍ରପାତିଗୁଡ଼ିକ ୪୪% ପର୍ଯ୍ୟନ୍ତ ଶୁଳ୍କ, ରାସାୟନିକ ପଦାର୍ଥ ୨୨% ପର୍ଯ୍ୟନ୍ତ ଏବଂ ଔଷଧ ପ୍ରାୟ ୧୧% ଶୁଳ୍କ ରହୁଛି, ସେହି ଶୁଳ୍କଗୁଡିକୁ ପ୍ରାୟତଃ ଉଚ୍ଛେଦ କରାଯିବ।
ବିମାନ ଏବଂ ମହାକାଶଯାନ ପାଇଁ ସମ୍ପୂର୍ଣ୍ଣ ଶୁଳ୍କ ହଟାଇ ଦିଆଯିବ। ଅପ୍ଟିକାଲ୍, ମେଡିକାଲ୍ ଏବଂ ସର୍ଜିକାଲ୍ ଉପକରଣରୁ ୯୦% ଉତ୍ପାଦ ପାଇଁ ଶୁଳ୍କ ହଟାଇ ଦିଆଯିବ, ଯାହା ଭାରତରେ ହସ୍ପିଟାଲ୍ ଏବଂ ଡାଇଗ୍ନୋଷ୍ଟିକ୍ସ ପାଇଁ ଖର୍ଚ୍ଚ ହ୍ରାସ କରିପାରିବ।
ଖାଦ୍ୟ ଏବଂ ପାନୀୟ ମଧ୍ୟ ଏକ ବଡ଼ ପରିବର୍ତ୍ତନ ପାଇବ। ଭାରତ ୟୁରୋପୀୟ ମଦ ଉପରେ ଶୁଳ୍କ ୨୦ରୁ ୩୦%, ସ୍ପିରିଟ୍ ୪୦% ଏବଂ ବିୟର ଉପରେ ୫୦% ହ୍ରାସ କରିବ। EU ରୁ ଅଲିଭ୍ ତେଲ, ମାର୍ଜାରିନ୍ ଏବଂ ପନିପରିବା ତେଲ ଉପରେ ଶୁଳ୍କ ହ୍ରାସ କିମ୍ବା ସମାପ୍ତ କରାଯିବ।
ଗ୍ରୀନହାଉସ୍ ଗ୍ୟାସ ନିର୍ଗମନ ହ୍ରାସ କରିବା ଏବଂ ଜଳବାୟୁ ଅନୁକୂଳ ନିବେଶକୁ ପ୍ରୋତ୍ସାହିତ କରିବା ପାଇଁ ଭାରତର ପ୍ରୟାସକୁ ସମର୍ଥନ କରିବା ପାଇଁ EU ଆଗାମୀ ଦୁଇ ବର୍ଷ ମଧ୍ୟରେ ୫୦୦ ନିୟୁତ ୟୁରୋ ଉପଯୋଗ କରିବ।
ୟୁରୋପୀୟ ସଂଘ ସାତ ବର୍ଷ ମଧ୍ୟରେ ୯୯.୫% ବାଣିଜ୍ୟ ସାମଗ୍ରୀ ଉପରେ ଆମଦାନୀ ଶୁଳ୍କ ହ୍ରାସ କରିବ। ଏଥିରେ ଭାରତୀୟ ସାମୁଦ୍ରିକ ଉତ୍ପାଦ, ଚମଡା ଏବଂ ବୟନ ସାମଗ୍ରୀ, ରାସାୟନିକ ପଦାର୍ଥ, ରବର ଏବଂ ଅଳଙ୍କାର ଉପରେ ଶୁଳ୍କ ଶୂନ୍ୟ କରାଯିବ।
ଏହାକୁ ମଦର୍ ଅଫ୍ ଅଲ୍ ଡିଲ୍ କହି ସ୍ବାଗତ କରିଛନ୍ତି ପ୍ରଧାନମନ୍ତ୍ରୀ ମୋଦି। ଏହି ମୁକ୍ତ ବାଣିଜ୍ୟ ଚୁକ୍ତି ଐତିହାସିକ, ସମସ୍ତଙ୍କୁ ନୂଆ ଅବସର ମିଳିବ। ୨୭ ୟୁରୋପୀୟ ଦେଶ ସହ ଡିଲ୍ ହୋଇଛି, ବିଶ୍ବରେ ଏହା ସ୍ଥିରତା ଆଣିବ। ଏହି ଚୁକ୍ତି ଦ୍ବାରା ୟୁରୋପ-ଭାରତ ମଧ୍ୟରେ ନୂଆ ଅଧ୍ୟାୟ ସୃଷ୍ଟି ହୋଇଛି। ଆଜିଠାରୁ ନୂଆ ଯୁଗର ଆରମ୍ଭ ହୋଇଛି। ଭାରତ ଓ ୟୁରୋପ ଲୋକଙ୍କ ପାଇଁ ଏହା ବଡ଼ ସୁଯୋଗ ଆଣିବ। ବିଶ୍ବର ଦୁଇ ବଡ଼ ଅର୍ଥବ୍ୟବସ୍ଥା ମଧ୍ୟରେ ଭଲ ପାର୍ଟନରସିପ୍ର ଏହା ଉଦାହରଣ। ଏହି ଚୁକ୍ତି ବିଶ୍ବ ଜିଡିପିର ୨୫ ପ୍ରତିଶତ ଓ ବିଶ୍ବ ବାଣିଜ୍ୟର ଏକ ତୃତୀୟାଂଶ। ଏହି ଡିଲ୍ ଦ୍ବାରା ଉତ୍ପାଦନ କ୍ଷେତ୍ରରେ ଆହୁରି ବୃଦ୍ଧି ଘଟିବ। ସର୍ଭିସ୍ ସେକ୍ଟରର ବି ଆହୁରି ବିସ୍ତାର ହେବ। ଭାରତରେ ନିବେଶ କରିବା ପାଇଁ ବ୍ୟବସାୟୀଙ୍କ ମଧ୍ୟରେ ଆତ୍ମବିଶ୍ବାସ ବଢ଼ିବ ବୋଲି ମୋଦି କହିଛନ୍ତି।