ମଝି ସମୁଦ୍ରରେ ବୁଡ଼ିଲା ଟ୍ରଲର; ୨୫୦ ନିଖୋଜ, ବଞ୍ଚିବା ଆଶା କ୍ଷୀଣ
ଜାତିସଂଘର ଉଦବେଗ ପ୍ରକାଶ, ଉଦ୍ଧାର କାର୍ଯ୍ୟ ଜାରି
ଢାକା, ୧୫/୦୪: ଆଣ୍ଡାମାନ ସାଗରରେ ବୁଡ଼ିଗଲା ଟ୍ରଲର। ପ୍ରାୟ ୨୫୦ ଜଣ ନିଖୋଜ ହୋଇଥିବା ବେଳେ ମାତ୍ର ୯ ଜଣଙ୍କୁ ଉଦ୍ଧାର କରାଯାଇଛି। ଏବେ ବି ଉଦ୍ଧାର କାର୍ଯ୍ୟ ଜାରି ରହିଛି। ନିଖୋଜ ଶରଣାର୍ଥୀଙ୍କୁ ଜୀବିତ ଉଦ୍ଧାର କରିବା ପାଇଁ ପ୍ରୟାସ କରାଯାଉଥିଲେ ମଧ୍ୟ ବଞ୍ଚିବା ଆଶା କ୍ଷୀଣ ରହିଛି।
ମଙ୍ଗଳବାର ପ୍ରବଳ ପବନ ଏବଂ ଅଶାନ୍ତ ସମୁଦ୍ର ଯୋଗୁଁ ଆଣ୍ଡାମାନ ସାଗରରେ ଏକ ମାଛ ଧରା ଟ୍ରଲର ବୁଡ଼ିଯିବାରୁ ରୋହିଙ୍ଗ୍ୟା ଶରଣାର୍ଥୀ ଏବଂ ବାଂଲାଦେଶୀ ନାଗରିକଙ୍କ ସମେତ ଅତି କମରେ ୨୫୦ ଜଣ ନିଖୋଜ ହେବାର ଖବର ଜାତିସଂଘ ରିପୋର୍ଟ କରିଛି।
ରିପୋର୍ଟ ଅନୁଯାୟୀ, ନିଖୋଜ ଲୋକଙ୍କୁ ଖୋଜିବା ପାଇଁ ଆଣ୍ଡାମାନ ସାଗରରେ ଏକ ବ୍ୟାପକ ସନ୍ଧାନ ଏବଂ ଉଦ୍ଧାର କାର୍ଯ୍ୟ ଜାରି ରହିଛି। ଜାତିସଂଘର ଶରଣାର୍ଥୀ ଉଚ୍ଚାୟୁକ୍ତ (UNHCR) ଏବଂ ଆନ୍ତର୍ଜାତୀୟ ପ୍ରବାସ ସଂଗଠନ (IOM) ଏକ ମିଳିତ ବିବୃତ୍ତି ଜାରି କରି “ଗଭୀର ଦୁଃଖ” ପ୍ରକାଶ କରିଛନ୍ତି।
ରିପୋର୍ଟ ଅନୁଯାୟୀ ଦକ୍ଷିଣ ବାଂଲାଦେଶର ଟେକନାଫରୁ ଯାତ୍ରା କରିଥିବା ଜାହାଜଟି ମାଲେସିଆ ଅଭିମୁଖେ ଯାତ୍ରା କରୁଥିଲା, କିନ୍ତୁ ପ୍ରବଳ ପବନ, ଉଚ୍ଚ ଲହରୀ ଓ ଟ୍ରଲରରେ ମାତ୍ରାଧିକ ଯାତ୍ରୀ ଥିବା ଯୋଗୁଁ ଏହା ଦୁର୍ଘଟଣାଗ୍ରସ୍ତ ହୋଇଥିଲା। UNHCR ଏବଂ IOM କହିଛି ଯେ ଦୀର୍ଘକାଳୀନ ବିସ୍ଥାପନ ଏବଂ ରୋହିଙ୍ଗ୍ୟାଙ୍କ ପାଇଁ ସ୍ଥାୟୀ ସମାଧାନ ନ କରାଯାଉଥିବାରୁ ଏହାର ପରିଣାମ ଗମ୍ଭୀର ହେବାରେ ଲାଗିଛି। ଏହି ଘଟଣା ପରେ, ବାଂଲାଦେଶ ତଟରକ୍ଷୀ ବାହିନୀ (BCG) ଜଣେ ମହିଳା ସମେତ ୯ ଜଣଙ୍କୁ ଉଦ୍ଧାର କରିବାରେ ସଫଳ ହୋଇଛି।
ଉଦ୍ଧାର ହୋଇଥିବା ଲୋକଙ୍କ ମଧ୍ୟରୁ ୬ ଜଣ ହେଉଛନ୍ତି ଭାବନା ଚାଲାଣକାରୀ ଦଲାଲ। ଉଦ୍ଧାର ହୋଇଥିବା ଲୋକଙ୍କ ମଧ୍ୟରୁ ଜଣେ ରଫିକୁଲ ଇସଲାମ ମାଲେସିଆରେ ଚାକିରି ପ୍ରତିଶ୍ରୁତି ଦେଇ ଚାଲାଣକାରୀଙ୍କ ଦ୍ୱାରା ଡଙ୍ଗାରେ ବୋହି ନିଆଯାଇଥିବା କହିଛନ୍ତି।
ଡଙ୍ଗାଟି ଓଲଟିବା ପୂର୍ବରୁ ୪ ଦିନ ଧରି ଯାତ୍ରା କରିଥିଲା। ଉଦ୍ଧାର ହେବା ପୂର୍ବରୁ ଇସଲାମ ଏବଂ ଅନ୍ୟମାନେ ପ୍ରାୟ ୩୬ ଘଣ୍ଟା ପର୍ଯ୍ୟନ୍ତ ଭାସି ରହିଥିଲେ, ୨୫ ରୁ ୩୦ ଜଣ ଲୋକ ଶ୍ୱାସରୁଦ୍ଧ ଏବଂ ଅଧିକ ଲୋକ ଥିବାରୁ ମୃତ୍ୟୁବରଣ କରିଥିଲେ। ସେମାନେ ଭାସୁଥିବା ବେଳେ ଏକ ବାଣିଜ୍ୟିକ ଜାହାଜ ସେମାନଙ୍କୁ ଦେଖି ବାଂଲାଦେଶ କୋଷ୍ଟଗାର୍ଡ଼କୁ ଖବର ଦେଇଥିଲେ।
ସୂଚନାଯୋଗ୍ୟ, ୨୦୧୭ ମସିହାରେ ମିଆଁମାରରେ ହିଂସା ପରେ ବୃଦ୍ଧି ପାଇଥିବା ରୋହିଙ୍ଗ୍ୟା ସଙ୍କଟ ବହୁ ପରିମାଣରେ ବିସ୍ଥାପିତ ହୋଇଛନ୍ତି। ଲକ୍ଷ ଲକ୍ଷ ଲୋକ ବାଂଲାଦେଶରେ ଆଶ୍ରୟ ନେଇଛନ୍ତି। ଅନେକ ଲୋକ ଦୀର୍ଘକାଳୀନ ଜୀବିକା ପାଇଁ ଶରଣାର୍ଥୀ ଶିବିରରେ ରହିଛନ୍ତି। ଯାହା ଦ୍ୱାରା ସେମାନଙ୍କୁ ମାନବ ଚାଲାଣ ଏବଂ ଚୋରା ଚାଲାଣ ନେଟୱାର୍କ ଦ୍ୱାରା ଶୋଷଣର ଶିକାର ହେବାକୁ ପଡ଼ୁଛି। ଏହି ଘଟଣାକୁ ନେଇ ଜାତିସଂଘ ଉଦବେଗ ପ୍ରକାଶ କରିଛି। ରୋହିଙ୍ଗ୍ୟା ଶରଣାର୍ଥୀ ମାନେ ଭଲ ଓ ଉନ୍ନତମାନର ଜୀବନ ଯାପନ କରିବା ପାଇଁ ଆଶା ରଖୁଥିବା ବେଳେ ମାନବ ଚାଲାଣ କାରୀ ମାନେ ସେମାନଙ୍କୁ ପ୍ରଲୋଭିତ କରି ମୃତ୍ୟୁ ମୁଖକୁ ଠେଲି ଦେଉଛି।