ଅକ୍ଷୟ ତୃତୀୟାରେ ଦିଲ୍ଲୀରେ ଆରମ୍ଭ ହେଲା ଜଗନ୍ନାଥଙ୍କ ତିନୋଟି ରଥ ନିର୍ମାଣ

ନୂଆଦିଲ୍ଲୀ, ୨୦/୦୪: “ଅକ୍ଷୟ ତୃତୀୟା”ର ପବିତ୍ର ଅବସରରେ ଭଗବାନ ଜଗନ୍ନାଥଙ୍କ ତିନୋଟି ରଥ ନିର୍ମାଣ ଆରମ୍ଭର ପବିତ୍ର ଅନୁଷ୍ଠାନ ଶ୍ରୀ ଜଗନ୍ନାଥ ମନ୍ଦିର, ତ୍ୟାଗରାଜ ନଗର, ନୂଆଦିଲ୍ଲୀରେ ସମ୍ପୂର୍ଣ୍ଣ ବୈଦିକ ପଦ୍ଧତି ଓ ପୁରୀ ଶ୍ରୀ ଜଗନ୍ନାଥ ଧାମର ପାରମ୍ପରିକ ରୀତିନୀତି ଅନୁସାରେ ସଫଳତାର ସହ ସମ୍ପନ୍ନ ହୋଇଥିଲା। ବେଦ ମନ୍ତ୍ର ଉଚ୍ଚାରଣ ଓ “ଶ୍ରୀ ଜଗନ୍ନାଥ ସ୍ୱାମୀଙ୍କ ଜୟ” ଧ୍ୱନିରେ ସମଗ୍ର ପରିବେଶ ଭକ୍ତିମୟ ହୋଇଉଠିଥିଲା।

ହଜାର ହଜାର ଭକ୍ତ ଏହି ପବିତ୍ର ଅନୁଷ୍ଠାନରେ ଯୋଗ ଦେଇ ଏହାକୁ ଭବ୍ୟ କରିଥିଲେ। ତ୍ୟାଗରାଜ ଜଗନ୍ନାଥ ମନ୍ଦିର ପ୍ରଶାସନ ଏକ ଐତିହାସିକ ସିଦ୍ଧାନ୍ତ ନେଇ, ଓଡ଼ିଶା ବାହାରେ ପ୍ରଥମଥର ପାଇଁ ତିନୋଟି ବିଗ୍ରହ ପାଇଁ ତିନୋଟି ଅଲଗା ରଥ ପ୍ରସ୍ତୁତ କରାଯିବ ବୋଲି ଘୋଷଣା କରିଛନ୍ତି। ଏହି ରଥଗୁଡ଼ିକୁ ବିଶ୍ୱପ୍ରସିଦ୍ଧ ରଥଯାତ୍ରା ଅବସରରେ ୧୬ ଜୁଲାଇରେ ଶ୍ରୀ ଜଗନ୍ନାଥ ମାର୍ଗରେ ଟଣାଯିବ। ଏହି ନୂତନ ପ୍ରୟାସର ଘୋଷଣା ପରେ ଦିଲ୍ଲୀ-ଏନସିଆରର ଭକ୍ତମାନଙ୍କ ମଧ୍ୟରେ ବିଶେଷ ଉତ୍ସାହ ଓ ଆଗ୍ରହ ଦେଖାଯାଇଛି।

ଏହା ପୂର୍ବରୁ ଓଡ଼ିଶାରେ ଭକ୍ତମାନଙ୍କ ଦ୍ୱାରା ବିଶେଷ ଆୟୋଜନ ମାଧ୍ୟମରେ ପବିତ୍ର କାଠ ସଂଗ୍ରହ କରି ଦିଲ୍ଲୀକୁ ଆଣାଯାଇଥିଲା। ଏହି ଅବସରରେ ରାଜ୍ୟସଭା ସାଂସଦ ଓ ଓଡ଼ିଶା ଭାରତୀୟ ଜନତା ପାର୍ଟିର ରାଜ୍ୟ ଅଧ୍ୟକ୍ଷ ଶ୍ରୀ ମନମୋହନ ସାମଲ ମହୋଦୟ ଉପସ୍ଥିତ ରହି ସମ୍ପୂର୍ଣ୍ଣ ଆହୁତି ଅର୍ପଣ କରିଥିଲେ। ପବିତ୍ର କାଠ ବ୍ୟବସ୍ଥାପନାରେ ମୁଖ୍ୟ ଭୂମିକା ନେଇଥିବା ଶ୍ରୀ ଅବନୀକାନ୍ତ ସାହୁ, ଶ୍ରୀ ବିଭୁ ପ୍ରସାଦ ସାହୁ ମଧ୍ୟ ଏହି ଅବସରରେ ଉପସ୍ଥିତ ଥିଲେ ଏବଂ ଶ୍ରୀ ଅବନୀକାନ୍ତ ସାହୁ ‘କର୍ତ୍ତା’ ଭାବେ ପୂଜା କାର୍ଯ୍ୟ ସମ୍ପନ୍ନ କରିଥିଲେ।

ଏହି ଅବସରରେ ଅନେକ ବରିଷ୍ଠ ସରକାରୀ ଅଧିକାରୀ, ତ୍ୟାଗରାଜ ନଗରର ମାନନୀୟ ବିଧାୟକ ଶ୍ରୀ ନୀରଜ ବସୋୟା ମହୋଦୟ ଏବଂ ନୂଆଦିଲ୍ଲୀର ମାନନୀୟ ସାଂସଦ ଶ୍ରୀମତୀ ବାଂସୁରୀ ସ୍ୱରାଜ ମହୋଦୟା ମଧ୍ୟ ଉପସ୍ଥିତ ଥିଲେ।