ଲର୍ଡସ ମୈଦାନରେ ଶତକ ମାରିବାରେ ବିଶ୍ୱର ପ୍ରଥମ ମହିଳା କ୍ରିକେଟର

ନୂଆଦିଲ୍ଲୀ, ୧୩/୦୭: ଲଣ୍ଡନର ଐତିହାସିକ ଲର୍ଡସ କ୍ରିକେଟ ଗ୍ରାଉଣ୍ଡଠାରେ ଖେଳାଯାଇଥିବା ପ୍ରଥମ ମହିଳା ଟେଷ୍ଟ ମ୍ୟାଚ୍‌ରେ ଭାରତୀୟ ମହିଳା କ୍ରିକେଟ ଦଳ ଇତିହାସ ରଚିଛି। ହରମନପ୍ରୀତ କୌରଙ୍କ ନେତୃତ୍ୱରେ ଭାରତୀୟ ଦଳ ଆୟୋଜକ ଇଂଲଣ୍ଡକୁ ୨୭୦ ରନ୍‌ର ଏକ ବିଶାଳ ବ୍ୟବଧାନରେ ପରାସ୍ତ କରି ଏହି ସ୍ମରଣୀୟ ବିଜୟ ହାସଲ କରିଛି।

ପ୍ରଥମ ଇନିଂସରେ ଭାରତର ଦୃଢ଼ ବ୍ୟାଟିଂ ଓ ବୋଲିଂ ଦେଖାଇଥିଲା ଦମ୍‌। ଭାରତ ଟସ୍ ହାରି ପ୍ରଥମେ ବ୍ୟାଟିଂ କରିଥିଲା। ଓପନର୍ ସ୍ମୃତି ମନ୍ଧାନା (୮୩), ଅଧିନାୟିକା ହରମନପ୍ରୀତ କୌର (୫୮) ଏବଂ ଦୀପ୍ତି ଶର୍ମା (୫୭)ଙ୍କ ଅର୍ଦ୍ଧଶତକ ବଳରେ ଭାରତ ୨୮୫ ରନ୍ କରିଥିଲା। ଏହାପରେ ଭାରତୀୟ ବୋଲରଙ୍କ ଘାତକ ବୋଲିଂ ଆଗରେ ଇଂଲଣ୍ଡ ମାତ୍ର ୧୭୦ ରନ୍‌ରେ ଅଲଆଉଟ୍ ହୋଇଯାଇଥିଲା। ଭାରତର ଦ୍ରୁତ ବୋଲର କ୍ରାନ୍ତି ଗୌଡ଼ ମାତ୍ର ୩୭ ରନ୍ ଦେଇ ୫ଟି ୱିକେଟ୍ ହାହଲ କରି ଇଂଲଣ୍ଡର ବ୍ୟାଟିଂ ମେରୁଦଣ୍ଡ ଭାଙ୍ଗି ଦେଇଥିଲେ।

ପ୍ରଥମ ଇନିଂସ ଆଧାରରେ ୧୧୫ ରନ୍‌ର ଅଗ୍ରଣୀ ପାଇବା ପରେ ଭାରତ ଦ୍ୱିତୀୟ ଇନିଂସରେ ଚମତ୍କାର ବ୍ୟାଟିଂ କରିଥିଲା। ବାମହାତୀ ୱିକେଟ୍‌କିପର ବ୍ୟାଟର ୟାସ୍ତିକା ଭାଟିଆ ୧୫୮ ବଲ୍‌ରୁ ୧୧୩ ରନ୍‌ର ଏକ ଶାନଦାର ଇନିଂସ ଖେଳିଥିଲେ। ଏହାସହ ଲର୍ଡସ ମୈଦାନରେ ଶତକ ହାସଲ କରିବାରେ ସେ ବିଶ୍ୱର ପ୍ରଥମ ମହିଳା କ୍ରିକେଟର ହେବାର ଗୌରବ ଲାଭ କରିଛନ୍ତି। ସ୍ମୃତି ମନ୍ଧାନା (୭୦) ଏବଂ ରିଚା ଘୋଷ (୫୦)ଙ୍କ ଯୋଗୁଁ ଭାରତ ୩୪୧/୭ ରନ୍‌ରେ ନିଜ ଇନିଂସ ଘୋଷଣା କରି ଇଂଲଣ୍ଡ ସମ୍ମୁଖରେ ୪୫୭ ରନ୍‌ର ଏକ ବିଶାଳ ଲକ୍ଷ୍ୟ ରଖିଥିଲା।

୪୫୭ ରନ୍‌ର ପିଛା କରୁଥିବା ଇଂଲଣ୍ଡ ଦଳ ଚତୁର୍ଥ ଦିନରେ ଭାରତୀୟ ସ୍ପିନର ଓ ପେସରଙ୍କ ଆଗରେ ଆତ୍ମସମର୍ପଣ କରିଥିଲା। କ୍ରାନ୍ତି ଗୌଡ଼ ପ୍ରଥମ ବଲ୍‌ରେ ହିଁ ଟାମି ବ୍ୟୁମଣ୍ଟଙ୍କୁ ଆଉଟ୍ କରି ଭାରତକୁ ବଡ଼ ସଫଳତା ଦେଇଥିଲେ। ଇଂଲଣ୍ଡ ପକ୍ଷରୁ ଏମି ଜୋନ୍ସ (୫୪) ଓ ସୋଫି ଏକେଲଷ୍ଟୋନ୍ (୫୦) କିଛି ସମୟ ସଂଘର୍ଷ କରିଥିଲେ ମଧ୍ୟ ସ୍ନେହ ରାଣା (୪ ୱିକେଟ୍) ଓ ଦୀପ୍ତି ଶର୍ମା (୨ ୱିକେଟ୍)ଙ୍କ ସାଙ୍ଘାତିକ ବୋଲିଂ ଯୋଗୁଁ ସମଗ୍ର ଇଂଲଣ୍ଡ ଦଳ ୧୮୬ ରନ୍‌ରେ ଚିତ୍ ପଟାଙ୍ଗ ହୋଇଯାଇଥିଲା।

ତେବେ ଏହି ଟେଷ୍ଟ ମ୍ୟାଚ୍ ରେ ଭାରତ ମହିଳା କ୍ରିକେଟ ଟିମ୍ ଇତିହାସ ରଚିଛନ୍ତି। କ୍ରାନ୍ତି ଗୌଡ଼ ଓ ୟାସ୍ତିକା ଭାଟିଆ ଲର୍ଡସର ଅନର୍ସ ବୋର୍ଡରେ ନିଜ ନାଁ ସାମିଲ କରିବାରେ ପ୍ରଥମ ମହିଳା କ୍ରିକେଟର ହୋଇଛନ୍ତି। ଏହି ସଫଳତା ସହ ଭାରତୀୟ ମହିଳା ଦଳ ଇଂଲଣ୍ଡ ବିପକ୍ଷରେ ସେମାନଙ୍କ ମାଟିରେ ଖେଳିଥିବା ସମସ୍ତ ୩ଟି ଯାକ ଟେଷ୍ଟ ମ୍ୟାଚ୍ ଜିତି ନିଜର ଅପରାଜେୟ ରେକର୍ଡ ବଜାୟ ରଖିଛି।

ସ୍କୋର ବୋର୍ଡ଼ ଉପରେ ନଜର ପକାନ୍ତୁ

ଭାରତ (ପ୍ରଥମ ଇନିଂସ): ୨୮୫/୧୦ (ସ୍ମୃତି ମନ୍ଧାନା ୮୩, ହରମନପ୍ରୀତ କୌର ୫୮, ଦୀପ୍ତି ଶର୍ମା ୫୭)

ଇଂଲଣ୍ଡ (ପ୍ରଥମ ଇନିଂସ): ୧୭୦/୧୦ (କ୍ରାନ୍ତି ଗୌଡ଼ ୫/୩୭, ସ୍ନେହ ରାଣା ୨/୪୧)

ଭାରତ (ଦ୍ୱିତୀୟ ଇନିଂସ): ୩୪୧/୭ (ଘୋଷିତ) (ୟାସ୍ତିକା ଭାଟିଆ ୧୧୩, ସ୍ମୃତି ମନ୍ଧାନା ୭୦, ରିଚା ଘୋଷ ୫୦)

ଇଂଲଣ୍ଡ (ଦ୍ୱିତୀୟ ଇନିଂସ): ୧୮୬/୧୦ (ସ୍ନେହ ରାଣା ୪/୪୨, ଦୀପ୍ତି ଶର୍ମା ୨/୩୬, କ୍ରାନ୍ତି ଗୌଡ଼ ୨/୫)