କେବଳ ପ୍ରଶ୍ନ ନୁହେଁ, ସମାଧାନ ଖୋଜିବାର ସାହସ ରଖନ୍ତୁ: ଜେନ-ଜିକୁ ପିଏମ ମୋଦିଙ୍କ ବାର୍ତ୍ତା

ନୂଆଦିଲ୍ଲୀ, ୦୮/୦୮: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଆଇଆଇଟି ଦିଲ୍ଲୀର ୫୭ତମ ଦୀକ୍ଷାନ୍ତ ସମାରୋହରେ ମୁଖ୍ୟ ଅତିଥି ଭାବେ ଯୋଗ ଦେଇ Gen-Z ଛାତ୍ରଛାତ୍ରୀଙ୍କୁ ସମ୍ବୋଧନ କରିଛନ୍ତି। ଆଇଆଇଟି ଦିଲ୍ଲୀରେ ପ୍ରଥମ ଥର ପାଇଁ ସମାରୋହରେ ଯୋଗ ଦେଇଛନ୍ତି।

ପ୍ରଧାନମନ୍ତ୍ରୀ ମୋଦୀ ଛାତ୍ରଛାତ୍ରୀଙ୍କୁ କହିଛନ୍ତି: “କେବଳ ପ୍ରଶ୍ନ ପଚାରନ୍ତୁ ନାହିଁ। ଉତ୍ତର ଖୋଜିବାର ସାହସ ରଖନ୍ତୁ।” ସେ କହିଛନ୍ତି ଯେ ଆପଣଙ୍କ ଡିଗ୍ରୀ କେବଳ ପରୀକ୍ଷା ପାସ୍, ଭଲ CGPA କିମ୍ବା ପ୍ଲେସମେଣ୍ଟର ପ୍ରମାଣ ନୁହେଁ; ଏହା ଜଟିଳ ସମସ୍ୟା ସମାଧାନ କରିବା ଓ ପରିବର୍ତ୍ତନଶୀଳ ବିଶ୍ୱର ଚ୍ୟାଲେଞ୍ଜ ସାମ୍ନା କରିବାର କ୍ଷମତାର ପ୍ରମାଣ।

ସେ ଆହୁରି କହିଛନ୍ତି ଯେ ଆଗାମୀ ୩୦-୩୫ ବର୍ଷରେ ଆପଣମାନେ ଯାହା କରିବେ, ତାହା ବିକଶିତ ଭାରତ ଯାତ୍ରାକୁ ଆକାର ଦେବ। ତେଣୁ ପ୍ରତ୍ୟେକ ନିଷ୍ପତ୍ତି ନେବା ପୂର୍ବରୁ ଭାବନ୍ତୁ — ଏହା ଦେଶକୁ କିପରି ଲାଭ ଦେବ ଓ ଦେଶର କେଉଁ ଆବଶ୍ୟକତା ପୂରଣ କରିବ। “ଆମର ଆପଣଙ୍କ ଉପରେ ବିଶ୍ୱାସ ଅଛି। ଦେଶକୁ ଆପଣଙ୍କ ଆବଶ୍ୟକତା ଅଛି। ପ୍ରତ୍ୟେକ ପିଢ଼ିର ନିଜର ଜାତୀୟ ଦାୟିତ୍ୱ ଥାଏ ବୋଲି ସେ କହିଛନ୍ତି।

“ବିଶ୍ୱ ଦ୍ରୁତ ଗତିରେ ବଦଳୁଛି — ରଣନୀତିକ ସମୀକରଣ, ବିଶ୍ୱ ଶକ୍ତି ସନ୍ତୁଳନ, ପ୍ରଯୁକ୍ତି, ଶିଳ୍ପ ଓ ବୃତ୍ତି ସବୁ ପରିବର୍ତ୍ତିତ ହେଉଛି। ଆଗାମୀ ୨୦-୩୦ ବର୍ଷରେ ବିଶ୍ୱ କିପରି ରହିବ ତାହା କେହି ନିଶ୍ଚିତ ଭାବେ କହିପାରିବେ ନାହିଁ। ତଥାପି ପରିବର୍ତ୍ତନ ସହିତ ଚ୍ୟାଲେଞ୍ଜ ଓ ସୁଯୋଗ ଉଭୟ ଆସେ। ଯିଏ ଶିଖିବ, ସେ ଜିତିବ। ଯିଏ ନୂଆ ସମାଧାନ ଖୋଜିବ, ସେ ଚ୍ୟାଲେଞ୍ଜକୁ ସୁଯୋଗରେ ପରିଣତ କରିବ ବୋଲି ସେ କହିଛନ୍ତି।

ଏହି ଅବସରରେ ସେ ଆଇଆଇଟି ଦିଲ୍ଲୀର ସୋନିପତ୍ କ୍ୟାମ୍ପସରେ ଥିବା ପରମ ପ୍ରଜ୍ଞା ନାମକ AI-ଚାଳିତ ଉଚ୍ଚ-କାର୍ଯ୍ୟଦକ୍ଷତା ସୁପରକମ୍ପ୍ୟୁଟିଂ ସୁବିଧାର ଉଦ୍ଘାଟନ କରିଛନ୍ତି। ଗବେଷଣା ଓ ଇନୋଭେସନ୍ ପାଇଁ ସରକାର ୧ ଲକ୍ଷ କୋଟି ଟଙ୍କା ପାଣ୍ଠି ବ୍ୟବସ୍ଥା କରୁଥିବା କଥା ମଧ୍ୟ ସେ ଉଲ୍ଲେଖ କରିଛନ୍ତି। ମେଡାଲ୍ ବିଜେତାଙ୍କୁ ଅଭିନନ୍ଦନ ଜଣାଇ ସେ କହିଛନ୍ତି ଯେ ଅଧିକ ଝିଅମାନେ ମେଡାଲ୍ ପାଇଲେ ଆହୁରି ଭଲ ହୋଇଥାନ୍ତା। ଛାତ୍ରଛାତ୍ରୀଙ୍କୁ ଏହି ମୁହୂର୍ତ୍ତକୁ ପୂର୍ଣ୍ଣ ଭାବେ ଉପଭୋଗ କରିବାକୁ, ଶିକ୍ଷକ ଓ ସହଯୋଗୀ କର୍ମଚାରୀଙ୍କୁ ଧନ୍ୟବାଦ ଦେବାକୁ ମଧ୍ୟ ପରାମର୍ଶ ଦେଇଛନ୍ତି।