ନୂଆଦିଲ୍ଲୀ, ୦୬/୧୦: ଓମାନ ଉପକୂଳ ନିକଟ ହର୍ମୁଜ୍ ପ୍ରଣାଳୀ ଦେଇ ଯାଉଥିବା ପାନାମା ପତାକା ବହନକାରୀ ବାଣିଜ୍ୟିକ ଜାହାଜ ଏମଟି ଅନ ପିସ୍ ଉପରେ ମଙ୍ଗଳବାର ପ୍ରୋଜେକ୍ଟାଇଲ୍ ଦ୍ୱାରା ଆକ୍ରମଣ ହୋଇଛି। ଏହି ଘଟଣାରେ ଜାହାଜରେ ଥିବା ୧୨ ଜଣ କ୍ରୁ ସଦସ୍ୟ ଆହତ ହୋଇଥିବାବେଳେ ସେମାନଙ୍କ ମଧ୍ୟରୁ ୧୧ ଜଣ ଭାରତୀୟ ନାଗରିକ ବୋଲି ଭାରତର ବୈଦେଶିକ ବ୍ୟାପାର ମନ୍ତ୍ରାଳୟ (ଏମଇଏ) ସ୍ପଷ୍ଟ କରିଛି।
ସୂଚନା ଅନୁସାରେ, ଏମଟି ଅନ ପିସ୍ ରେ ମୋଟ ୧୯ ଜଣ କ୍ରୁ ସଦସ୍ୟ ଥିଲେ। ସେମାନଙ୍କ ମଧ୍ୟରୁ ୧୭ ଜଣ ଭାରତୀୟ ଥିଲେ। ଜାହାଜଟି ହର୍ମୁଜ୍ ପ୍ରଣାଳୀ ଦେଇ ଯାଉଥିବା ସମୟରେ ଏହାକୁ ପ୍ରୋଜେକ୍ଟାଇଲ୍ ଦ୍ୱାରା ଆକ୍ରମଣ କରାଯାଇଥିଲା। ତେବେ ଏହି ଆକ୍ରମଣ ପଛରେ କିଏ ରହିଛି, ସେନେଇ ସ୍ପଷ୍ଟ ସୂଚନା ମିଳିନାହିଁ।
ଆକ୍ରମଣ ପରେ ଆହତ କ୍ରୁ ସଦସ୍ୟମାନଙ୍କୁ ଓମାନ କର୍ତ୍ତୃପକ୍ଷଙ୍କ ସହାୟତାରେ ଜାହାଜରୁ ଉଦ୍ଧାର କରାଯାଇଛି। ସେମାନଙ୍କୁ ଓମାନର ଖସାବକୁ ନିଆଯାଇ ସେଠାରେ ଚିକିତ୍ସା ଦିଆଯାଉଛି। ଭାରତୀୟ ନାବିକମାନଙ୍କ ସୁରକ୍ଷିତ ଉଦ୍ଧାରରେ ସହଯୋଗ କରିଥିବାରୁ ଓମାନ କର୍ତ୍ତୃପକ୍ଷଙ୍କୁ ଭାରତ ସରକାର ଧନ୍ୟବାଦ ଜଣାଇଛି।
ଘଟଣାକୁ ନେଇ ଭାରତୀୟ ବୈଦେଶିକ ବ୍ୟାପାର ମନ୍ତ୍ରାଳୟ ଗଭୀର ଚିନ୍ତା ପ୍ରକାଶ କରିଛି। ଅନ୍ତର୍ଜାତୀୟ ଜଳପଥରେ ବାଣିଜ୍ୟିକ ଜାହାଜ, ନାବିକ ଏବଂ ନାଗରିକ ଭିତ୍ତିଭୂମିକୁ ଟାର୍ଗେଟ୍ କରି ହେଉଥିବା ଆକ୍ରମଣ ତୁରନ୍ତ ବନ୍ଦ ହେବା ଦରକାର ବୋଲି ଭାରତ କହିଛି। ଏଭଳି ଘଟଣା ଆଞ୍ଚଳିକ ଶାନ୍ତି ଓ ସ୍ଥିରତା ସହିତ ଅନ୍ତର୍ଜାତୀୟ ସାମୁଦ୍ରିକ ବାଣିଜ୍ୟ ପାଇଁ ମଧ୍ୟ ବଡ଼ ଚିନ୍ତାର କାରଣ ବୋଲି ଏମଇଏ କହିଛି।
ମନ୍ତ୍ରାଳୟ ଆହୁରି କହିଛି ଯେ, ବାଣିଜ୍ୟିକ ଜାହାଜ ଓ ନାବିକଙ୍କୁ ଟାର୍ଗେଟ୍ କରିବା ବନ୍ଦ କରାଯିବା ସହ ଅନ୍ତର୍ଜାତୀୟ ଜଳପଥରେ ନିରାପଦ ନୌଚଳାଚଳ ଓ ବାଣିଜ୍ୟକୁ ଶୀଘ୍ର ପୁନଃସ୍ଥାପିତ କରାଯିବା ଆବଶ୍ୟକ।