ଭାରତରେ ଇଥିଓପିଆ ଆଗ୍ନେୟଗିରି ଉଦଗୀରଣ ଧୂଆଁ, ବିଷାକ୍ତ ବାୟୁମଣ୍ଡଳ

ନୂଆଦିଲ୍ଲୀ, ୨୫/୧୧: ଭାରତର ରାଜଧାନୀ ଦିଲ୍ଲୀରେ ବାୟୁ ଅସମ୍ଭାଳ ଥିବା ବେଳେ ପୁଣି ଆହୁରି ବାୟୁକୁ ବିଷାକ୍ତ କରିଛି ଇଥିଓପିଆର ଆଗ୍ନେୟଗିରି ଉଦଗୀରଣ ଧୂଆଁ। ଭାରତ ମୁହାଁ ଇଥିଓପିଆ ଆଗ୍ନେୟଗିରି ଉଦଗୀରଣ ଧୂଆଁ। ଏହା ପଶ୍ଚିମ ଓ ଉତ୍ତର ଭାରତରେ ପ୍ରବେଶ କରି ଚୀନ୍ ଆଡ଼କୁ ମୁହାଁଇଛି। ଏ ନେଇ ସତର୍କ କରାଇଛି ଭାରତୀୟ ପାଣିପାଗ ସଂସ୍ଥା ସ୍କାଏ ମେଟ୍।

ଗତ କାଲି ରାତି ୧୧ଟା ସୁଦ୍ଧା ଗୁଜୁରାଟ ଦେଇ ପ୍ରବେଶ କରି ରାଜସ୍ଥାନ, ପଶ୍ଚିମ ମହାରାଷ୍ଟ୍ର, ଦିଲ୍ଲୀ, ହରିୟାଣା ଏବଂ ପଞ୍ଜାବ ଉପରେ ଗତି କରି ହିମାଳୟ ଦେଇ ଚୀନ୍ ଆଡ଼କୁ ମୁହାଁଇଛି। ଆଜି ସନ୍ଧ୍ୟା ୭.୩୦ ସୁଦ୍ଧା ଭାରତ ଛାଡ଼ି ଚୀନରେ ପ୍ରବେଶ କରିବା। ଯାହା ଫଳରେ ବିମାନ କମ୍ପାନୀ ଓ ବିମାନବନ୍ଦର କର୍ତ୍ତୃପକ୍ଷ ସତର୍କ ହୋଇଛନ୍ତି। ଲାଭା ପାଉଁଶ ଓ ଧୂଆଁ ଯୋଗୁଁ ବିମାନ ଚଳାଚଳ ବାଧାପ୍ରାପ୍ତ ହୋଇଛି।

ଭାରତରୁ ଆବୁଧାବିକୁ ଯିବାକୁ ଥିବା ସମସ୍ତ ବିମାନ ପ୍ରଭାବିତ ହୋଇଛି। ଭାରତର ପ୍ରମୁଖ ବିମାନବନ୍ଦରରେ ଆଡଭାଇଜରି ଜାରି କରାଯାଇଛି। ବିମାନ କମ୍ପାନୀ ସହ ଯୋଗାଯୋଗ କରିବାକୁ ଯାତ୍ରୀଙ୍କୁ ପରାମର୍ଶ ଦିଆଯାଇଛି।

ଏୟାର ଇଣ୍ଡିଆ ୧୧ଟି ଉଡାଣ ବାତିଲ କରିଛି। ନ୍ୟୁୟର୍କ- ଦିଲ୍ଲୀ, ଦୁବାଇ- ହାଇଦ୍ରାବାଦ, ଦୋହା- ମୁମ୍ବାଇ, ଦୁବାଇ- ଚେନ୍ନାଇ, ଦମ୍ମାମ- ମୁମ୍ବାଇ, ଦୋହା- ଦିଲ୍ଲୀ, ଚେନ୍ନାଇ- ମୁମ୍ବାଇ, ହାଇଦ୍ରାବାଦ- ଦିଲ୍ଲୀ, ମୁମ୍ବାଇ- ହାଇଦ୍ରାବାଦ- ମୁମ୍ବାଇ, ମୁମ୍ବାଇ- କୋଲକାତା-ମୁମ୍ବାଇ ବିମାନ ବାତିଲ ହୋଇଛି।

ଇଥିଓପିଆର ହାଇଲି ଗୁବ୍ବି ଜ୍ୱାଳାମୁଖୀରୁ ଆଗ୍ନେୟଗିରି ଉଦଗୀରଣ ହୋଇଛି। ପ୍ରଥମ ଥର ପାଇଁ ଆଗ୍ନେୟଗିରି ଉଦଗୀରଣରେ ବାୟୁମଣ୍ଡଳରେ ପାଉଁଶ ଓ ଧୂଳିକଣାର ଘନ ଆସ୍ତରଣ ଜମି ଯାଇଛି।

ଏହି ଧୂଆଁ ବା ପାଉଁଶ ୧୫,୦୦୦-୨୫,୦୦୦ ଫୁଟ ଉଚ୍ଚତାରେ ଏବଂ କିଛି ଅଞ୍ଚଳରେ ୪୫,୦୦୦ ଫୁଟ ପର୍ଯ୍ୟନ୍ତ ଉଚ୍ଚତାରେ ଘଣ୍ଟା ପ୍ରତି ୧୨୦ରୁ ୧୩୦ କିଲୋମିଟର ବେଗରେ ଗତି କରୁଛି। ଏହି ଜ୍ୱାଳାମୁଖୀ ପାଉଁଶରେ ସଲଫର ଡାଇଅକ୍ସାଇଡ୍ ଏବଂ କାଚ ଏବଂ ପଥରର ସୂକ୍ଷ୍ମ କଣିକା ରହିଛି।

IndiaMetSky Weather ସତର୍କ କରାଇ ଦେଇଛି ଯେ ଏହି ପାଉଁଶ ଆକାଶକୁ ଅନ୍ଧକାରମୟ ଏବଂ କୁହୁଡ଼ିମୟ କରିପାରେ ଏବଂ ବିମାନ ଚଳାଚଳ ସମୟସୂଚୀକୁ ବାଧା ଦେଇପାରେ, ଯାହା ଫଳରେ ବିମାନ ଉଡାଣ ବିଳମ୍ବ ଏବଂ ଉଡ଼ାଣ ଅବଧି ବୃଦ୍ଧି ହୋଇପାରେ।

ଟୁଲୁଜ୍ ଭୋଲକାନିକ୍ ଆଶ୍ ଆଡଭାଇଜରି ସେଣ୍ଟର (VAAC) କହିଛି ଯେ ରବିବାର ସକାଳ ୮ଟା ୩୦ ସମୟରେ ଏହି ଉଦ୍ଗିରଣ ଆରମ୍ଭ ହୋଇଥିଲା, ଯାହା ପ୍ରାୟ ୧୦,୦୦୦ ବର୍ଷରେ ପ୍ରଥମ ରେକର୍ଡ ହୋଇଥିବା ଜ୍ୱାଳାମୁଖୀ। ଇଥିଓପିଆର ଏର୍ଟା ଆଲେ ରେଞ୍ଜରେ ଅବସ୍ଥିତ ଏହି ଜ୍ୱାଳାମୁଖୀ ଶେଷ ଥର ପାଇଁ ପ୍ରାୟ ୧୦ ହଜାରରୁ ୧୨ ହଜାର ବର୍ଷ ପୂର୍ବେ ଉଦ୍ଗିରଣ ହୋଇଥିଲା।

ଏହି ପାଉଁଶ ପ୍ରଥମେ ଲୋହିତ ସାଗର ଦେଇ ଓମାନ ଏବଂ ୟେମେନ୍ ଆଡକୁ ଗତି କରିଥିଲା ଏବଂ ପୂର୍ବ ଦିଗକୁ ଗତି କରିଥିଲା। ଉଦ୍ଗିରଣ ପରେ, ଆରବୀୟ ଉପଦ୍ୱୀପର କିଛି ଅଂଶରେ ଜ୍ୱାଳାମୁଖୀ ପାଉଁଶ ମଧ୍ୟ ଚିହ୍ନଟ ହୋଇଥିଲା, ଯାହା ଫଳରେ ବିମାନ କମ୍ପାନୀଗୁଡ଼ିକ ମଧ୍ୟପ୍ରାଚ୍ୟ ଦେଇ ଯାତ୍ରା କରୁଥିବା ବିମାନ ପାଇଁ ପରାମର୍ଶ ଜାରି କରିଥିଲେ। ଭାରତ ଅଭିମୁଖେ ଯାଉଥିବା ବିମାନ ପାଇଁ ଏପର୍ଯ୍ୟନ୍ତ କୌଣସି ନିର୍ଦ୍ଦିଷ୍ଟ ଚେତାବନୀ ଜାରି କରାଯାଇ ନାହିଁ।