ମୁମ୍ବାଇ, ୨୭/୦୪: ବିରିୟାନୀ ପରେ ତରଭୁଜ ଖାଇବା ହେଲା କାଳ। ଖାଦ୍ୟ ବିଷକ୍ରିୟା ହୋଇ ଗୋଟିଏ ପରିବାରର ୪ ଜଣଙ୍କର ମୃତ୍ୟୁ ହୋଇଛି। ଏଭଳି ଏକ ଅଭାବନୀୟ ଘଟଣା ଘଟିଛି ମୁମ୍ବାଇରେ।
ମୃତକମାନେ ହେଲେ ଅବଦୁଲ୍ଲା ଡୋକାଡିଆ (୪୦), ତାଙ୍କ ସ୍ତ୍ରୀ ନସରିନ ଡୋକାଡିଆ (୩୫) ଏବଂ ସେମାନଙ୍କର ଦୁଇ ଝିଅ ଆୟେଶା (୧୬) ଏବଂ ଜୈନବ (୧୩)।
ପ୍ରାଥମିକ ସୂଚନା ଅନୁଯାୟୀ, ପରିବାର ୨୫ ଏପ୍ରିଲ ରାତି ୧୦ଟା ୩୦ ରେ ଘରେ ରାତ୍ରୀଭୋଜନ କରିଥିଲେ। ଏହା ପରେ, ସେମାନେ ବିଳମ୍ବିତ ରାତିରେ ପ୍ରାୟ ୧ଟାରୁ ୧ଟା ୩୦ ଭିତରେ ତରଭୁଜ ଖାଇଥିଲେ। କିଛି ଘଣ୍ଟା ମଧ୍ୟରେ ସେମାନଙ୍କ ସ୍ୱାସ୍ଥ୍ୟାବସ୍ଥା ଖରାପ ହେବାକୁ ଲାଗିଲା। ସକାଳ ୫ଟା ସୁଦ୍ଧା ସେମାନଙ୍କର ବାନ୍ତି ହେଲା। ସେମାନଙ୍କୁ ପ୍ରଥମେ ନିକଟସ୍ଥ ଏକ ଡାକ୍ତରଖାନାକୁ ନିଆଯାଇଥିଲା। କିନ୍ତୁ ପରେ ଜେଜେ ହସ୍ପିଟାଲକୁ ରେଫର କରାଯାଇଥିଲା। ଡାକ୍ତରଙ୍କ ଅନେକ ଚେଷ୍ଟା ସତ୍ତ୍ୱେ ଚିକିତ୍ସା ସମୟରେ ଚାରି ଜଣଙ୍କ ମୃତ୍ୟୁ ହୋଇଥିଲା। ପ୍ରଥମେ ସାନ ଝିଅ ଜୈନବଙ୍କ ମୃତ୍ୟୁ ହୋଇଥିବା ବେଳେ ଶେଷରେ ଅବଦୁଲ୍ଲାଙ୍କ ମୃତ୍ୟୁ ହୋଇଥିଲା। ପୋଲିସ ଦୁର୍ଘଟଣାଜନିତ ମୃତ୍ୟୁ ମାମଲା ରୁଜୁ କରି ତଦନ୍ତ ଆରମ୍ଭ କରିଛି। ପୋଷ୍ଟମର୍ଟମ ରିପୋର୍ଟ ଆସିବା ପରେ ହିଁ ପ୍ରକୃତ କାରଣ ଜଣାପଡ଼ିବ।
କାହିଁକି ବିରିୟାନୀ ପରେ ତରଭୁଜ ଖାଇବା ଉଚିତ ନୁହେଁ?
ଏହା ପଛରେ ଆୟୁର୍ବେଦିକ କାରଣ ରହିଛି। ଆୟୁର୍ବେଦ ଅନୁଯାୟୀ, ତରଭୁଜ ଏକ ଶୀତଳ, ଜଳୀୟ ଏବଂ ଶୀଘ୍ର ହଜମ ହୋଇଯାଉଥିବା ଏକ ଫଳ। ଏହା ପେଟରେ ଶୀଘ୍ର ହଜମ ହୋଇଯାଏ ଏବଂ ଅଧିକାଂଶ ଜଳ ଥାଏ।
ବିରିୟାନୀ ହେଉଛି ଏକ ଭାରୀ, ମସଲାଯୁକ୍ତ, ତୈଳଯୁକ୍ତ ଏବଂ ବିଳମ୍ବରେ ହଜମ ହେଉଥିବା ଖାଦ୍ୟ। ଏହା ଚାଉଳ, ମାଂସ, ମସଲା ଇତ୍ୟାଦି ଯୋଗୁଁ ଏପରି ହୋଇଥାଏ।
ତେଣୁ ଭାରୀ ଖାଦ୍ୟ ପରେ ତରଭୁଜ ଖାଇଲେ ପେଟରେ ଫର୍ମେଣ୍ଟେସନ୍ ହୁଏ। ଯାହା ଦ୍ୱାରା ଗ୍ୟାସ୍, ପେଟ ଫୁଲା, ହଜମ ନ ହେବା, ଏସିଡିଟି ହୋଇପାରେ।
ସେଥିପାଇଁ ଆୟୁର୍ବେଦରେ କୁହାଯାଏ ଯେ, ତରଭୁଜ ଭଳିଆ ଫଳକୁ ଅନ୍ୟ କୌଣସି ଖାଦ୍ୟ ସହ ନ ମିଶାଇ ଅଲଗା ଖାଇବା ଉଚିତ୍। ଏହାକୁ ଖାଲି ପେଟ ବା ଖାଦ୍ୟ ଖାଇବାର କିଛି ସମୟ ପରେ ଖାଇବା ଉଚିତ।